Dünyaya gəlmişdi bir may səhəri...

GƏLƏNDƏ "DAĞ QUŞÇU" SEVİNMİŞDİSƏ, GEDƏNDƏ ALİMLƏR YOLA SALDILAR

Əslində, bütün insanlar belədir. Hamı dünyaya gələndə öz ailəsini, yaxınlarını sevindirir. Çünki onu ancaq həmin adamlar tanıyırlar.

Dünyadan gedəndə isə... hərə bir cürə gedir - biri səssiz-səmirsiz, biri də məhz professor Talətdin Bağırov kimi - yüzlərcə ziyalının, onlarca alimin göz yaşlarının müşayiəti, "Yerin cənnət olsun!" - xeyir-duası ilə. Ona həmin "arzuları" səsləndirənlərin hamısı bilir ki, Talətdin müəllim bu nahaq dünyadan haqq dünyasına köçənədək Cənnəti qazanmışdı. Çünki ailədə, qohum-qardaş arasında, ali məktəb illərində, universitetdəki fəaliyyəti dövründə, yəni bütün ömrü boyu elə yaşamışdı ki, hamı onun məhz cənnətlik olduğunu söyləyirdi.

Söhbət Bakı Dövlət Universiteti Maddə quruluşu kafedrasının professoru, 130-dan çox məqalənin, 1 patentin, 2 dərs vəsaitinin müəllifi, bir neçə elmlər namizədinə rəhbərlik etmiş Talətdin Ocaqqulu oğlu Bağırovdan gedir. Onu tanıyanlar deyirlər ki, professor Bağırov 57 illik ömrü boyu iki ünvanda yaşamışdır: əvvəllər Xızı rayonuna aid olan, sonralar isə Siyəzənə birləşdirilmiş Dağ Quşçu kəndində və Bakı Dövlət Universitetində. Çünki onu Dağ Quşçuda axtaranlar universitetdə tapırlarmış, universitetdə axtaranlar isə Dağ Quşçuda. Ancaq mayın 20-də, Siyəzən rayon Mədəniyyət Mərkəzində professorun ad günü və ona həsr edilmiş "Bu dağların alim oğlu" kitabının təqdimat mərasimində qeyd edildi ki, Talətdin Bağırovun yaşadığı üçüncü ünvan da var və həmin ünvan Dağ Quşçudan da böyükdür, Bakı Dövlət Universitetindən də. Həmin ünvan minlərlə talətdinsevərin ürəyidir.

Cabir Novruz "Mədəniyyət Fondu"nun Siyəzən Rayon icra hakimiyyəti ilə birlikdə təşkil etdiyi tədbirin aparıcısı Nəcməddin Mürvətov (o, həm də "Bu dağların alim oğlu" kitabının müəllifidir) qeyd etdi ki, 1960-cı il mayın 20-də Dağ Quşçu kəndində dünyaya gələn Talətdin Bağırov 1970-ci ildə Bakı Dövlət Universitetinə daxil olmuş və həmin qəbul kağızı ilə də onun taleyi universitetə bağlanmışdır. 1982-ci ildə universitetin fizika fakültəsini fərqlənmə diplomu ilə bitirən gənc Talətdin iki il AMEA-nın Fizika institutunda işləsə də, tezliklə universitetə qayıtmış və həmin qayıdışla da ömrünün sonunadək ölkənin ilk və ən böyük təhsil ocağında çalışmışdır.

Doğrudur, "İstilik fizikası və molekulyar fizika" ixtisası üzrə universitetin aspiranturasına daxil olandan sonra bir neçə il SSRİ Elmlər Akademiyasının Moskvadakı "Elementar üzvi birləşmələr" İnstitutunda elmi tədqiqat işləri aparmışdır. Ancaq 1988-ci ildən sonra yenidən BDU-nun laboratoriya və auditoriyaları ilə qovuşmuşdur. 1988-ci ildə namizədlik dissertasiyası müdafiə edərək elmlər namizədi alimlik dərəcəsi alan Talətdin Bağırov 2005-ci ildə BDU-nun dosenti seçilmişdir. 2011-ci ildə isə doktorluq dissertasiyası müdafiə edərək fizika elmləri doktoru elmi dərəcəsi qazanmışdır. Dörd il idi ki, maddə quruluşu kafedrasının professoru idi. Ötən il noyabrın 20-də qəflətən vəfat etmişdir.

