Qara Qarayev Vaşinqtonda klassik musiqi gecəsilə anıldı

Vaşinqton kafedral kilsəsində ABŞ-da yaşayan azərbaycanlı orqançalan Cəmilə Cavadova-Spitzberqin konserti olub.

Vaşinqton kafedral kilsəsinin keşişi Bencamin Streyli tədbiri açaraq, tamaşaçılara Cəmilə Cavadova-Spitzberqin fəaliyyəti və Qara Qarayevin yaradıcılıq irsi barədə məlumat verib. Konsert proqramında Qərbin tanınmış klassik bəstəkarları Bax və Mendelsonun əsərləri ilə yanaşı, Azərbaycan bəstəkarlarının kompozisiyaları da səslənib. Vaşinqton auditoriyasına təqdim edilən əsərlər arasında Qara Qarayevin fortepiano prelüdlərinin professor Tahirə Yaqubova tərəfindən orqan üçün transkripsiyası və Vasif Adigözəlovun "Muğam-fantaziya" əsəri də səslənib.

Rəmzi məna daşıyan bu konsert görkəmli Azərbaycan bəstəkarı Qara Qarayevin 100 illiyi münasibətilə ABŞ-da nəzərdə tutulan proqramlar silsiləsinə daxildir. "Ernest M. Skinner və oğlu" şirkəti tərəfindən qurulmuş böyük kilsə orqanının könül oxşayan səsi və Cəmilə Cavadova-Spitzberqin çıxışı gurultulu alqışlarla qarşılanıb. Konsertdə yerli klassik musiqi həvəskarları ilə yanaşı, Azərbaycanın ABŞ-dakı səfiri Elin Süleymanov, diplomatik missiyanın əməkdaşları, ABŞ-dakı Azərbaycan icmasının Vaşinqtonda və onun ətrafında yaşayan üzvləri də iştirak edirdi.

Orqanda ifa üzrə doktorluq dərəcəsi almış ilk azərbaycanlı musiqiçi olan, hazırda ABŞ-ın Texas ştatındakı Arlinqton Dövlət Universitetində dərs deyən Cəmilə Cavadova-Spitzberq ABŞ-da, postsovet ölkələrində, habelə Hollandiya, Almaniya, Böyük Britaniya, Fransa, Danimarka və digər ölkələrdə konsert proqramları ilə çıxış edib. Onun təsis etdiyi "Azərbaycan-Amerika Musiqi Fondu" adlı qeyri-hökumət təşkilatı Azərbaycan klassik musiqisinin ABŞ-da təbliği ilə məşğuldur.

XƏDİCƏ

525-ci qəzet 2018.- 24 aprel.- S.7.