Qələmsiz yazılanlar

Şərait sözlərin də anlamını dəyişdirir.

"Həmişə evində-eşiyində" alqış-duası karantin səbəbindən tam tərs mənada qəbul olunur; həm də bir az qarğış kimi səslənir. )

***

Niyə pis xəbərləri, iyrənc hadisələri xorla, sevinclə, səs-səsə verərək paylaşırsız ki?! Başqalarına görk olsun, bir də baş verməsin deyə? Tərbiyə üsuludu bu, Sizcə?

Bəlkə, insanları ümidləndirən, özgüvən yaradan nikbin hadisələri, pozitiv məqamları tirajlamaq daha yaxşı effekt verər? Bir sınayın! Xoş hadisələri, yaxşı nümunələri paylaşın. Görəcəksiz ki, ətrafa da sirayət etdi.

***

Rafael Hüseynov özünün ad günündə, yubileyində "525"ə "La Skala"nın solisti olmuş, bu günlərdə həyatını Milanda tək-tənha, kimsiz-kimsəsiz başa vuran həmyerlimiz, müğənni Eldar Əliyevin acı taleyindən yazdı.

65 yaşının tamamında yazdığı bu hüznlü yazı məni 35-40 il öncəyə, Cavidlər ailəsinin və Ərtoğrul Cavidin keşməkeşli həyatından bəhs edən, Rafael müəllimin böyük ustalıqla, ürək ağrısıyla yaratdığı "Vaxtdan uca" əsərini oxuduğum gənclik illərimə qaytardı. Sonra "Millətin zərrəsi" kitabındakı yazıları, məşəqqətli insan talelərini yada saldım.

Ömrünü millətin qürur yeri olan böyük şəxsiyyətləri barədə qiymətli əsərlər yaratmağa həsr edən dəyərli alim, yazıçı, publisist, millət vəkili, akademik Rafael Hüseynovu yubileyi münasibətilə təbrik edirəm, gördüyü təqdirəlayiq, əvəzolunmaz işlərə görə ehtiramımı bildirirəm.

Mərhum həmyerlimiz Eldar Əliyev haqda yazdığı bugünkü "Sönmüş ulduzun səssiz gedişi" yazısında bir haşiyə var - Rafael müəllimin AŞPA-dakı fəaliyyətindən bir epizoddur. Təkcə elə bu hadisə onun bir siyasət adamı kimi də bu beynəlxalq qurumdakı aktiv, dinamik, Azərbaycan üçün vacib və gərəkli fəaliyyətinə işıq salır. Ara-sıra özünə də deyirəm, Rafael müəllim, AŞPA dakı fəaliyyətiniz də yaxşı bir kitab mövzusudur, yazmaq lazımdır.

İnanıram ki, Rafael müəllim bundan sonra da uzun illər dəyərli yazıları, qiymətli kitabları, səlis nitqi, gözəl, qaynar çıxışları ilə bizləri hələ çox sevindirəcək.

Yubileyiniz mübarək olsun!..

***

Adamın ruh halı, ovqatı, xarakteri onun Feysbuk paylaşmasından və şərhlərindən bilinir. Hansı hadisəyə necə reaksiya verməsindən (həmçinin, isterikasından) isə psixi vəziyyətini (diaqnozunu) təyin etmək mümkündür.

Bir azdan, çip reallaşandan sonra lap asan olacaq; hissləri, emosiyaları çidarlamaq, məsləhətli səmtə yönəltmək süni intellektin əlində adi bir prosesə çevriləcək. Ona görə də, zamanınız varkən, hisslərinizin qədrini bilin...

***

Sevirəm də "baş üstə" deyənləri...

***

İpək deyir, böyüyəcəm, pilləkəni qoyub dama çıxacam, ordan uçacam göyə, ulduzların hamısını yığıb gətirəcəm... )

***

Əgər statusunu cəmi 15 adam bəyənibsə, dönüb özünə, yazdığına və düşüncənə baxmalısan - bəlkə, səhv səndədir?

***

Minnətdarlıq duyğusu, vəfa borcu, etibar, sədaqət insanı içdən qürurlandıran, ona hörmət gətirən keyfiyyətlərdir. Bu keyfiyyətlərdən xali insanlar təhlükəlidir.

***

Sən get Belarusda polisdə işə düzəl, bala! )

***

"Qafqazinfo"nun ilk günləri yadımdadır; qaçaraq bir müsahibəm də yayımlanmışdı.

5 illik yubileyi də maraqlı oldu; çıxış etdim, təriflədim, yaxşı şənləndik...

10 illik yubileyi də koronanın sayəsində açıq səma altında 6 nəfərlik çay məclisiylə qeyd etmək olar.

Təbrik edirəm, yaxşı çalışırsınız, yorulmayın, şövqünüz azalmasın!..

***

Çürümüş südün ayranı və şoru - orqanizmdəki toksinlərin əlacıdır.

Hər çürüntü tullantı deyil...

***

Bir-bir qazanılan dostlar daha etibarlı olur. Topdan gələnlər topdan da yoxa çıxır.

