Aprel şəhidləri

Bizi ilk qarşılayan

Aprel şəhidləriydi,

Bu Cocuq Mərcanlının

Ən müqəddəs yeriydi.

Ayağına gül qoyduq

Şəklinə baş əydik.

Ay oğul, təki belə

Toyunuza gələydik.

Daim gənc qalarsınız

Göz aydın, üzü gülər,

Daim ayağınızı

Öpəcək qızılgüllər.

Əsgər gedən oğullar

Burdan gedər döyüşə.

Sevən yaşıdlarınız

Bura gələr görüşə.

Gələnlər gedəcəklər

Kimi ucalacaqdı,

Kimi qocalacaqdı,

Kimi zəfər çalacaq!

Düşməndən intiqamı

Dönə-dönə alacaq!

Aprel döyüşçüləri

Belə cavan qalacaq.

Onlar zamandan güclü,

Dövrandan üstündülər.

Onlar gecə aydılar.

Gündüzlər də gündülər...

Eh... Bunlar hamısı sözdü,

Şəhidlər ölümsüzdü!

Şuşa Məscidi

Cocuq Mərcanlıya

Şuşadan qonaq gəlib.

Cocuq Mərcanlının ağ gününə.

Geyinib dümağ gəlib.

Şuşanın məscidi namaza durub.

Əllərini Allah dərgahına qaldırıb.

Qarabağa azadlıq diləyir.

“Allahım, köməyimiz ol” - deyir.

Azanın səsi

Haqqın qapısını döyür.

Məscid onun üzüdü,

İçi insan içidi.

Bu Şuşadakı Məscidin özüdü,

Əsgərlərimizə gəlmiş elçidi.

Gəlin bizi alın! - deyir.

Gəlin zəfər çalın! - deyir.

Azərbaycanın ən uca Şuşa səhnəsindən,

“Qarabağ Şikəstəsi”nin səsindən

Ən uca zənguləsindən

Yadları salın!

Qarabağı alın! - deyir.

Məsciddə görüş

Ruhu titrədən bir görüşdü.

Ordumuz ayağa qalxsa

Şimşək kimi çaxsa

Ordumuz üçün ən asan iş döyüşdü .

Qalanını tarix yazır.

Hər azərbaycanlının içində

Bir əsgər var

Döyüşə hazır!

Yaman olur

Havadan, sudan, çöldən

Gözəllik ətri gəlir.

Qızılgüllər titrəyir

Əlvan ləçəklər gülür.

Bu gözəllik qoynuna

Tanrı nuru tökülür...

Sevincdən gözüm dolur.

lll

Şirin dil son hədd ola

İnsanlar arasında.

Ölkələr arasında

Qızılgül sərhəd ola...

Yar həsrəti-hicranı

Ən çəkilməz dərd ola...

İnsanlar mələk olur.

lll

Beşiyim, məzarımsan

Ana torpağım mənim.

Qəlbin qəlbimdə vurur

Ay Qarabağım mənim.

Bülbüllər yetişdirən

Havam, bulağım mənim.

Görürəm rəngin solur.

lll

Səni belə görəndə

Tufan olur, qan olur.

Hirsim qaynayıb daşır,

Səbrim ilə savaşır.

Bizə döyüş yaraşır,

Bizə zəfər yaraşır.

Hikkəm başımdan aşır

Ruhum dağa dırmaşır,

Varlığım tufan olur.

Xalq bu həddə gələndə

İntiqam yaman olur.

Biz Cocuq Mərcanlılıyıq

Dağlı eniş-yoxuşlu,

Torpaqlı, daşlı, quşlu,

Ağaclı - vətəndaşlı

Hamımız bir canlıyıq.

Biz Cocuq Mərcanlılıyıq.

lll

Yollar qəddi, ütülü,

Bulaq-sükut bülbülü,

Şehli bağların gülü -

- Qəlbi həyəcanlıyıq.

