Sağ ol, professor!

(Şeir)

Səni vəsf edirəm bu nəğməmdə mən,

Əsl gözəlliyi sevib-duyan dost!

İlk həyat nurunu Tovuzda görən -

Bütöv Azərbaycan arzulayan dost!

Yoxdur ehtiyacın, zərrəcə meylin

Minnətli tərifə, yersiz alqışa;

Tərəqqi, inkişaf - qayən, əməlin,

Sağ ol, professor Qəzənfər Paşa!

Bakıdan səmimi salam aparıb,

Bayatı, xatirə, kəlam aparıb,

Kərkük mahnısıyla dönübsən geri;

Daim yollardasan o vaxtdan bəri.

...Köçdü Əbdüllətif əbədiyyətə -

Çevrilib səməndər adlanan quşa;

Dözüm arzuladın dərdli millətə,

Sağ ol, professor Qəzənfər Paşa!

Beş əsr sonradan söz-söhbət açıb

Məşhur qəhrəmanının Nostradamus.

İşğal, amansızlıq həddini aşıb,

Qonşuda nə ar var, nə həya-namus!

Yalnız özümüzə ümid bəsləyir

Qubadlı, Zəngilan, Kəlbəcər, Şuşa...

Əlini sıxdığın əsgər də deyir:

Sağ ol, professor Qəzənfər Paşa!

Həsrət ayırmasın yarı-yarından,

Qoruyaq düzlüyü pisdən, harından.

"Ovqat"a baxırdıq - xoşumuz gəldi

Mənalı nitqindən, cavablarından.

Dərsin - mədəniyyət, maarif, bilik...

Vüsal meyvələri dərərək yaşa!

Hələ qabaqdadır xeyli onillik,

Sağ ol, professor Qəzənfər Paşa!

20.04.2008

Oqtay RZA

Əməkdar müəllim

525-ci qəzet.- 2017.- 26 sentyabr.- S.8.