Gülüstan Əliyevanın yaradıcılığında yeni səhifə

"ZABUL" FİLM-KOMPOZİSİYASININ TƏQDİMATI KEÇİRİLİB

Oktyabrın 31-də Azərbaycan Milli Konservatoriyasında Əməkdar artist Gülüstan Əliyevanın "Zabul" film-kompozisiyası təqdim olunub.

Etibar Babayevin rejissor yozumunda meydana gələn gələn filmin təqdimat mərasiminə tanınmış sənətkarlar, ziyalılar, tələbələr və media nümayəndələri qatılıblar.

Tədbiri giriş sözü ilə açıb qonaqları salamlayan Gülüstan Əliyeva film-kompozisiyanın yaradılması haqqında danışıb. O, kompozisiyada əməyi olan hər kəsə təşəkkürünü bildirib.

Sonra film-kompozisiya nümayiş olunub.

Azərbaycan Milli Konservatoriyasının rektoru, Xalq artisti Siyavuş Kərimi yeni yaradıcılıq işi münasibətilə sənətkarı təbrik edib. O, Gülüstan Əliyevanı Azərbaycan muğam sənətinin inkişafına misilsiz töhfələr vermiş sənətkar, təcrübəli pedaqoq kimi dəyərləndirib. Film-kompozisiyanın rejissor yozumunu, filmdə ifa edilən şeir və muğamın ahəngdarlığını çox bəyəndiyini bildirib.

Xalq artisti Arif Babayev filmlə bağlı təəssüratını ifadə edərkən deyib ki, bu, G.Əliyevanın yaradıcılığı ilə bağlı mükəmməl layihədir. Tələbəsi ilə hər zaman fəxr etdiyini deyən sənətkar, bu gün də bu yeni nailiyyətinə sevindiyini vurğulayıb.

Daha sonra Mənsum İbrahimov, Gülyaz və Gülyanaq Məmmədovalar, Zabit Nəbizadə, xanəndə Firuz Səxavət və başqa sənətkarlar film-kompozisiya ilə bağlı düşüncələrini bölüşüb, Gülüstan Əliyevanı təbrik ediblər.

Kompozisiyanın rejissoru Etibar Babayev də fikirlərini bölüşüb, sualları cavablandırıb.

Sonda Gülüstan Əliyeva yaradıcılığına göstərilən diqqət, söylənilən yüksək fikirlər üçün hər kəsə təşəkkürünü bildirib.

Şahanə MÜŞFİQ

525-ci qəzet 2018.- 2 noyabr.- S.7.