Murad Köhnəqalanın yubileyi qeyd olunub

Ötən gün Azərbaycan Yazıçılar Birliyinin (AYB) "Natəvan" klubunda şair, yazıçı Murad Köhnəqalanın 60 illik yubileyi ilə bağlı tədbir keçirilib.

Tədbirdə AYB katibliyi, tanınmış ədəbiyyat, mədəniyyət nümayəndələri, şairin oxucuları və jurnalistlər iştirak ediblər.

Tədbiri giriş sözü ilə açan AYB-nin katibi Rəşad Məcid AYB-nin sədri, Xalq yazıçısı Anarın və katibliyin təbriklərini çatdırıb.

R.Məcid yubilyarla tanışlığından danışıb, M.Köhnəqalanın şeirləriylə Azərbaycan poeziyasına yeni nəfəs gətirdiyini söyləyib və tədbiri aparmağı tənqiçi Əsəd Cahangirə həvalə edib.

M.Köhnəqalanın yaradıcılığı haqqında ətraflı məlumat verən Ə.Cahangir, onun həm poeziya, həm də nəsrdə uğurlu əsərlərinin olduğunu deyib.

Professor Rüstəm Kamal yubilyarın poeziyası haqqında məruzəylə çıxış edib.

AYB-nin Ədəbiyyat Fondunun direktoru, şair, yazıçı Əjdər Ol Murad Köhnəqala haqqındakı yazılarından, onun poeziyasından söz açıb, eyni zamanda yubilyarı birgə xatirələrinə əsasən bir insan, şəxsiyyət kimi də şərh edib.

Yazıçı Elçin Hüseynbəyli çıxışında Murad Köhnəqalanın şeirlərinin müasir Azərbaycan poeziyasında önəmli yer tutduğunu vurğulayıb.

Daha sonra çıxış edənlər yubilyarın yaradıcılığı haqqında xoş düşüncələrini söyləyib, onu yeni yaşı münasibətiylə təbrik edib, can sağlığı, yaradıcılıq uğurları arzulayıblar.

Sonda çıxış edən Murad Köhnəqala ona göstərilən diqqətə görə AYB rəhbərliyinə, tədbirdə çıxış edən hər kəsə təşəkkür edib.

MEHRİ

525-ci qəzet.- 2019.- 25 oktyabr.- S. 13.