"Qafqazlı qardaşqızı" Musiqili Teatrın səhnəsində

Azərbaycan Dövlət Musiqili Teatrında görkəmli bəstəkar Rauf Hacıyevin "Qafqazlı qardaşqızı" operettası növbəti dəfə nümayiş olunacaq.

Dövlət Musiqili Teatrının mətbuat xidmətindən bildirilib ki, budəfəki nümayişin özəlliyi Xalq artisti, "Şöhrət" ordenli İlham Namiq Kamalın tamaşada iştirakı ilə bağlıdır. Belə ki, məşhur səhnə əsərində İlham Namiq Kamal baş rolu - Bəbirli obrazını canlandıracaq.

Tamaşanın nümayişi 24 noyabr saat 19.00-da baş tutacaq. "Musiqili teatrın rus bölməsi tərəfindən hazırlanan bu məşhur operettada ilk dəfə səhnəyə çıxacağam. Bəbirli çox xarakterik bir obrazdır. Koloritli olduğu qədər də özünəməxsus düşüncə tərzinə malikdir. Rauf Hacıyevin möhtəşəm musiqisi isə şedevrdir.

Bir məqamı xüsusi qeyd etmək istərdim, peşəkar aktyor üçün dil faktoru yoxdur. Əsas aktyorun plastikası, məharəti, oynadığı obrazı doğru-düzgün təqdim etmək bacarığına sahib olmasıdır. İnanıram ki, tamaşaçılar mənim ifamda Bəbirlini sevəcəklər", - deyə İlham Namiq Kamal bildirib.

Qeyd edək ki, beynəlxalq layihə kimi teatrın tarixinə yazılan tamaşanın quruluşçu rejissoru Əli Usubov, quruluşçu dirijoru Nazim Hacıəlibəyov, quruluşçu rəssamı Moskvadan dəvət olunmuş professor Dmitri Çerbadji, quruluşçu baletmestrləri Zakir Ağayev və Leyla Ağayevadır. Tamaşada rolları Boris Qrafkin, Svetlana Bulax, Səidə Şərifəliyeva, aktyorlar Firuz Məmmədov, Yuliya Heydərova, Rauf Babayev, Nicat Əli və Əliməmməd Novruzov ifa edirlər.

XƏDİCƏ

525-ci qəzet 2017.- 22 noyabr.- S.2.