Prezidentin andiçmə mərasimindən ötən 100 gün hansı hadisələrlə yadda qaldı?

SON 15 İLDƏ PREZİDENT İLHAM ƏLİYEV SON DƏRƏCƏ MÜDRİK, UZAQGÖRƏN DÖVLƏT VƏ SİYASƏT ADAMI OLDUĞUNU NÜMAYİŞ ETDİRİB

Bu ilin aprel ayın 11-də Azərbaycanda növbəti - 8-ci prezident seçkiləri keçirildi. Azərbaycan növbədənkənar aprel seçkiləri ilə daha bir seçki prosesini geridə qoydu.

Budəfəki, alternativ əsaslarla, 8 nəfər namizədin iştirakı ilə keçirilən seçkilərdə yenə də son 3 seçkinin - 2003, 2008 və 2013-cü il seçkilərinin qalibi - hakim Yeni Azərbaycan Partiyasının (YAP) sədri və prezidentliyə namizədi İlham Heydər oğlu Əliyev parlaq qələbə qazandı.

O, 11 aprel seçkilərində də bütün rəqiblərini geridə qoyaraq, Azərbaycan xalqının mütləq əksəriyyətinin səsini qazandı və 86,02 faizlə yenidən - 4-cü dəfə Aərbaycan Respublikasının prezidenti seçildi.

Azərbaycan xalqı 1993-cü ilin yayından ölkədə davam Heydər Əliyev siyasətinə, bu siyasətin layiqli davamçısı İlham Əliyevə etimad göstərdi, növbəti dəfə ona ölkəyə rəhbərlik mandatı verdi.

Seçkilər ərəfəsində və səsvermə günündən sonra çeşidli planlar cızan, ssenarilər yazan bəzi dairələrin növbəti cəhdləri isə yenə baş tutmadı, bütün gözləntilər son 24-25 ildə olduğu kimi, fiaskoya, məhvə məhkum oldu. Bir sıra dairələr seçkilərin nəticələrinin tanınmayacağını, legitimlik probleminin yaranacağını, hətta ATƏT, Avropa Şurası parlament assambleyalarının müşahidə missiyalarının hesabatlarının bu prosesə necə dəyərlər, "siyasi-hüquqi baza" formalaşdıracağını zənn etsələr də, hər şey gözlədiklərinin əksinə oldu. Adıçəkilən qurumların birgə yaydıqları hesbatlarına rəğmən, onların ən üst qurum rəhbərlərindən - Avropa İttifaqı Şurasının prezidenti Donald Tusk, Avropa Şurasının baş katibi Torbyorn Yaqland və ATƏT rəhbərliyindən İlham Əliyevə təbrik məktubları gəlməyə başladı.

Eyni zamanda, təxminən eyni gündə dünyanın 3 nəhəng ölkəsinin liderindən - ABŞ prezidenti Donald Tramp, Rusiya prezidenti Vladimir Putin və Çin lideri Si Cinpindən arda-arda İlham Əliyevə ünvanlanmış təbrik məktubları gəldi. Hər 3 liderin təbrik məktubunda Azərbaycanla və onun lideri İlham Əliyevlə növbəti mərhələdə də əməkdaşlıqdan məmnunluq ifadə olundu. Bunun ardınca Fransa prezidenti Emmanuel Makron, Böyük Britaniya baş naziri Tereza Mey, Türkiyə przidenti Rəcəb Tayyib Ərdoğan, İran İslam Respublikasının prezidenti Həsəni Ruhani və digər dövlət başçıları tərəfindən ölkə prezidentinə ünvanlanan təbrik məktubları bir-birini əvəzlədi. Seçkilərdən cəmi 6 gün sonra -aprelin 17-də Konstitusiya Məhkəməsinin Plenumu 11 aprel seçkilərinin nəticələri ilə bağlı Mərkəzi Seçki Komissiyasının (MSK) protokolunun təsdiqlənməsi ilə bağlı qərar çıxardı və İlham Əliyev rəsmən 11 aprel seçkilərinin qalibi elan olundu. Onun səhərisi günü, aprelin 18-də Azərbaycan prezidenti İlham Əliyevin Milli Məclidə (MM) andiçmə mərasimi keçirildi və qeyd edək ki, bu, onun parlamentdə keçirilən ikinci andiçmə mərasimi idi. İ. Əliyev Azərbaycan Konstitusiyasına və "Quran"a əl basaraq and içdi və geniş nitq söylədi. Nitqində də bildirdi ki, həmişə Azərbaycan xalqının dəstəyini hiss edib və bu dəstək ona güc verir.

