Rafiq Babayevin 80 illiyi konsertlə qeyd edildi

Oktyabrın 23-də "Landmark"da görkəmli caz ifaçısı, Xalq artisti Rafiq Babayevin 80 illiyi münasibətilə konsert olub.

AZƏRTAC xəbər verir ki, Bakı Beynəlxalq Caz Festivalı çərçivəsində təqdim edilən konsertdə "Azəri Jazz" musiqi qrupu müxtəlif klassik caz ifaları ilə sənətsevərlərin görüşünə gəlib.

Konsertdən öncə Xalq artisti Oqtay Mirqasımov və sənətkarın qızı Fərizə Babayeva çıxış ediblər.

Bildirilib ki, Rafiq Babayev Bakıda musiqiçi ailəsində dünyaya göz açıb, musiqi təhsilinin bütün pillələrində uğur qazanıb. Caz musiqisinə böyük həvəsi, improvizasiya bacarığı, ailədən gələn musiqiçi istedadı, sanki bu gəncin həyat yolunu müəyyən edirdi. Təhsilini başa vurduqdan sonra özünün caz-instrumental qrupunu yaradan Rafiq Babayev SSRİ turnesinə çıxır, bir sıra caz festivallarının laureatı olur. 1965-ci ildə o, öz caz kvartetinin və Teymur Mirzəyevin Bakı vokal kvintetinin birləşməsi nəticəsində yaranmış "Qaya" caz vokal instrumental ansamblının musiqi rəhbəri təyin edilib. Musiqiçi 1978-ci ildə Azərbaycan SSR-in Əməkdar artisti, 1993-cü ildə isə müstəqil Azərbaycanın Xalq artisti adlarına layiq görülüb. Milli musiqini cazla sintez edərək ona yeni nəfəs verən istedadlı bəstəkar 20-dən çox bədii və sənədli ekran əsərinə, həmçinin cizgi filminə musiqi bəstələyib.

Çıxışlarda vurğulanıb ki, Xalq artisti, cazmen, pianoçu Rafiq Babayevin adını xatırlamamaq mümkün deyil. O, ayrı-ayrı vaxtlarda Mahnı Teatrının musiqi rəhbəri, estrada-simfonik orkestrinin bədii rəhbəri və dirijoru kimi çalışıb. Yaratdığı musiqi kollektivlərində gənc və istedadlı musiqiçilərin üzə çıxması üçün əlindən gələni əsirgəməyib. Həyat yolu milli musiqimizin Rəşid Behbudov, Vaqif Mustafazadə, Müslüm Maqomayev kimi görkəmli simaları ilə kəsişən Rafiq Babayevin hərtərəfli şəxsiyyəti mədəniyyətimizdə dərin iz qoymaqla yanaşı, yeni musiqiçilər nəslinin nümayəndələri üçün də ilham mənbəyidir. 1993-cü ildə çəkilmiş "Təhminə və Zaur" filminin saundtreki olan "Əlvida" kompozisiyası sonralar bir sıra müğənnilər tərəfindən oxunsa da, Rafiq Babayevin ifasında təkrarolunmazlıq qazanıb.

Tədbir konsert proqramı ilə davam edib. Bir qrup azərbaycanlı gənc cazmenin ifası alqışlarla qarşılanıb. Konsertdə klassik və müasir caz musiqisi, eləcə də dünya caz musiqisindən hit nömrələr təqdim olunub. Gecədə gənc ifaçılarla yanaşı, tanınmış cazmen Cavan Zeynallı da çıxış edib.

Braziliyada Türk və Latın Amerikası mədəniyyəti bir araya gəlib

Oktyabrın 23-də Braziliyada Beynəlxalq Türk Mədəniyyəti və İrsi Fondu, TÜRKSOY-un dəstəyi, Azərbaycan, Türkiyə və Qazaxıstanın Braziliyadakı səfirliklərinin, Braziliya Federativ Respublikasının Milli Konqresinin Federal Senatının təşkilatçılığı ilə "Türk və Latın Amerikası mədəniyyəti, tarixi və ənənələrinə kontinental, regional, elmi yanaşma" mövzusunda konfrans keçirilib.

Tədbirdə öncə Türkiyənin Braziliyakı səfiri Əli Qaya Savut, Azərbaycanın Braziliyadakı səfiri Elxan Poluxov, Qazaxıstanın Braziliya üzrə səfiri Kairat Sarzhanovun məruzələri dinlənilib.

Daha sonra senator Kristomas Rikardo Kavalkanti Buark çıxış edərək qeyd edib ki, qədim türk mədəniyyəti müasir cəmiyyətin formalaşmasında əvəzsiz rol oynayıb.

Konfransda Beynəlxalq Türk Mədəniyyəti və İrsi Fondunun prezidenti Günay Əfəndiyeva mədəniyyətlərarası və qitələrarası dialoqda rəhbərlik etdiyi Fondun rolundan danışıb, Latın Amerikası və türk mədəniyyətləri arasında qarşılıqlı əməkdaşlıqdan söz açıb. Bildirib ki, qədim köklərə mənsub olan türk xalqlarının ən böyük xəzinəsi zəngin ortaq keçmişi, tarixi, mədəniyyəti, adət-ənənəsidir. Bu xəzinənin qorunması və dünyaya tanıdılması Fondun qarşısında dayanan əsas prioritetlərdəndir.

Konfransda AMEA-nın Şərqşünaslıq İnstitutunun direktor müavini, akademik Şahin Mustafayev "Türk xalqlarının qərbə köçü" və TÜRKSOY-un Baş katibinin müavini Firat Purtaş "TÜRKSOY və Mədəni diplomatiyası" mövzusunda çıxış ediblər.

Konfransın bədii hissəsində Azərbaycan, Türkiyə və Qazaxıstan musiqiçilərinin ifasında geniş konsert proqramı təqdim olunub. Azərbaycanı kamança ifaçısı Şəhriyar Musayev təmsil edib.

Konfrans çərçivəsində Parlamentin sərgi zalında "Braziliyada türk irsi" mövzusunda fotosərgi açılıb. Sərgi noyabrın 3-dək davam edəcək.

525-ci qəzet.- 2017.- 25 oktyabr.- S.7.