Mədəniyyət Nazirliyində Çin nümayəndə heyəti ilə görüş

Mədəniyyət Nazirliyində Şenyanq Əyaləti Xalq Hökumətinin Xarici İşlər İdarəsinin Ölkədən Xaricdə Çin Məsələləri üzrə Şenyanq Ofisinin direktoru Vanq Jinqyinqin rəhbərlik etdiyi Çin nümayəndə heyəti ilə görüş keçirildi.

Görüşdə Azərbaycan – Çin mədəni əməkdaşlıq məsələləri barədə fikir mübadiləsi aparıldı, Şenyanq şəhəri ilə mədəni əlaqələrin inkişaf etdirilməsinə dair qarşılıqlı maraq ifadə olundu.

Nazirliyin Aparat rəhbərinin müavini, Beynəlxalq əməkdaşlıq və innovativ inkişaf şöbəsinin müdiri Vasif Eyvazzadə İki ölkə arasında mədəni əməkdaşlığa dair müvafiq müqavilə-hüquq bazasının mövcud olduğunu qeyd edərək “Azərbaycan Respublikasının Mədəniyyət Nazirliyi ilə Çin Xalq Respublikasının Mədəniyyət Nazirliyi arasında 2019-2022-ci illər üzrə mədəni əməkdaşlıq haqqında Protokol” layihəsinin imzalanması istiqamətində iş aparıldığını bildirdi. Sözügedən protokolun Azərbaycan ilə Çin və onun ayrı-ayrı regionları arasında əməkdaşlığa böyük töhfə verəcəyini qeyd etdi.

V.Eyvazzadə Çin və Azərbaycanın Ümumdünya İrs Komitəsinə üzv olduqlarını və təşkilat çərçivəsində six əməkdaşlıq əlaqələrinin qurulduğunu vurğuladı.

Şenyanqda Azərbaycan Mədəniyyət Mərkəzinin açılmasını təklif edən V.Jinqyinq bu istiqamətdə Şenyanq Əyaləti Hökumətinin bütün lazımi dəstəyi göstərməyə hazır olduğunu bildirdi. Mədəni əməkdaşlıq, xalqlararası anlaşma və mübadilənin genişləndirilməsi baxımından sözügedən məsələnin əhəmiyyəti qeyd olundu və müvafiq daxili mexanizmlər aydınlaşdırıldıqdan sonra Çin tərəfinə rəsmi rəy bildiriləcəyi diqqətə çatdırıldı.

Müşfiq, Şahanə.

525-ci qəzet.-2018.- 14 iyul.- S.13.