Bu gün, 26 iyul tarixində də bizləri seçkilərdən 107, dövlət başçısının and içərək, prezidentlik fəaliyyətinə başlamasından 100 gün ayırır. Bu yerdə xatırladaq ki, dünyanın bir çox dövlətlərində də prezidentin ilk 100 günü xüsusi önəm daşıyır. Prezidentlərin 100 günü deyilən bir termin də artıq siyasi leksikonda bərqərar olmaqda, oturuşmaqdadır. Bu baxımdan, ötən əsrin 90-cı ilərindən Azərbaycanda da prezidentin 100 günü məsələsi cəmiyyətin, medianın, siyasi kəsimin diqqət mərkəzində olan məsələlərdən birinə çevrilib. Bəs görəsən, dövlət başçısının 4-cü prezidentlik dönəminin ilk yüz günü nələrlə, hansı əlamətdar hadisələrlə yadda qaldı? Bu dövrdə cəmiyyətimizdə və ətrafımızda ölkəmizlə bağlı hansı önəmli məqamlar yaşandı?

Bu yöndə İ. Əliyev prezidentliyinin elə ilk günlərində, Konstitusiyanın ona verdiyi səlahiyyətlərdən istifadə edərək Artur Rasi-zadənin 22 ildən artıq bir dönəmdə rəhbərlik etdiyi Nazirlər Kabinetini istefaya göndərməsini qeyd etmək yerinə düşərdi. Andiçmə mərasimindən cəmi 3 gün sonra, aprelin 21-də ölkə prezidenti A.Razi-zadəyə Azərbaycan dövləti və dövlətçiliyi qarşısında xidmətlərinə görə minnətdarlıq ifadə etdi və Prezident Administrasiyası (PA) rəhbərinin müavini, son 21 il ərzində Administrasiyanın Xarici əlaqələr şöbəsinə rəhbərlik edən tanınmış dövlət xadimi Novruz Məmmədovun Azərbaycanın yeni baş naziri kimi təsdiqlənməsi ilə bağlı MM-ə məktub ünvanladı. Elə həmin gün, 21 aprel tarixində MM-in növbədənkənar iclasında N.Məmmədovun baş nazir vəzifəsinə namizədliyi təsdiqləndi. Bununla yanaşı, dövlət başçısının ötən 15 illik hakimiyyəti müddətində hər zaman böyük diqqət mərkəzində saxladığı Azərbaycan regionlarına növbəti səfərləri gerçəkləşdirildi. İ.Əliyev konkret olaraq, mayın 4-də Xızı və Xaçmaz, iyunun 5-də Goranboy və Naftalan rayonlarına, mayın 16-da Naxçıvan Muxtar Respublikasına səfərlər etdi və bir sıra önəmli obyektlərin açılışlarına qatıldı. Bununla bərabər, ölkə prezidentinin bu qısa müddətdə bir neçə aparıcı ölkəyə rəsmi və işgüzar səfərləri baş tutdu. Bu sırada onun aprelin 26-da Böyük Britaniyaya baş tutan səfərini, TANAP-ın açılış mərasimi ilə bağlı 12 iyun tarixli Türkiyə səfərini, bir çox yerli və xarici nüfuzlu siyasi mərkəzlər tərəfindən də antiazərbaycançı qüvvələr zəfər kimi qiymətləndirilən 10-13 iyul tarixli Brüssel səfərini və son, 19-20 iyul tarixlərində gerçəkləşdirilən Fransa səfərini qeyd etmək olar.

