Seyran Səxavət gənc yazarlarla görüşdü

Oktyabr 19-da Azərbaycan Yazıçılar Birliyinin "Natəvan" klubunda yazıçı Seyran Səxavətlə son günlərin sosial trendi olan "Hər yer ədəbiyyat" layihəsinin üzvlərinin görüşü keçirilib.

Görüşdə layihənin üzvləri, AYB-nin əməkdaşları, şair və yazıçılar, ziyalılar və media nümayəndələri iştirak ediblər.

Tədbiri giriş sözü ilə açan layihənin ideya müəllifi, yazıçı Ayxan Ayvaz bu hərəkatın ədəbiyyata marağı azalan cəmiyyətə sosial bir mesajın olduğunu bildirib.

Təşkilatın planlarından, görəcəyi işlərə ziyalıların və adi vətəndaşların münasibətindən, onlara verilən dəstəklərdən söhbət açıb.

Komandanın üzvləri və onların bu layihə çərçivəsində görmək istədikləri işlər və ideyalarla tanış olan Seyran Səxavət gənclərin bu ideyasını alqışlayıb, hər zaman yanlarında olduğunu deyib.

Təşkilatın digər üzvü Nuranə Nur bu hərəkata dəstək olan qurumların, kitab evlərinin, birlik və təşkilatların, media nümayəndələrinin, tanınmış ictimai insanlarından da dəstəyini vurğulayaraq, keçirilməsi nəzərdə tutulan aksiyaların bəziləri haqqında məlumat verib.

Fəal üzvlərdən olan Rəbiqə Nazimqızı çıxışında yaşlı nəsil yazıçılarının da bu hərəkata dəstəyini çox yüksək addım kimi qiymətləndirib, onlarla görüşlərin keçirilməsinin, birlikdə müzakirələr aparılmasının vacib olduğunu deyib.

Daha bir gənc fəal Eminquey Akif hərəkatın virtual sosial şəbəkədən real həyat hadisəsinə çevrilməsini tarixi hadisə kimi qiymətləndirib, cəmiyyətin bu hərəkata olan marağının şahidi olduğunu qeyd edib. Gənc şair Ələsgər Əhməd də ilk günlərdən etibarən tanınmış simaların, ziyalıların onlara bu dərəcədə dəstək olacağına inanmadığını, amma bu çətin missiyada ədəbiyyatın qalib gələcəyinə inandığını deyib. Komanda üzvləri təşkilatın nizamnaməsi və planları haqqında olan sualları cavablandırıb, bu ideyada hədəfin ədəbiyyat adamları deyil, yalnız ədəbiyyat olduğunu qeyd ediblər.

Seyran Səxavət gənclərə öz məsləhətlərini verməklə yanaşı, onların yanında olduğunu vurğulayıb.

Qonaq ədiblərdən Ağacəfər Həsənli, Qulu Ağsəs, Qəşəm Nəcəfzadə, Əsəd Cahangir, Sayman Aruz, Maarif Soltan, Kəmaləddin Qədim, Aləm Kəngərli, Xalq artisti, kinorejissor Oqtay Mirqasımov və başqaları gənclərə dəstək zəminində çıxışlar edərək, sənət və yaradıcılıq təcrübələrindən söhbət açıb, onlara bu yolda uğurlar arzuladıqlarını bildiriblər.

Şahanə MÜŞFİQ

525-ci qəzet 2018.- 23 oktyabr.- S.8.