Namiq Mənanın yeni kitabı təqdim olundu

Martın 30-da Sumqayıt şəhər Əli Kərim adına Poeziya Evində Azərbaycan Yazıçılar Birliyi (AYB) Qubadlı Regional Bölməsinin sədri, bədihəçi-şair Namiq Mənanın "Sən gedəndən" kitabının təqdimat mərasimi keçirilib.

Mərasimdə tanınmış ziyalılar, ictimaiyyət nümayəndələri, ədəbiyyatşünaslar, yazıçılar, oxucular və jurnalistlər iştirak ediblər.

Tədbiri giriş sözü ilə Poeziya Evinin direktoru İbrahim İlyaslı açıb, Namiq Mənanın poeziyası, eləcə də AYB regional bölməsinin sədri kimi gördüyü işlərdən danışan aparıcı onun gəlişi ilə Sumqayıt və Qubadlı ədəbi mühitində bir canlanma olduğunu da vurğulayıb.

İlk söz kitabın müəllifi Namiq Mənaya verilib. Tədbirdə iştirak edən qonaqları salamlayan müəllif "Sən gedəndən" kitabı haqqında məlumat verib. Deyib ki, kitabda müxtəlif illərdə yazdığı fərqli mövzulu şeirlər toplanıb. Ona göstərilən etimada görə onun namizədliyini irəli sürən Qubadlı rayon İcra Hakimiyyətinin başçısı Malik İsaqova, ona bu vəzifəni həvalə edən AYB-nin sədri, Xalq yazıçısı Anara və vəzifəsinin icrasında dəstək olan hər kəsə dərin minnətdarlığını bildirən Namiq Məna, bundan sonra da etimadları doğrultmaq üçün daha böyük səylə çalışacağına söz verib.

Tədbirin aparıcısı, şair Əşrəf Veysəlli deyib ki, Namiq Məna hər şeydən öncə incəsənət adamıdır. O, bu vəzifədə işlədiyi az müddət ərzində bədii sözün təbliği, təsviri və gənc istedadların araya-ərsəyə gətirilməsi sahəsində möhtəşəm tədbirlər, ədəbi-bədii musiqili tematik gecələr, ayrı-ayrı şair və yazıçılara həsr olunmuş yaradıcılıq hesabatları, yeni gənc nəslin yetişməsində, onlarda ədəbiyyata, incəsənətə marağın güclənməsində, bədii estetik zövqün, vətənpərvərlik duyğularının aşılanmasnda mühüm işlər görür”.

Qubadlı rayon İcra Hakimiyyəti başçısının müavini Allahverdi Haxverdiyev çıxışında deyib ki, Namiq Mənanın bir ildən çox müddət ərzində ədəbiyyat, sənət üçün gördüyü işlərə nəzər yetirəndə nə qədər dəqiq təyinat olduğunu görürük.

Sumqayıt Regional Mədəniyyət İdarəsinin rəisi Mehman Şükürov çıxışında Namiq Mənanın yalnız Qubadlı ədəbi mühitinin deyil, eləcə də yaşadığı Sumqayıtın ədəbi mühitinin canlandırılmasında xidmətlərini vurğulayıb.

Yeni nəşr haqqında fikirlərini bölüşən kitabın redaktoru Solmaz Cahangirova deyib: "Namiq Məna həm də ilk kimi ədəbiyyatımıza daxil olub. Şifahi xalq ədəbiyyatının zamanın arxivində unudulan bir janrına ad və həyat verən şairimizdir. İstər heca, istər əruz vəznində yazdığı şeirlərində sevgi, milli qeyrət, təəssübkeşlik, tarixi yaddaş özünü qabarıq şəkildə göstərir. Artıq onun ətrafında möhkəm, qeyrətli, sadiq bir komanda formalaşmaqdadır. Məqsədi xalq birliyi, dövlətçiliyimizin sarsılmazlığı olan şairimiz AYB-nin üzvü kimi, şair, əsl türk oğlu, Azərbaycan vətəndaşı kimi yaratdığı birlikdə xalqına sadiq xidmətdədir".

Namiq Mənanı Sumqayıtın yetirməsi adlandıran Ofeliya Babayeva deyib ki, o, indi əsirlikdə qalan ulu Qarabağın, Zəngəzurun, qədim Qubadlı ellərinin bütün gözəl keyfiyyətlərini özündə yaşadan söz adamıdır.

Xalq artisti Şeyx Əbdül Mahmudov çıxışında bədihə janrı, onun folklorumuzdakı yerindən danışıb, Namiq Mənanın bu janrın inkişafındakı xidmətlərini xüsusi vurğulayıb.

AYB-nin mətbuat katibi Xəyal Rza Namiq Mənanın AYB regional bölməsinin sədri kimi gördüyü işlərdən məmnunluğunu ifadə edib, ona daha böyük uğurlar arzulayıb.

Namiq Mənanın həm şair, həm təşkilatçı, həm də rejissorluq bacarıqlarına diqqət çəkən Rafiq Yusifoğlu deyib: "Namiq Mənaya AYB Qubadlı Regional Bölməsinin sədri vəzifəsi tapşırılandan sonra onun istedadının digər cəhətləri üzə çıxdı. Məlum oldu ki, Namiq ədəbiyyatın təbliği sahəsində də xüsusi təşkilatçılıq bacarığına malik bir insandır. Ədəbi-bədii gecələrin keçirilməsi zamanı Namiqin rejissorluq bacarığı üzə çıxdı. Ədəbiyyata, şeirə-sənətə olan sonsuz sevgi onun müxtəlif istiqamətli qabiliyyətinin eyni məcraya yönəltməsinə zəmin yaratdı. Öz şeirləri ilə ədəbi mətbuatda çıxış edən Namiqin yaradıcılıq nümunələrini toplu halında çap etdirmək istəyi də təqdirəlayiqdir".

Daha sonra çıxış edən qonaqlardan folklorşünas Qalib Sayılov, şair Vüqar Əhməd, Əvəz Mahmud Lələdağ, Elvin Əlizadə və başqaları Namiq Məna poeziyasının özünəməxsusluğundan danışıb, onu milli-mənəvi dəyərlərin təbliğçisi, vətənpərvər şair kimi xarakterizə ediblər. Yeni kitabı münasibətilə müəllifi təbrik edən qonaqlar ona bundan sonrakı yaradıcılığında daha böyük uğurlar arzu ediblər.

Tədbirdə Namiq Mənanın həyat və yaradıcılığından bəhs edən videoçarx təqdim olunub.

Bədii hissədə Xasay Cahangirov adına dərnəyin üzvləri həm Namiq Mənanın, həm də digər şairlərin şeirlərindən ibarət ədəbi-bədii kompozisiyalar nümayiş etdiriblər. İncəsənət ustalarının ifasında müxtəlif janrda musiqilər səsləndirilib.

Sonda söz alan Namiq Məna öz çıxışında tədbirdə iştirak edən hər kəsə təşəkkürünü bildirib, "Sən gedəndən" kitabında çap olunan şeirlərindən bəzilərini oxuyub.

Tədbir sonrası müəllif yeni ktabını qonaqlar üçün imzalayıb.

Şahanə MÜŞFİQ

525-ci qəzet.- 2019.- 3 aprel.- S.14.