Milli Kitabxana UNEC-lə birgə tədbir keçirdi

Dünən Azərbaycan Dövlət İqtisad Universiteti (UNEC) ilə Azərbaycan Milli Kitabxanası "Elmi-tədqiqat ili" çərçivəsində "Tədris və akademik kommunikasiyanın təminatında elmi nəşrlər və kitabxanaların rolu: beynəlxalq standartlar və UNEC təcrübəsi" mövzusunda birgə dəyirmi masa keçiriblər.

UNEC-in Elm şöbəsi, Biznes və menecment fakültəsi ilə Milli Kitabxananın təşkilatçılığı ilə keçirilən dəyirmi masada UNEC-in professor-müəllim heyəti, tələbələr, Milli Kitabxananın əməkdaşları, nəşriyyat, redaksiya və kitabxana əməkdaşları, kitabxana müdirləri, jurnal redaktorları və oxucular iştirak ediblər.

Azərbaycan Milli Kitabxanasının direktoru professor Kərim Tahirov həm UNEC, həm də Milli Kitabxana üçün bu cür tədbirlərin keçirilməsinin əhəmiyyətindən, kitabxanaların elm, təhsil, informasiya mərkəzi kimi cəmiyyətin inkişafındakı rolundan danışıb. O, həmçinin, universitetin yeni tipli kitabxana layihəsinin çox uğurlu bir layihə olduğunu vurğulayıb, bunu professor-müəllim heyətinin və tələbələrin kitabxana xidmətlərindən həftənin 7 günü və 24 saat ərzində daha faydalı şəkildə yararlanmaları istiqamətində mühüm addım kimi qiymətləndirib.

UNEC-in Elm şöbəsinin müdiri, professor Zahid Məmmədov kitabxanaları uğurun təminatçısı, intellektual xəzinə, kitabxanaçıları isə elmin lokomotivi adlandırıb, bu tədbirin əsas elm məbədi olan Milli Kitabxanada keçirilməsinin təqdirəlayiq olduğunu qeyd edib. O deyib ki, universitetləri kitabxanasız təsəvvür etmək qeyri-mümkündür. Z.Məmmədov UNEC-də xarici tədqiqat işlərinin Azərbaycan dilinə, eləcə də öz elmi nəşrlərinin xarici dillərə tərcümə edilməsi məqsədilə Tərcümə Mərkəzinin yaradıldığını, bu işə tələbələrin də cəlb edildiyini bildirib.

UNEC-in Biznes və menecment fakültəsinin dekanı, dosent Mirağa Əhmədov yaradılmış şəraitə görə Milli Kitabxanaya təşəkkürünü bildirib, kitabxanaçı peşəsini ən şərəfli peşə adlandırıb. O, universitetdə elmi fəaliyyətin genişləndirilməsi məqsədilə həyata keçirilmiş yeni layihələrdən danışıb.

Milli Kitabxananın direktor müavini Mələk Hacıyeva univeristetin əməkdaşları tərəfindən çap olunmuş kitabların Milli Kitabxanaya verilməsinə diqqəti çəkərək bu məsələdə köməklik göstərməyi xahiş edib. Professor Zahid Məmmədov və universitet nəşriyyatının müdiri Kamil Hüseynov universitet tərəfindən çap olunmuş kitabların vaxtında kitabxanaya göndərildiyini, ayrı-ayrı alimlər tərəfindən başqa nəşriyyatlarda nəşr edilmiş kitabların da kitabxanaya göndərilməsi üçün lazımi köməklik göstəriləcəyini bildiriblər. Pofessor Kərim Tahirov öz kitablarının Milli Kitabxanaya verilməsində müəlliflərin də maraqlı olduqlarını, bu əsərlərin kitabxananın milli arxiv fondunda mühafizə edilərək gələcək nəsillərə ötürülməsinin, eyni zamanda, bu sahədə dövlətin qanunlarının icrasının vacibliyini vurğulayıb.

UNEC nəşriyyatının redaktoru Rəhilə Cəbrayılova oxucular üçün yaradılmış gözəl şəraitə və mədəni münasibətə, xidmət mədəniyyətinə, fondun tamlığının təminatına ciddi çalışdıqlarına görə Milli Kitabxananın rəhbərliyinə və əməkdaşlarına təşəkkür edib.

UNEC kitabxanasının müdiri Nəzifə Bəxtiyarova universitet kitabxanasının müasir standartlar əsasında qurulması, təkmilləşdirilməsi məqsədiləm həyata keçirilən işlərdən danışıb, Milli Kitabxananın daima onlara dəstək verdiyini və gələcək əməkdaşlığa ümidini qeyd edib.

Professor Zahid Məmmədov universitet rəhbərliyi adından Milli Kitabxananın direktoruna təşəkkür edib, gərəkli dəstəyi təmin etdiyinə görə Mədəniyyət və Turizm Nazirlinə minnətdarlığını bildirib.

Professor Kərim Tahirov sonda bu təşəbbüsə görə UNEC-ə minnətdarlığını bildirib, bu təşəbbüsün ilk olaraq məhz bu universitet tərəfindən irəli sürüldüyünü yüksək qiymətləndirərək, gələcəkdə birgə layihələrin davamlı şəkildə həyata keçirilməsini arzulayıb.

Sonda tədbir iştirakçıları UNEC əməkdaşlarının elmi nəşrlərindən ibarət müxtəlif dillərdə olan ədəbiyyatlar, eləcə də Milli Kitabxananın nəşrlərini əks etdirən geniş kitab sərgisi ilə tanış olublar.

525-ci qəzet.- 2018.- 1 mart.- S.2.