Həmçinin, qeyd edək ki, ötən yüz gün ərzində Azərbaycan dövləti və xalqının tarixində bəlkə də əsrlərlə yaddaşlardan silinməyəcək əlamətdar hadisələr yaşandı. Belə ki, mayın 28-də müstəqil Azərbaycan dövlətinin - Azərbaycan Xalq Cümhuriyyətinin (AXC) yaranmasının yüz illiyi rəsmi dövlət səviyyəsində qeyd olundu. Dövlət başçısı həmin gün təntənəli qəbul mərasimi keçirdi və çıxışında bir da Cümhuriyyət qurucularına öz ehtiramını ifadə etdi, "Azərbaycan dövləti Azərbaycan Xalq Cümhuriyyətinin qurucularının xatirəsinə böyük hörmətlə yanaşır..."-deyə vurğuladı. Həmin tarixi günün səhərisi - mayın 29-da daha bir tarixi anlara şahidlik edildi. Ölkə prezidentinin iştirakı ilə mayın 29-da nəinki regionun, bütövlükdə dünyanın enerji təhlükəsizliyində önəmli yerə malik olan Cənub Qaz Dəhlizinin (CDQ) Səngəçal terminalında rəsmi açılış mərasimi düzənləndi. İ. Əliyev çıxışında "Cənub Qaz Dəhlizinin rəsmi açılışı onu göstərir ki, biz qarşımıza qoyduğumuz bütün hədəflərə çatdıq və bu gün ölkəmizin həyatında neft-qaz sənayesinin inkişafında yeni dövr başlayır..." - dedi, bəyan etdi. Eyni zamanda, dövlət başçısının mayın 24-də imzaladığı növbəti əfv sərəncamı ilə daha 634 məhbus azadlığına qovuşdu.

İyunun 12-də isə Azərbaycan prezidenti Türkiyənin Əskişəhər şəhərində bir sıra dövlət başçılarının da qatıldığı, yəni TANAP - Trans-Anadolu qaz kəmərinin istifadəyə verilməsi münasibətilə təşkil edilmiş təntənəli mərasimdə iştirak etdi. TANAP-ı "yeni qan damarı" adlandıran dövlət başçısı bunun iki dost və qardaş dövlət, Azərbaycanın və Türkiyənin birgə səyləri və iradəsi nəticəsində gerçəkləşdirildiyini də sözlərinə əlavə etdi. Ən əlamətdar hadisələr sırasında təbii ki, Azərbaycan Ordusunun yaranmasının yüz illiyi və bununla bağlı 26 iyun Milli Ordu Günündə Bakı şəhərində, Azadlıq meydanında tarixi Hərbi Paradın keçirilməsi də dayanır. Həmin gün Azərbaycan xalqı ilə yanaşı, bütün dünya Azərbaycan ordusunun bir daha gücünə, qüdrətinə şahidlik etdi.

3-4 iyul və 10 iyul tarixlərində baş verən, yaşanan hadisələr, atılan addımlar isə Azərbaycan dövlətinin və dövlətiçiliyinin nə qədər güclü və etibarlı əllərdə olduğunu bütün dünyaya nümayiş etdirdi. İyulun 2-dən 3-nə keçən Mingəçevirdə yerləşən "Azərbaycan" İES-dəki yarımstansiyalardan birində güclü qəzanın baş verməsi ilə ölkənin enerji sistemində ciddi fəsadlar yaşandı. Ancaq dövlət başçısı tərəfindən dərhal prosesə əl qoyuldu, qəzanın aradan qaldırılması məsələsi birbaşa nəzarətə götürüldü. Eyni zamanda, iyulun 3-də ölkənin ikinci baş şəhəri olan Gəncədə terrakt həyata keçirildi. Kənardan, məkrli dairələr tərəfindən idarə olunan radikalyönümlü dinçi qruplar tərəfindən, konkret olaraq, Yunis Səfərov adlı cinayətkar tərəfindən Gəncə Şəhər İcra Hakimiyyətinin başçısı Elmar Vəliyev və bir nəfər polsi serjantı güllələndi.

Hüquq-mühafizə orqanlarının əməliyyat təbdirləri nəticəsində qısa zamanda cinayətkar yaxalandı və Gəncədə qarışıqlıq törətməklə, Azərbaycanda xaos yaratmaq istəyənlərin ilkin planları alt-üst edildi. İyulun 4-də isə dövlət başçısı ölkənin enerji sistemindəki yaranmış vəziyyətlə bağlı öz müşavirəsini keçirdi. Bir daha xalqı, dövləti ilə bir yerdə olduğunu nümayiş etdirdi, nöqsanlara, ciddi xətalara yol verən qurumlarla və məsul şəxslərlə bağlı güzəştsiz mövqe sərgilədiyini və sərgiləyəcəyini ortaya qoydu. Amma marıqda yatmış məkrli dairələr öz məğlubiyyətləri ilə barışmayaraq, yenidən, 10 iyul tarixində Gəncədə dövlətə və dövlətçiliyə qəsd yolunu tutdular və bu zaman Azərbaycanın iki qəhrəman polis şəhid edildi. Amma istər Gəncə əhalisinin, istər Azərbaycan cəmiyyətinin, istər hüquq-mühafizə orqanlarının, istərsə də dövlət rəhbərinin qətiyyəti və iradəsi sayəsində Gəncədə yenidən iğtişaş törətmək istəyən qüvvələrin təxribatçılıq əməllərinə cəmi yarım saat ərzində son qoyuldu. Və elə həmin günün, 10 iyul axşamı ölkə prezidentinin NATO-nun Zirvə toplantısında iştirak etmək üçün Brüsselə tarixi səfəri baş verdi.