Siyəzəndə keçirilən tədbirdə kimlər çıxış etmədilər? Mərhum professorun qohumlarından biri dedi ki, Siyəzən ilk dəfədir ki, bu qədər alimi eyni tədbirdə görür. Rayon İcra Hakimiyyəti Başçısının müavini Zəfər Əliyev, Bakı Dövlət Universiteti Fizika fakültəsinin dekanı, fizika-riyaziyyat elmləri doktoru, professor Məmmədəli Ramazanov, universitetin Maddə quruluşu kafedrasının müdiri, Rusiya Pyotr elmlər və incəsənət akademiyasının həqiqi üzvü Eldar Məsimov, BDU maddə quruluşu kafedrasının professoru Sacidə Əbdülvahabova, ADPU-dan fizika-riyaziyyat elmləri doktoru, dosent Aydın Ələkbərov, BDU-nun dosenti Naqif Nəbiyev, professorun uşaqlıq dostu Fəxrəddin Paşayev, Cabir Novruz "Mədəniyyət Fondu"nun prezidenti, professor Cavanşir Qurbanov, filologiya elmləri doktoru, professor Məhəmməd müəllim, fizika-riyaziyyat elmləri namizədi, dosent Tünzalə Bayramova, pedaqoji elmlər namizədi, Əməkdar jurnalist Qafar Əsgərzadə, kənd ziyalıları, alimin ailə üzvləri və qohumları çıxış edərək həyatdan nakam - 57 yaşında getmiş görkəmli elm adamı barədə ürək sözlərini dilə gətirdilər.

Rayon icra hakimiyyəti başçısının müavini Zəfər Əliyevin dediyi "Allah ondan heç nəyi əsirgəməmişdi. Yaşamaq şansı verdiyi ömürdən başqa. Amma ömür zamanla yox, əməllə ölçülür" - fikirləri görkəmli alimin yaradıcılığına verilən qiymət idisə, qızı Ayan xanımın "Mən onu heç nə olmamış kimi həmişə yanımda hiss edirəm. Sadəcə, səsi üçün çox darıxıram..." fikirləri kövrəklik və səmimiyyət baxımından dəyərli idi. BDU Maddə quruluşu kafedrasının professoru Sacidə Əbdülvahabovanın "Biz onu həmişə parlaq bir hüzn hissi ilə xatırlayacağıq. Talətdini xatırlayanlar varsa, onda o, həmişə yaşayacaq. Xatırlayanların sayı isə olduqca çoxdur" - ifadələri həmkar təəssüfü kimi qəbul edilirdisə, mərhumun dostu Mehdi müəllimin "Hacının haqqında yalnız xoş sözlər söyləyə bilərik. Biz onun xeyirxahlığını və doğma kəndinə bağlılığını əməllərində gördük. Mənim Hacı Talətdinlə bağlı xatirələrim daim Asəflə birlikdə olub" - ifadələri alimin doğulub böyüdüyü elə-obaya bağlılıq nümunəsi kimi yaddaşlara yazılırdı.

Deyilməli, yada salınmalı məqamlar çox idi. Mərhum alimin qardaşı Azər müəllimin dediyi fikirlərisə xatırladılmalı məqamların hamısından seçilirdi: "Talətdin həmişə mənə deyərdi ki, nikbin ol, yaxşı şeylər danış ki, yaxşı şeylər baş versin. Bəs niyə onun özü üçün yaxşı şeylər baş vermədi?" İnsan oğlu nəyə qadirdir ki, hər şey qismətin, talenin, bəxtin əlindədir.

... Amma tədbirin sonunda eşitdiyim bir ifadə də var idi ki, onu heç zaman unuda bilməyəcəyəm. Kənd ziyalılarından biri dedi: "Məsəl var, deyirlər, o yerə ki, alim gələr, orada yeddi il ruzi, bərəkət olar. İndi bizim Siyəzənə bu qədər alim gəlibsə, deməli, ruzi-bərəkətimiz on illər boyu azalmayacaq".

Təki, belə olsun!

Rafiq SALMANOV

525-ci qəzet.- 2018.- 5 iyun.- S.8.