Kanadalı mütəxəssislər Azərbaycan Milli Kitabxanasında

İyul ayının 9-da Kanadanın Kvebek Milli Kitabxanası və Arxivinin yeni təyin edilmiş baş direktoru Jean Louis Roy və kitabxananın digər əməkdaşı Milli Kitabxanada olublar. Onlar Milli Kitabxananın direktoru Kərim Tahirov və Oxuculara xidmət işləri üzrə direktor müavini Ədibə İsmayılova ilə görüşüblər.

Qonaqlar Bakıda ilk dəfə olduqlarını vurğulayaraq şəhərimizi çox bəyəndiklərini xüsusi qeyd ediblər. J.L.Roy rəhbəri olduğu kitabxana haqqında ətraflı məlumat verib, daha sonra isə Azərbaycan Milli Kitabxanası haqqında onun maraqlandıran sualları direktora ünvanlayıb. K.Tahirov qonağı maraqlandıran sualları cavablandırıb və gələcəkdə Kvebek Milli Kitabxanası və Arxivi ilə ikitərəfli əməkdaşlığın yaranmasına ümid etdiyini bildirib.

Daha sonra J.L.Roy müəllifi olduğu iki kitabı professor Kərim Tahirova təqdim edib. Bu kitabların Milli Kitabxananın fondunda Kanadadan hədiyyə edilən ilk kitablar olduğu vurğulayan Kərim Tahirov onların kitabxananın fondunda öz layiqli yerini tutacağını deyib. O da öz növbəsində qonaqlara Milli Kitabxana haqqında olan üç dildə çap olunmuş "Azərbaycan Milli Kitabxanası. FotoAlbom" (Azərbaycan, ingilis və rus dillərində) kitabını təqdim edib.

Milli Kitabxananın nəzdində fəaliyyət göstərən Açıq Kitabxanada olan J.L.Roy bu kreativ layihəni çox bəyəndiklərini bildirib və bu layihə barədə və kitabxana haqqında öz xoş təəssüratlarını xatirə kitabına qeyd edib.

525-ci qəzet.-2018.- 10 iyul.- S.8.