Yunus Oğuz “Ovçu” romanını təqdim etdi

Dünən “Olaylar” İnformasiya Agentliyinin və eyniadlı qəzetin təsisçisi, tarixçi, publisist Yunus Oğuzun “Ovçu” adlı tarixi romanının təqdimat mərasimi keçirilib.

Tədbiri giriş sözü ilə millət vəkili, akademik Nizami Cəfərov açıb: “Bildiyiniz kimi, Yunus Oğuz bu vaxtadək bir çox tarixi romanlarını yazaraq təqdim edib. Bu gün də təqdimatını etdiyi “Ovçu” adlı tarixi romanı kitablarının ən yaxşısıdır. Onun tarixi kitablarının hamısında dəqiq faktlar var. Bu kitab 2016-cı ildə baş vermiş aprel döyüşlərinə həsr olunub. Bu kitabı ərsəyə gətirdiyinə görə ona təşəkkür edirik”.

YAP Siyasi Şurasının üzvü, Prezident Administrasiyası ictimai-siyasi şöbəsinin disporla iş üzrə sektor müdiri Qafar Əliyev 2016-cı ilin aprel döyüşlərindən danışıb: “2016-cı ildə baş vermiş aprel döyüşləri Azərbaycan tarixində qızıl hərflərlə yazıldı. Azərbaycan ordusu həmin döyüşlərdən sonra bir daha bütün dünyaya sübut etdi ki, çox güclü dövlətdir. Aprel döyüşləri beynalxalq hadisə oldu. Bu hadisəyə Avropa ölkələrindən də reaksiya var idi. Həmin hadisələrlə bağlı “Ovçu” tarixi romanını yaradan Yunus Oğuza da təşəkkür edirəm. Vətənpərvərlik mövzusunda bu kimi kitabların çox olması təqdirəlayiq addımdır. İstərdim ki, bu kitab başqa dillərə də tərcümə olunsun”.

Təqdim olunan romanı həm ədəbiyyat, həm də tariximiz üçün dəyərli əsər adlandıran Mətbuat Şurasının sədri, millət vəkili Əflatun Amaşov kitab haqqında fikirlərini bölüşüb: “Bu gün Yunus Oğuzun təqdim etdiyi “Ovçu” adlı tarixi romanda həqiqətlər əks olunub. Bu kitab 2016-cı ildə baş vermiş aprel döyüşlərindən bəhs edir. Həmin hadisələr milli şüurumuzu yenidən oyatdı. Bir çox ölkələrin Azərbaycan olan münasibətləri müsbətə doğru dəyişdi. Yunus Oğuza belə bir dəyərli kitab yazdığına görə təşəkkür edirəm. Ona uğurlar arzulayıram”.

Millət vəkili Qənirə Paşayeva deyib ki, Yunus Oğuzun yaradıcılığı zəngindir. Amma o, daha çox tarixi romanlara üstünlük verir. Bunun üçün ona təşəkkür edirəm. Çünki indiki Azərbaycan gənclərinə tarixi həqiqətləri romanlarla çatdırmaq çox önəmlidir. Təklif edirəm ki, “Ovçu” kitabı məktəb və universitetlərə paylansın. Bu kitabın əsasında ssenari hazırlansın və film, teleserial çəkilsin. Çünki bu romandakılar film, serial materiallarıdır. Bu bir reallıqdır ki, artıq dövrümüzdə kitabın gənclər üzərindəki təsiri filmin təsiri qədər deyil. Biz filmin bu gücündən istifadə etməliyik”.

Tədbirdə çıxış edən şəhid Murad Mirzəyevin atası Emil Mirzəyev tarixi romanı qələmə aldığı üçün Yunus Oğuza minnətdarlıq edib. Bildirib ki, Murad Mirzəyev haqqında bu cür əsərlərin yazılması onu və ailəsini ruhlandırır, oğlunun qəhrəmanlıqları ilə fəxr edirlər.

“525-ci qəzet”in baş redaktoru Rəşad Məcid isə bildirib ki, Yunus Oğuzun bu romanı Murad Mirzəyevin qəhrəmanlığı ilə yanaşı, bu qəhrəmanlığın səbəbini araşdırıb: “Yunus Oğuz tərəfindən bu çox gözəl bir cəhddir. Çünki uzun illər bizim yaddaşımızı silməyə çalışıblar. Aprel döyüşlərinə qədər bizə elə gəlirdi ki, bizim gənclərimiz şoulara meyillidir, yaddaşsızdır. Amma aprel döyüşləri göstərdi ki, bizim necə vətənpərvər gənclərimiz var. Demək bu ruh yaşayır. Bu ruhu nə qədər pozmağa çalışsalar da, əgər genində varsa, silmək mümkün deyil”.

Tədbir digər çıxışlarla davam edib. Sonda müəllif kitablarını qonaqlar üçün imzalayıb.

Şahanə MÜŞFİQ

525-ci qəzet.-2018.-7 aprel.-S.13.