Balalarım

Mənim şirin balalarım,

Can verirəm, bal alıram.

Adınızı hər çəkəndə

Ağzım dolu bal oluram.

Hər yerdə ağa tək gəzib

Mən sizə hambal oluram.

Sizdən giley-güzar olsa

Kar olmuram, lal oluram...

Eldə hörmət qazansanız

Şişib Rüstəmzal olaram.

Qocalığı sizə verib

Xatirə, xəyal olaram,

Adıma Rəhmət gətirin,

Mən sizə halal olaram.

Fikrət Qoca getdi demə

Məni yada sal! Olaram!

04.10.2019

Yaşa, Yaşıl Yer Kürəmiz

(Mahnı mətni)

Sahilsiz kainatda,

Bu dünyada, həyatda

Mən ən ali bir canam,

İnsandır atam-anam.

Kainatda ünvanım

Yaşıl Yer kürəmizdir,

Hələ havası safdır,

Hələ suyu təmizdir,

Qonaq bizə əzizdir.

Gələn qonağa yetər,

Bizim də bəsimizdir.

Nəğməmizdə bir sözdür:

"Gələrsən qadan allam,

Gedərsən yola sallam".

Yenə də axşam olcaq,

Səmada yanar ocaq...

Hər ulduz bir diyardı,

Hər biri dostdu-yardı.

Sizdən kimlər gələcək

Bizdən kimlər gedəcək...

Bunlar da arzulardı...

Alqış belə görüşə

Qoy kainat boyansın

Nəğmələrə gülüşə.

"Bənövşə bəndə düşə,

Bizdən sizə kim düşə".

Yallı getsin ulduzlar

Gəlsin oğlanlar, qızlar.

Belə şənlik olmasa

Qoca dünya uduzar.

Gənclərin gülüşündən

Bu gecə dan sökülsün

Bizi yaradanın da

Bu gecə üzü gülsün

Aləmə nur tökülsün.

Sevinc qaynayar, daşar,

İnsanlar qucaqlaşar.

Gül yanaqlı körpələr

Güllərin, çiçəklərin

Rənglərini öpərlər.

Kainatda biz olaq

Sevinc paylayan ordu...

Ulduzlar rəqs eləsin

"Ha yordu, yordu, yordu,

Görək kim-kimi yordu".

Fikrət QOCA

525-ci qəzet.- 2019.- 5 oktyabr.- S.12.