Ziyalı sözü" layihəsi yekunlaşdı

Noyabrın 25-də Gənclər üçün Təhsil Mərkəzi və Azərbaycan Yazıçılar Birliyinin birgə həyata keçirdiyi "Ziyalı sözü" layihəsi öz işinə yekun vurub.

Sonuncu görüşdə GTM-in və layihənin rəhbəri Fəxrəddin Həsənzadə layihənin fəaliyyəti və bu günə qədərki görüşləri barədə qısaca məlumat verib, gələcəkdə də bu formatda layihələrin davam edəcəyini vurğulayıb: "Artıq neçə ildir ki, Yazıçılar Birliyinin təsis etdiyi "Gənc Ədiblər Məktəbi" fəaliyyətdədir. Biz də belə bir ideya ilə birliyə müraciət edərkən məqsədimiz birliyin bu təcrübəsindən yararlanmaq idi. Gənc Ədiblər Məktəbində gənc yazarlar, şairlər iştirak edirsə, bizim iştirakçılarımız ədəbiyyata, mütaliəyə həvəsli olan gənclər, müxtəlif universitetlərin tələbləri idi. Hansı ki, onlar yazıçı kimi deyil, oxucu kimi ədəbiyyata, poeziyaya maraq göstərirlər. Fikrimcə, layihə uğurla baş tutdu".

F.Həsənzadə qeyd edib ki, bu zamana qədər Rəşad Məcid, Şəhriyar del Gerani, Qismət, Elçin Mirzəbəyli, Qulu Ağsəs, Fərid Hüseynlə keçirilən görüşlərdə onu ən çox sevindirən iştirakçıların tanınmış yazarla bərabər, gənclərin də yaradıcılığına dərindən bələd olması, sevərək oxuması olub.

F.Həsənzadə gələcəkdə bu cür layihələrin davamlı olacağını nəzərə çatdırıb: "Gənclər üçün Təhsil Mərkəzi ölkənin altı regionunda fəaliyyət göstərən gənclər təşkilatı olaraq, Azərbaycanda böyük bir maarifçilik hərəkatı funksiyasını öz üzərində daşıyır. Bundan öncə biz iki dəfə Azərbaycan Gənclərinin Maarifçilik Forumlarını keçirmişik. Bizim əsas məqsədimiz dövlətçilik ənənələrimizi gənclərimizin arasında təbliğ etmək, onları ziyalılarımızla görüşdürüb onların təcrübələrindən yararlanmaqlarına vəsilə olmaqdır. Bu layihənin davamı sözsüz ki, olacaq. Bu ilin sonları, gələn ilin əvvəllərində "Ziyalı sözü" daha geniş formatda davam edəcək. Fikrimiz var ki, yazıçı, şairlərimizin özlərindən əlavə dünyasını dəyişən ziyalılarımızın ailələri ilə də görüşlər təşkil edək".

Layihənin koordinatoru və bütün görüşlərin ən fəal iştirakçısı Gülnar Xəlilova da layihə ilə bağlı fikirlərini bölüşüb, bu layihənin onun dünyagörüşündə, ədəbiyyata, poeziyaya münasibətdən müsbət təsir göstərdiyini vurğulayıb. Layihədə qonaq olmuş ziyalıların məsləhət bildiyi əsərlərin əksəriyyətini oxuduğunu, digərlərini isə artıq mütaliə etməyə başladığını deyən G.Xəlilova özü isə gənclərə bədii kitablardan əlavə, qəzet və jurnalları, dövri mətbuatı da yaxından izləməyi tövsiyə edib.

Sonda iki ay müddətində layihədə iştirak edən gənclərə diplom və müxtəlif hədiyyələr təqdim olunub.

Şahanə MÜŞFİQ

525-ci qəzet 2017.- 28 noyabr.- S.7.