İstedadlı-yaradıcı gənclərin III Respublika toplantısı

Dünən "Fairmont Baku" otelində istedadlı və yaradıcı gənclərin III Respublika toplantısı keçirilib.

Tədbirdə mədəniyyət naziri Əbülfəs Qarayev, gənclər və idman nazirinin müavini İntiqam Babayev, təhsil nazirinin müavini Firudin Qurbanov və digər rəsmi şəxslər iştirak ediblər.

Toplantıda ümumilikdə həm paytaxt Bakıdan, həm də ölkənin bütün şəhər və rayonlarından 500-dən artıq istedadlı gənc iştirak edib.

Toplantıda ölkədəki istedadlı və yaradıcı gənclərin fəaliyyəti, bu sahədə həyata keçirilən işlərlə bağlı videoçarx nümayiş etdirilib.

Mədəniyyət naziri Əbülfəs Qarayev çıxışında Azərbaycan sosial, iqtisadi, elmi və mədəni həyatında gənclərin rolundan bəhs edib, son illərdə onların beynəlxalq toplantı, müsabiqə və konfranslarda yüksək çıxışlarını vurğulayıb. Dövlət qayğısı və yüksək inkişaf nəticəsində Azərbaycan gəncinin adını bütün dünyada tanıtdığını deyən nazir, yaradıcı və istedadlı gənclərə gələcək fəaliyyətlərində də uğurlar arzulayıb.

Gənclər və idman nazirinin müavini İntiqam Babayev bildirib ki, toplantı Prezident İlham Əliyevin sərəncamı ilə təsdiq olunan "Azərbaycan gəncliyi 2017-2021-ci illərdə" Dövlət Proqramının müvafiq bəndinin icrasını təmin etmək məqsədilə keçirilir.

Daha sonra çıxış edənlər toplantının əhəmiyyətindən və dövlət tərəfindən gənclərə hər zaman diqqət və qayğının göstərilməsindən danışıblar.

Tədbirin rəsmi açılış mərasimindən sonra dövlət və yaradıcı qurumların nümayəndələrinin, eyni zamanda, gənclərin və ekspertlərin iştirakı ilə sessiya iclasları olub, müxtəlif yaradıcılıq sahələrində vəziyyət təhlil edilib, inkişaf perspektivləri nəzərdən keçirilib.

Günün ikinci yarısında dörd fərqli istiqamətdə (intellektual inkişaf, elm, təhsil, kino, teatr, ədəbiyyat, musiqi və rəqs, təsviri və dekorativ-tətbiqi sənət, foto) paralel görüşlər olub. Görüşlərdə Azərbaycanın görkəmli elm və mədəniyyət xadimləri iştirak ediblər.

Abbasağa Əlizadənin moderatorluğu ilə baş tutan iclasda Təhsil nazirliyinin sektor müdiri Hilal Salmanov, AMEA-nın Rəyasət Heyəti aparatının Elm və təhsil baş idarəsinin rəisi Əminağa Sadıxov, Prezident yanında Elmin İnkişafı fondu, müşavir Ədilə Babayevanın ekspertliyi ilə intellektual inkişaf, elm, təhsil mövzusu müzakirə olunub.

Kino, teatr və ədəbiyyat mövzusu üzrə iclası Oleq Əmirbəyov idarə edib. İclasda gənclər Mədəniyyət Nazirliyinin Mədəniyyətşünaslıq üzrə Elmi-Metodiki mərkəzinin direktoru Asif Usubəliyev və Əməkdar İncəsənət xadimi, professor Məryəm Əlizadə ilə diskussiya aparıblar.

Musiqi və rəqs bölməsində Mədəniyyət Nazirliyinin Təhsil müəssisələri ilə iş üzrə sektorunun müdiri Lalə Kərimova və Əməkdar artist, bəstəkar Vüqar Camalzadə ekspert kimi çıxış ediblər. Bölmə iclası Fariz İlyasovun moderatorluğu ilə baş tutub.

Təsviri və dekorativ-tətbiqi sənət, foto bölməsinin iclasını Leyla Qasımova idarə edib. Bu bölmədə ekspertlər Mədəniyyət Nazirliyinin Təsviri və dekorativ sənət sektorunun müdiri Qalib Qasımov, Fotoqraflar birliyinin sədri Mirnaib Həsənoğlu, Əməkdar rəssam Məmmədhüseyn Hüseynov olub.

İclaslardan sonra Xalq yazıçısı Elçin Əfəndiyev, akademik Rasim Əliquliyev, Əməkdar artist Tünzalə Ağayeva və Xalq artisti Nurəddin Quliyevlə gənclərin görüşü keçirilib.

Tədbir yekun iclasla sonlandırılıb.

Şahanə MÜŞFİQ

525-ci qəzet 2018.-24 oktyabr.- S.7.