Biz Cocuq Mərcanlılıyıq.

lll

Körpədən son yaşacan,

Lap ayaqdan-başacan.

Ey böyük Azərbaycan

Hamımız bir canlıyıq!

Biz Cocuq Mərcanlılıyıq.

Lələtəpə

Dədəm Qorqudun dövründə

Laləli bir təpə idim.

Sonradan lələ olmuşam,

Bir Lələtəpə olmuşam.

Başımın üstündə Allah,

Əlimdə üç rəngli bayraq.

Gecə, gündüz, axşam, sabah,

Ana yurda keşikçiyəm.

Xalqın dağ olmuş səsiyəm,

Mən igidlər nərəsiyəm.

Mən lələlər lələsiyəm.

Məktəblərin zəng səsiyəm.

Dağam, dağlar balasıyam.

Mərcanlılar qalasıyam

Hələ mənim çox işim var

Çox zəfərlər çalasıyam.

Yurdun Lələ dayağıyam,

Elin Lələ bayrağıyam,

Əsgərlərin səngəriyəm,

Düşmənlərə göz dağıyam.

Birinci sinfə ikinci dəfə Cocuq Mərcanlıda getdim

Birinci sinifdəyik

Mən və sinif yoldaşım.

Onun yeddi yaşı var,

Mənim səksən üç yaşım.

Onun ilə söhbətə

Bərk qarışmışdı başım.

Müəllimə dedi:

- Yaxşı!

Siz sakit olun bir az.

Dərsdə danışmaq olmaz.

Mən tez kəsdim sözümü,

Yığışdırdım özümü.

Sinif dostum soruşdu:

- Sən də qorxursan ondan?

- Mən qorxuram qanundan.

- Qanun kimdi, ay dayı?

- Hamı ona tabedi

Səndən, məndən savayı.

- Niyə o bizə dəymir?

- Sənin yaşın çox azdı,

Mənim yaşım lap çoxdu.

Bizi əsgər qoruyur

Heç bir qorxumuz yoxdu...

Səidə qızıma

(Mahnı mətni)

Quliyeva Səidə Allahqulu qızı Bakıda rahat evini qoyub, könüllü Cocuq Mərcanlıya gedib. Orta məktəbdə işləyir. O, ürəyinin çağırışına əməl edib. Hər ürəkdə belə çağırış olmur. Ürəkdə belə istək olsa da, hər adam cəsarət edib Bakıda rahat evini qoyub, düşməndən yeni alınıb, yeni salınmış Cocuq Mərcanlı qəsəbəsinə işləməyə, yaşamağa gedə bilməz. Bunun üçün ürəkdə istəkdən başqa qeyrət, təpər, alovlu vətənpərvərlik, vətəni əsl Leylinin Məcnuna olan məhəbbəti kimi bir İlahi məhəbbət olmalıdır. Səidə qızımızda o var. Qızın özü də bilmir ki, qəhrəmanlıq elə buna deyirlər.

Səni vətənin çağırdı.

Səs qəlbində ağrıdı.

A qeyrətli qızım mənim,

Şir ürəkli quzum mənim.

Qoy tanısın el səni də,

Səidə, ay Səidə.

lll

Kitabların sirdaşısan,

Hamının qız qardaşısan.

Özündən xəbərin yoxdu,

Sən özündən də yaxşısan.

Qəlbin günəşdir sinəndə,

Səidə, ay Səidə.

lll

Mərcanlıda cocuqlara

Şirin nağıl olacaqsan.

Evdə bacı olacaqsan ,

Çöldə oğul olacaqsan.

Adın nəğmədir sənin də,

Səidə, ay Səidə.

lll

Başdan-ayağa hünərsən,

Odlar qızı igid ərsən.

İnanıram ilk imkanda

Şuşaya da sən gedərsən,

Olacaqsan orda sən də,

Səidə, ay Səidə.

Fikrət QOCA

525-ci qəzet.- 2017.- 21 oktyabr.- S.17.