Billurə

Mənim Billurə nənəm,

Mənim Billurə balam.

Balam, pətəkdə balım,

Mənim tərcümeyi - halım –

Mənim gözəl tələbəm.

Bəlkə də bu dünyada

Ən böyük mükafatım,

Ən uğurlu qələbəm.

Əyilmədim qız balam,

Nə padşaha, şaha mən,

Yalnız, yalnız sığındlm,

Göydə bir Allaha mən.

Ən gözəl ordenim də,

Ən qəşəng medalım da

Sən oldun - siz oldunuz.

Ömrümdə, taleyimdə

Ulduz tək doğuldunuz.

Gözəllər görən gözüm,

Gözəllik tacım oldu.

Ən qeyrətli analar,

Ən namuslu bacılar,

Öz anam, bacım oldu.

Arzum budur ki, səsin

Şuşadan, Kəlbəcərdən,

Ağdamdan gəlsin, qızım.

Qələmin dağlar deşib,

Qayalar dəlsin, qızım.

Gözəl, göyçək, Billurə,

Vallah sənin yanında

Almaz nədir, billur nə?

Babalar da çağrar,

Nənələr də çağrar

Səni Billurə nənə!

Famil Mehdi

4 aprel, 2000-ci il. Bakı

525-ci qəzet.- 2019.- 27 dekabr.- S.8.