“Əlimərdan bəy Topçubaşov. Xalqımızın müstəqil yaşayacağına inanırdıq” kitabı təqdim olundu

Azərbaycan Respublikasının Prezidenti yanında Dövlət İdarəçilik Akademiyasında (DİA) ölkəmizin Macarıstandakı səfiri, professor Vilayət Quliyevin tərcümə və tərtib etdiyi “Əlimərdan bəy Topçubaşov. …Xalqımızın müstəqil yaşayacağına inanırdıq” kitabının təqdimat mərasimi keçirilib.

AZƏRTAC xəbər verir ki, təqdimat mərasimində DİA-nın rektoru, akademik Urxan Ələkbərov Prezident İlham Əliyevin Azərbaycan Xalq Cümhuriyyətinin (AXC) 100 illik yubileyinin keçirilməsi haqqında müvafiq Sərəncamının əhəmiyyətini vurğulayıb.

AXC-nin tariximizdəki müstəsna rolunu qeyd edən rektor, Azərbaycanın görkəmli siyasi xadimi, diplomat, Əlimərdan bəy Topçubaşovun Cümhuriyyətin qurulmasındakı xidmətlərindən danışıb.

Akademik U.Ələkbərov təqdim olunan kitab haqqında fikirlərini bildirib, nəşrin tələbələr, mütəxəssislər, bütün oxucular üçün dəyərli vəsait olduğunu diqqətə çatdırıb.

Professor Vilayət Quliyev “Əlimərdan bəy Topçubaşov. …Xalqımızın müstəqil yaşayacağına inanırdıq” kitabı barədə ətraflı məlumat verib. O, Əlimərdan bəy Topçubaşovun siyasi-publisistik irsinin oxuculara təqdim olunmasının əhəmiyyətindən danışıb.

Nəşrdə AXC-nin ən fəal xadimlərindən biri, Azərbaycanın görkəmli siyasi xadimi, diplomat Əlimərdan bəy Topçubaşovun (1863-1934) siyasi-publisistik irsi geniş təqdim edilir. Kitabda onun məqalələri, nitqləri, səfər qeydləri, diplomatik yazışmaları, tarixi araşdırmaları, bədii publisistikası və zəngin epistolyar irsindən nümunələr toplanıb. Bu materiallar AXC-nin “qurucu atalar”ından birinin böyük fəaliyyətini əhatəli göstərməklə yanaşı, Cümhuriyyət idealının əbədiyaşarlığını da dolğun əks etdirir.

Milli Məclisin deputatı, professor Elman Nəsirov, professorlar Elçin Əhmədov, Solmaz Rüstəmova-Tohidi, Havva Məmmədova, dosent Firdovsiyyə Əhmədova və başqaları təqdim edilən kitabın tariximiz üçün dəyərli töhfə olduğunu bildiriblər.

525-ci qəzet 2018.- 27 sentyabr.- S.2.