"Mən kökümlə bu torpağa bağlıyam..."

İSRAİLDƏ ÇALIŞAN BACARIQLI HƏKİM İLQAR ƏZMƏMMƏDOV DOĞMA AZƏRBAYCANA ÖVLADLIQ BORCUNU ƏSLA UNUTMUR

Aydın TAĞIYEV

Doğma Azərbaycanımızın bir yurd yeri də bizim Şabran bölgəsidir. Qədim Şirvanın ulu və şanlı tarixə malik Şabran torpağına qədəm qoyan hər kəs ilk əvvəl bu torpağın hər qarışından boy verib görünən əsrlərin yadigarı, yaşı 3-5 əsrlərə gedib çıxan əzəmətli Çıraqqalanı görər. Tədqiqatçılar qədim Şabran şəhərinin tarixini eramızın 2-ci əsrləri ilə bağlayırlar.

Yeri-yurdu tanıdan həmişə onun övladları olub. Qədim Yunanıstanda həkimlik peşəsinin adı “həyat keşikçisi, həyat müdafiəçisi" demək imiş. Ulu, şərəfli bir tarixə malik qədim Şabran həm də doğma Azərbaycanımıza "Həyat keşikçisi, həyat müdafiəçisi" bəxş etmiş bir torpaqdır.

Ötən əsrin əvvəllərində ilk azərbaycanlı həkimlərdən biri də Şabranın Pirəbədil kəndində doğulub boya-başa çatmış, Kiyev Universitetinin tibb fakultəsinin məzunu Qəzənfər Musabəyov idi. Uzun müddət respublikamızın baş uşaq cərrahı olmuş tibb elmləri doktoru, professor Əliağa Əlizadə də bu torpağın oğlu idi. Tibb elmləri doktoru, professor Ziyəddin Əfəndiyevin özü ilə yanaşı, oğlu İbrahimin, qızları Mahirə, Teyyubə xanımların adları da ölkəmizdə adlı-sanlı həkimlər kimi yaxşı tanışdır.

Tibb elmləri doktorları - Ariz Xəlilov və Emin Cavadovla da şabranlılar bir həmyerli kimi qürur duyurlar.

Bizimsə söhbətimiz 2015-ci ildən İsraildə İbrani Universitetinin "Hadassa" tibb fakultəsinin eyniadlı klinikasında İnvaziv-kardioloq kimi fəaliyyət göstərən 31 yaşlı həmyerlimiz İlqar Tahir oğlu Əzməmmədov haqqındadır.

İlqar həkim haqqında söz açmazdan əvvəl bəri başdan burasını da deyək ki, həmyerlimizin çalışdığı müalicə ocağı dünyada kardiologiya sahəsində ABŞ və Yaponiyadan sonra ixtisaslaşmış ən güclü üçüncü klinikadır. Ürəklə bağlı əksər yeni elmi kəşflər bu klinikada qeydə alınır. Bu klinikada dünyanın 30 ölkəsindən adlı-sanlı həkim briqadası çalışır. Həmyerlimiz onların arasında yeganə azərbaycanlıdır. Ən ağır ürək-damar xəstələri bu klinikada müalicə olunur. Burasını da deyək ki, İbrani universitetinin qurucularından biri də Albert Eynşteyn olub.

Qədimlərdə həkimlərin peşə emblemi " çıraq - şölənən şam" idi. Müəyyən dövr keçdikdən sonra bu etiket "Əlində ürək tutan qadın", hazırda isə "Piyaləyə zəhər tökən ilandır". Əlbəttə, bunların hər birinin öz rəmzi mənası var.

Həkimlərin emblemi "şölənən şam" olan vaxtlarda bu simvol latın dilində belə bir cümlə ilə izah olunurdu: “Aliis inserviendo, consumor" - yəni ki, "özgələr üçün yanarkən özüm də yanıram"...

