Beynəlxalq Kitab bağışlama Günü qeyd edildi

Dünən "Beynəlxalq kitab bağışlama günü" münasibətilə "Cahan" uşaq bağçasının balacaları Milli Kitabxananın qonağı olub, Milli Kitabxananın nəzdində fəaliyyət göstərən Açıq Kitabxanada "Beynəlxalq kitab bağışlama günü"nü qeyd ediblər.

Görüşdə balacalara kitablar hədiyyə olunub. Onlar da öz növbələrində Açıq Kitabxananın fonduna kitab hədiyyə ediblər. Müəllimə Fəttahova Nərmin burada keçirdikləri vaxtdan çox məmnun qalan balacalar adından Milli Kitabxananın rəhbərliyinə öz təşəkkürünü bildirib və uğurlar arzulayıb.

Bildirilib ki, "Beynəlxalq kitab bağışlama günü" uşaqlara kitab bağışlayan və onlarda kitaba məhəbbət yaradan bütün insanları birləşdirən bir gündür.

Qeyd edək ki, "Beynəlxalq kitab bağışlama günü" ("International Book Giving Day") 2012-ci ildə ABŞ-da tanınmış uşaq kitabı saytı -"Delightful Children's"in yaradıcısı Emmi Brodmurun təşəbbüsü ilə irəli sürülüb və ötən müddətdə sosial şəbəkələr vasitəsilə dünyada geniş dəstək qazanıb.

Nəsimi rayonundakı 35 nömrəli tam orta məktəbdə də 14 fevral - Beynəlxalq kitab bağışlama gününə həsr olunmuş "Hərəyə bir kitab" adlı tədbir keçirilib.

Tədbir F.Köçərli adına Respublika Uşaq Kitabxanası və 5 nömrəli Uşaq-Gənclər İnkişaf Mərkəzi ilə birgə reallaşdırılıb.

Bildirilib ki, tədbirin məqsədi gənc nəslə mədəni xidmət göstərmək və kiçik yaşlı oxuculara kitab bağışlamaqla onlarda kitaba və mütaliəyə olan məhəbbəti artırmaqdan ibarətdir.

Bu günün tarixi barədə məlumat verən natiqlər deyiblər ki, 2012-ci ildən qeyd edilən bu bayram ABŞ-da məşhur "Delightful Children's Books" uşaq kitabı saytının yaradıcısı Emmi Brodmoorun adı ilə bağlıdır. Bu ideyanı ona balaca oğlu verib.

Tədbirdə uşaq yazıçıları Gülzar İbrahimova, Qəşəm İsabəyli və başqaları uşaqlarla görüşərək onlara öz kitablarını hədiyyə ediblər.

Şahanə MÜŞFİQ

525-ci qəzet.- 2018.- 15 fevral.- S.8.