"Qarabağ Muğam Mərkəzinin konsert proqramları maraqla qarşılanır"

Yola saldığımız il Üzeyir Hacıbəyli adına Qarabağ Muğam Mərkəzinin fəaliyyətində uğurlu illərdən hesab olunur.

Mərkəzin direktoru Tofiq Cəfərovun dediklərinə görə, kollektiv həmin dövrdə Qarabağ regionun mədəni həyatının canlanmasında, muğam ifaçılıq sənətinin daha da inkişaf etdirilməsində önəmli rol oynayıb.

Muğam Mərkəzinin müəllim və şagirdləri bölgələrdə keçirilən mədəni-kütləvi tədbirlərdə, cəbhəyanı ərazilərdə, hərbi hissələrdə təşkil olunan konsertlərdə, müxtəlif muğam müsabiqələrində, musiqi festivallarında yaxından iştirak ediblər.

Respublikanın digər bölgələrində də fəaliyyəti ilə yaxşı tanınan kollektiv Mədəniyyət və Turizm Nazirliyinin tapşırığına əsasən, Beyləqan, Zərdab, İmişli və Yevlax rayon mədəniyyət mərkəzlərində "Muğam dünyamız" adlı konsert proqramı ilə çıxışlar təşkil edib. Bu cür tədbirlərin yaxın vaxtlarda digər rayonlarda da keçirilməsi nəzərdə tutulub.

T.Cəfərov deyir ki, ötən il Muğam Mərkəzinin yetirmələri ciddi uğurlara imza atıblar. Mərkəzin şagirdi Ceyhunə Şirəliyeva Xan Şuşinski adına III respublika muğam festivalında 3-cü yeri tutaraq, xüsusi medal və diplomla təltif olunub.

Həmin müsabiqədə fəal iştirak etdiklərinə görə digər şagirdlər- Nəcibə Məmmədova, Nərmin Sultanova və Zəhra Məmmədova isə fəxri fərmanlara layiq görülüblər. Bundan əlavə, Gənclər Fondunun dəstəyi ilə təşkil olunan müsabiqədə Mərkəzin 6 nəfər şagirdi uğur qazanıb. Onlardan 3 nəfəri, Ceyhunə Şirəliyeva, Zəhra Məmmədova və Nərmin Sultanova ilk üç fəxri yeri tutaraq, xüsusi diplomlarla mükafatlandırılıb, 3 nəfər isə fəxri fərmanlarla təltif olunub.İfaçıların peçəkarlıq və səhnə mədəniyyəti səviyyəsinin artması münsiflər heyəti tərəfindən xüsusi qeyd olunub.

Yəhya PAŞAZADƏ

525-ci qəzet.- 2017.- 10 yanvar.- S. 8.