Bizim qəhrəmanımız

Şagirdlərdən Prezidentə məktub

Cənab Ali Baş Komandan, biz - Səbail rayonu, T.İsmayılov adına 6 saylı məktəb-liseyin 8 "b" və 6 "c" sinif şagirdləri Fatimə Müşfiq qızı Bayramova, Kənan Tərlan oğlu Xankişiyev ilk olaraq Sizə Vətənimizin hər qarışını bizə qaytardığınız üçün təşəkkür edirik. Bu haqq savaşını bizim yaşıdlarımıza saxlamadan Azərbaycan bayrağını Qarabağda dalğalandırdığınız üçün var olun!

Sizin Ali Baş Komandanlığınızla 10 dekabr Zəfər paradı Vətən müharibəsində qazandığımız tarixi qələbənin dünyaya bəyan edildiyi gün kimi tarixə keçdi. Dünyanın öz gözünü və qulaqlarını diqqətlə Azərbaycana yönəltdiyi, Azadlıq meydanında atılan hər addımın, deyilən hər sözün böyük həyəcan və maraqla izləndiyi an. Bakıda təşkil olunan parad dünyaya bir sıra mesajların verilməsi ilə yaddaşlara keçdi.

Zəfər paradı qalib Ordu, qalib Xalq, qalib Prezident birliyinin simvoluna çevrildi. Paradda bizim diqqətimizi çəkən ən mühüm məqam bütün rakurslardan görünən dəmir yumruğun şəkli idi. Bu, məhz Sizin - Prezident, Ali Baş Komandanın yumruğunun əksi idi. Bu həmin yumruqdur ki, Ermənistan ordusunun başını əzdi, belini qırdı və diz çökdürdü. Məhz bu yumruq düşməni Azərbaycan torpaqlarından "iti qovan kimi" qovdu. Məhz bu yumruğu görən düşmən döyüş meydanında bütün hərbi texnikasını qoyaraq qaçdı. Sonda ağ bayraq qaldıraraq təslim oldu.

Prezident İlham Əliyev: "Azərbaycan 44 gün ərzində parlaq qələbə qazanaraq Ermənistanı məğlub etdi, işğala son qoydu. Bu 44 günün hər günü bizim şanlı tariximizdir. Hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, bu işğala son qoyulsun, bu haqsızlığa son qoyulsun, ədalət zəfər çalsın, tarixi ədalət zəfər çalsın və buna nail olduq". Sizin paradda söylədiyiniz bu sözləriniz daima biz uşaqların beynində, dilində, ürəyində səslənəcək. Bizə və bizim yaşıdlarımıza görə, Siz dünya liderləri sırasında ən birinci lidersiniz! Sizi ata kimi, baba kimi sevməmək mümkün deyil. Sizə möhkəm cansağlığı, uzun ömür arzu edirik. Dəmir yumruğunuz hər zaman düşmənin başının üstündə olsun! Qarabağ Azərbaycandır və nida işarəsi!

Təhsil aldığımız məktəb-liseydə müəllimlərimiz mütəmadi olaraq Sizin uğurlu siyasətinizdən, vətənpərvərliyinizdən biz şagirdlərə örnəklər göstərərək bəhs edirlər. Məşhur bir deyimdə vurğulandığı kimi: "Qəhrəmanlıq yeganə insani hərəkətdir ki, onu məşq etmək mümkün deyil".

Cənab Ali Baş Komandan! Siz bizim QƏHRƏMANIMIZSINIZ!

T.İsmayılov adına 6 saylı məktəb-liseyin 8 "b" və 6 "c"sinif şagirdləri - Fatimə Bayramova və Kənan Xankişiyev

525-ci qəzet.- 2020.- 25 dekabr.- S.6.