Bu da dünyaca məşhur cərrah Mustafa bəy Topçubaşovun sözləridir: “Hər birimiz bir şam işığı qədər işıq verə bilsək, planetimizin günəşə ehtiyacı qalmaz".

Bax, sözümü uzaqdan başlayıb haqqımda danışmaq üçün mətləbə keçdiyim həmyerlimiz İlqar Əzməmmədov da öz peşəsinə bağlı belə bir həkim, belə bir fədakar peşə sahibidir. Yaşca xeyli cavan olsa da, tanınmış vətən övladlarındandır.

İlqar dünyaya Rusiyada gəlsə də, uşaqlığı ata-baba yurdu doğma Şabranda, keçmiş Dəvəçi şəhərinin Güləmli adlı məhəlləsindəkeçib. İlk təhsilini doğma kəndində alıb. Orta məktəbi qurtardıqdan sonra 2004-2010-cu illərdə qardaş Türkiyənin Samsun şəhərindəki "19 Mayıs" Universitetinin tibb fakültəsində oxuyub. Təhsilini başa vurduqdan sonra 2011-2015-ci illərdə oradakı "Samsun Medikana" xəstəxanasında kardioloq işləyib.

2015-ci ildən isə ingilis və ibrani dillərindən nəzəri və praktiki üsullarla imtahan olunandan sonra İsrail dövlətindəki İbrani Universitetinin "Hadassa" tibb fakultəsinin eyniadlı klinikasında invaziv (ürəyi açmadan ürək damarlarındakı problemi aradan qaldırmaq) kardioloq kimi fəaliyyət göstərir.

Vətəndən uzaqlarda yaşayıb çalışan həmyerlimiz İlqar həkimin bu misra dilinin əzbəridir: "Mən kökümlə bu torpağa bağlıyam..." Bu misranı təkcə şeir, sənət vurğunu kimi əzbərləməyib. İlqar həkim böyüyüb boya-başa çatdığı doğma Şabrana, vətəni Azərbaycana ürəkdən bağlıdır. Çalışdığı klinikaya, dediyi kimi, Azərbaycandan da müraciətlər olur. Bu zaman İlqar həkim həmyerlilərinə əlindən gələn, bacara bildiyi köməkliyi əsirgəmir. Dediyinə görə, buradakı qiymətlər bəzən Azərbaycandan gələn xəstələrə münasib olmaya bilər. Bu zaman o, həmyerliləri olan belə xəstələri Türkiyədə, Samsun şəhərindəki klinikada qəbul edir.

İlqar həkim qürurla burasını da deyir ki, Azərbaycan səhiyyəsində kardiologiya ən inkişaf etmiş sahələrdən biridir. Bu sahəyə qısa müddətdə peşəkarlaşan və xarici təcrübəyə əsaslanaraq çalışan çoxlu sayda mütəxəssislərimiz var. Bir sözlə, respublikamızda kardiologiya sahəsi demək olar ki, dünya təcrübəsi ilə ayaqlaşacaq səviyyədədir.

Kökü ilə doğma Azərbaycana bağlı olan İlqar həkimin əlbəttə ki, ən böyük arzusu öz vətənində çalışmaq, xalqına xidmət etməkdir. İlqar burasını da yaxşı bilir ki, öz xalqına, ölkəsinə xidmət təkcə vətəndə yaşayıb çalışmaqdan ibarət deyildir. Vətəndən uzaqlarda öz istedadı və savadı, bacarığı ilə tanınmaq, ad-san qazanmaq, Azərbaycanın adını tanıtmaq da elə vətənə xidmətdir. İstər İsraildə, istərsə də Türkiyədə doğma respublikamızla bağlı müxtəlif ictimai-siyasi, sosial, mədəni-kütləvi tədbirlərdə fəal iştirakını da İlqar həkim vətənə övladlıq borcu bilir.

525-ci qəzet 2018.- 3 aprel.- S.8.