"Dünyamızın zərrəsiyəm..."

SİYƏZƏNLİ ŞAİR NƏCMƏDDİN MÜRVƏTOVUN OXUCULARA YENİ TÖHFƏSİ

Nəcməddin Mürvətov əyalətdə - Siyəzən şəhərində yaşasa da, imzası yetərincə tanınan qələm adamıdır.

Vaxtaşırı kitabları çap edilir, dəfələrlə televiziyaların ədəbi proqramlarının qonağı olub. Şair oxucularla müntəzəm ünsiyyətdədir, vaxtaşırı, kitabları ilə onların görüşünə gəlir. Yazıçı-publisist Sadıq Elcanlı bir neçə il bundan qabaq onun haqqında bir essesində ürək açıqlığı ilə belə yazırdı: "O, riyaziyyatçıdır.

"Riyaziyyat bütün elmlərin şahıdır" (K.Quss) həqiqətinə inanır, belə bir inamla həqiqət axtara-axtara Əlahəzrət poeziyanın hüzuruna gəlib çıxıb. Kitablarından biri belə adlanır: "Həqiqətə inanıram". Həmin kitaba "Ən böyük həqiqət poeziyadır" adlı önsöz yazan şair dostum Musa Ələkbərlinin bu sözlərinə mən də şərikəm ki, "Nəcməddin Mürvətovun lirik "mən"i üçün dünyanın dayaq, istinad nöqtəsi haqq və ədalətdir. Əgər dünya ədalətə söykənmirsə, onda fəlakət qaçılmazdır".

N.Mürvətovun bu yaxınlarda "Şur" nəşriyyatında "Dünyamızın zərrəsiyəm..." adlı yeni - 13-cü kitabı işıq üzü görüb. Kitabın redaktoru və "Hər zərrənin öz işığı" adlı geniş önsözün müəllifi Əli Rza Xələfli haqlı olaraq qeyd edir ki: "...Şair Nəcməddin kifayət qədər yaradıcılıq yolu keçib. Sözün qazanında çox qaynayıb bişmiş, özünün yolunu tapmış, özünü ifadə üçün müəyyən formada sabitləşmişdir".

Kitabda cəmlənən, janr, üslub və mövzu baxımından rəngarəng şeirlər şairin yaradıcılığı barədə dolğun təəssürat oyadır. Həyat, dünya, insan, sevgi, təbiət, yurd yanğısı, övlad məhəbbəti - bir sözlə, insanı və şair olan kimsəni düşündürəcək, narahat edəcək mövzular bu kitabdakı şeirlərdə öz poetik ifadəsini tapıb.

Ancaq N.Mürvətovun şeirlərində Vətənə məhəbbət - vətənpərvərlik başlıca yer tutur:

Xəzərdən üzü Dübrara,

Təbim coşar, baxsam hara,

Mən vurğunam bu diyara,

Artır qəlbdə odum, közüm,

Siyəzənim - şirin sözüm.

("Siyəzən")

Şair üçün Vətən təkcə doğulub boya-başa çatdığı doğma Siyəzən torpağı deyil, doğma Azərbaycanın hər qarışı, hər bucağıdır:

Bu da ata ocağı, şairin ana beşiyi Ələz kəndinin vəsfi:

Dərələrin qırış qoyub üzünə,

Köndələnə, əyriş-üyrüş, düzünə.

Seli daşır, qulaq asmır sözünə,

Çəkir sənə nəm tumarı, Ələzim.

Yaşadığımız dövranın müasir gerçəkləri, insan və onun mənəvi dünyası - insan amili, bax, bunlar da şairin yaradıcılığında mühüm yer tutan mövzularındandır.

Məni məndən xəbər alma, sorma, yox,

Haralıyam, kiməm, nəyəm, nəçiyəm,

Dünyamızdan iddiam da deyil çox,

Onun xırda zərrəsiyəm, "heç"iyəm.

("Zərrəyəm")

Kitabda Nəcməddin Mürvətovun klassik janra - qəzələ yaxın tərzdə, onunla səsləşən intonasiya ilə yazdığı şeirlər də var. Bu nümunələr də xeyli maraq doğurur. Əbədi və əzəli eşqi tərənnüm edən şair bəzi qəzəllərində həyata, dünyaya, insanlara, cəmiyyətə baxışlarını oxucuları ilə bölüşür. Belə şeirlərin birində şair - sənətkar portreti poetik dəqiqliklə cızılıb:

Şairdən qəlbə dəyən kəlmə,

inan, görməzsən,

Onun tək doğma, yaxın,

dərdə yanan görməzsən...

"Düşüncələr" bölümündə toplanan esselərində müəllif ictimai, fəlsəfi, düşüncələrini, milli-mənəvi dünyamız, saflıq, düzlük, halallıq, vətəndaşlıq borcu kimi dəyərlərimiz haqqında mülahizələrini bölüşür.

Qeyd etdiyimiz kimi, Nəcməddin Mürvətov ixtisasca riyaziyyat müəllimidir. Uzun illərdir ki, Siyəzəndə pedaqoji fəaliyyətlə məşğuldur. Pedaqoq kimi fəaliyyəti dövlət tərəfindən layiqincə qiymətləndirilib.

"Tərəqqi" medalına layiq görülüb. Əməkdar müəllim kimi yüksək fəxri ad alıb. Şair kimi isə onun yaradıcılığına qiyməti, əlbəttə, oxucuları verəcək!

Aydın TAĞIYEV

525-ci qəzet.- 2017.- 31 yanvar.- S.7.