Həmin səfər zamanı Azərbaycanla-Avropa İttifaqı arasında çox böyük önəm daşıyan saziş paraflandı, həmçinin, Zirvə toplantısının yekununda qəbul edilən kommunikedə Ermənistanın işğalçı dövlət olması bir daha özünün əksini tapdı. Bundan cəmi bir neçə gün sonra, iyulun 18-19-u tarixlərində İtaliya prezidenti Sercio Mattarellanın Azərbaycana səfəri oldu və bu səfər zamanı bir sıra vacib sənədlər imzalandı, ən əsası, ATƏT-in fəaliyyətdə olan sədri kimi İtaliyanın Qarabağ məsələsində qəti və prinsipial mövqeyi ifadə edildi. İtaliya prezidentinin səfərindən saatlar sonra dövlət başçısının Emmanuel Makronun dəvəti ilə Fransaya rəsmi səfəti baş tutdu. İkigünlük səfər zamanı ölkə prezidentinin Fransanın dünyaca məşhur olan 11 nüfuzlu şirkətinin rəhbəri, həmçinin, Fransa Milli Assambleyasının və Fransa Senatının sədrləri, nəhayət, prezident Makronla görüşü oldu. Bu səfərin gedişatında da iki ölkənin prezidentinin iştirakı ilə Azərbaycanla Fransa arasında bir sıra sahələr üzrə sazişlər imzalandı.

Bundan savayı, ötən 100 gündə dövlət başçısı tərəfindən ölkə həyatı, Azərbaycan regionlarının, iqtisadiyyatın inkişafı və Azərbaycan vətəndaşlarının sosial-iqtisadi rifahının yaxşlaşdırıması yönündə yüzlərlə fərman və sərəncam imzalandı. MM-in növbədənkənar sessiyasında, iyulun 29-da ölkə prezidentinin imzası ilə parlamentə daxil olan, yəni 2018-ci ilin dövlət büdcəsində dəyişikliklər edilməsini nəzərdə tutan qanun layihəsi müzakirələrdən keçirilərək, qəbul olundu. Yəni dövlət büdcəsi daha iki milyard manat artırılaraq, 23 milyarda çatdırıldı, həmçinin, dövlət büdcəsində neftin baza qiyməti 45 dollardan 55 dollara qaldırıldı. Bu müddətdə Azərbaycan mədəniyyəti, incəsənəti və ədəbiyyatı qarşısında xidmətləri olan onlarla tanınmış sənət adamı dövlət başçısının imzaladığı sərəncamlarla mükafatlandırıldı. Millət vəkili Elmira Axundova Xalq yazıçısı, Emin Ağalarov, Murad Dadaşov, Aygün Səmədzadə, Teyyub Aslanov, Əlixan Səmədov və digərləri Xalq artisti, Əməkdar artist fəxri adları ilə təltif olundular. Azərbaycan mətbuatının 143 illiyi ərəfəsində ölkədə nəşr olunan qəzetlərə birdəfəlik maliyyə yardımının ayrılması ilə bağlı növbəti sərəncam verildi.

Beləliklə, son 15 ildə olduğu kimi, növbəti prezidentliyinin 100 günündə də İlham Əliyev özünün son dərəcədə müdrik, uzaqgörən dövlət və siyasət adamı olduğunu nümayiş etdirdi. Göstərdi və sübut etdi ki, Azərbaycan dövləti etibarlı əllərdədir, göstərdi və sübut etdi ki, Azərbaycan xalqı və dövlətini zəfərlərdən zəfərlərə doğru aparan LİDERi var!

Kamil HƏMZƏOĞLU

525-ci qəzet.-2018.- 26 iyul.- S.5.