***

Etibarsızlıq baş alıb gedir.

***

Keçmiş günləri xülya kimi xatırlayacaqsınız.

***

Belaruslar özləri də, yəqin, məəttəl qalıblar baş verən inanılmaz hadisələrə, "kortəbii" mütəşəkkilliyə, "qeybdən" göndərilən təlimatlara, sürətli proseslərə...

Özlərinə gələndə, gözlərini açanda, yəqin ki, iş işdən keçmiş olacaq.

İndi Abdulla Şaiqin məşhur şeirini şəraitə uyğun maraqlı interpretasiya etmək istəyənlər tapılacaq deyə, yada salıram:

Çoban açınca gözün,

Qalar iki buynuzun...

***

Koronalı yayın belə yağışı da varmış...

***

Başını qatmağa nəsə tapa bilirsənsə, bundan zövq alırsansa, böyük işdir...

***

Belarusda inqilabı “Telegram” sosial şəbəkəsi və “NEXTA Live” kanalı edir.

Heç bir qurum belə çevik, mütəşəkkil təşkilatlanmanı təmin edə, belə təsirli və istedadlı təbliğat apara, operativ təlimat verə bilməzdi. İndi Belarusun idarəetməsi, az qala, onların əlindədir; kütlənin hara istiqamətlənməsi, harda, saat neçədə və necə yığışması, ölkənin hər tərəfində baş verənlər anındaca milyonu keçən Belarus izləyicilərinin ovcundadır.

Dünya İqtisadi Forumunun prezidenti Klaus Şvab özünün "Dördüncü sənaye inqilabı" kiabında xəbərdarlıq etmişdi: "Hökumətlər hədsiz çeviklik göstərməsələr, təşkilatlanmış sosial şəbəkələrin mütəşəkkil təzyiqi və operativliyi qarşısında məğlub duruma düşəcəklər".

Bu da bariz nümunəsi...

***

Hikmət Hacıyevin üstünlükləri çoxdur. Media ilə münasibəti yaxşıdır, ictimai rəyə önəm verir. Savadlıdır. İndi həddindən artıq gərgin işləyir. Əksər sahələrlə bağlı suallar ona yönəlir. Səbr, şövq, yorulmamaq arzulayıram. Tam qənaətə gəlmək üçünsə hələ tezdir. İşləsin, bir ildən sonra nəsə deyərik fəaliyyəti barədə. Arzu edirik, vaxt tapanda qəzetləri, həmçinin, "525-ci qəzet"i də hərdən, həftə sonları vərəqləsin.

***

İlluziyalara qapanmaq, aludə olmaq zərərlidir...

***

Mənə ad günü bildirişləri gəlməsə də, düşünürəm ki, hamıda belə problem yoxdur, xəbər tutub təbrik edəcəksiniz. Hamınıza öncədən çoxlu təşəkkürümü bildirirəm. Var olun!

Könül istərdi ki, ayrıca təbrik yazmaqdansa, nəvələrlə şəklimi bəyənməklə təbriklərə qoşulasınız...

Belədə məni həm də təbrik edənləri saymaq "əziyyətindən" qurtarmış olarsınız. )

Təşəkkürlər!..

***

Hamını anlamağa çalışmaq...

***

Başınız açılanda qocalmış olacaqsınız.

***

Dilxorçuluq olmayan ailə var ki?!

***

Özünü Dənizkənarı Bulvarı ilk dəfə görən kənd adamı kimi hiss etmək...

***

Elə yalan var ki, hamıya sərf edir...

***

Feysbukun sayəsində hamı yazmaq imkanı qazanıb. Yaxşıdır. Amma çalışın səhvsiz yazmağı da öyrənəsiniz.

***

Bu tempə dözmək hər adamın işi deyil. Hamı tükənəcək.

***

O sözləri ki dünən deyə bilmirdiniz, bu gün deməyin mənası yoxdur. Daldan atılan daş kimi...

***

Sərt həqiqətləri iti yumorla, kəskin sarkazmla demək ayıq başın işi deyil... :)

***

Ən xoş məqamda da bir-iki ürəkbulandıran məxluq tapılır...

***

Ala qarğa harda bala çıxartmaz?..

***

Məcbur olmadığınız yerlərə getməyin...

***

Trol həmişə troldur...

***

Sosial şəbəkəyə uyan tək qalar...

***

Mirşahinin "Xainlər" filminə baxdım. Vacib, lazımlı, ibrətamiz və dolğun filmdir. Təsirlidir. Böyük zəhmət çəkilib və qətiyyətli vətəndaş mövqeyi ortaya qoyulub...

***

Bu proseslərdən və Siyavuş Novruzovun açıqlamasından sonra Ramiz Mehdiyevin yeganə düzgün qərarı ərizə yazıb Akademiya prezidentliyindən istefa verməsi olardı...

Rəşad MƏCİD

Azərbaycan Yazıçılar Birliyinin gənclərlə iş üzrə

katibi, "525-ci qəzet"in baş redaktoru

525-ci qəzet.- 2020.- 26 avqust.- S.17.