Rəşad Məcid: “Bu günlər hər bir vətəndaşın öz məsuliyyəti var”

“525-ci qəzet”in baş redaktoru, Mətbuat Şurası İdarə Heyətinin üzvü Rəşad Məcid Azərbaycanda koronavirus infeksiyasının yayılmasının qarşısının alınması üçün hökumətin həyata keçirdiyi tədbirlərlə bağlı öz fikirlərini sosial şəbəkədə bölüşüb.

Həmin fikirləri oxuculara təqdim edirik:

"Son günlər dünyanın dörd bir yanını sarmaqda olan koronavirus təhlükəsi ilə əlaqədar ölkəmizdə virusun yayılması əleyhinə ən yüksək rəsmi dairələr səviyyəsində həyata keçirilən tədbirlər ilk növbədə Azərbaycan dövlətinin və hökumətinin, ən kritik situasiyalarda belə, daima öz vətəndaşlarının yanında olmasının növbəti ifadəsi kimi çox anlamlı və önəmlidir. Hökumətin atdığı bu addımlar bir yandan ölkədə tibbi-gigiyenik dayanıqlığın təminatı və infeksiyanın xaricdən idxalını məhdudlaşdırmaq baxımından vacibdirsə, o biri yandan da ayrı-ayrı dünya ölkələrində virisun miqyasının genişləndiyi, ölüm hallarının artdığı ilə bağlı yayılan çeşidli xəbərlərin hər kəsin öz dünyagörüşünə uyğun izah və şərh edilərək dedi-qodulara yol açması və nəticədə ictimaiyyətdə narahatçılıq, gərginlik, xof yaranması ehtimalının önlənməsi anlamında zəruridir.

Günəş hər yeri eyni hərarətlə qızdırmadığı kimi, baş verən hansısa hadisə, yayılan hansısa xəbər də bütün insanlarda eyni reaksiya doğurmur. Düşüncə, səviyyə baxımından hamının bərabər olması mümkünsüzdür. Infeksiyanın ayrı-ayrı ölkələrdə yayılmağa başladığı ilk günlərdən təhlükənin ciddiliynin fərqinə varan, məsələyə təmkinlə yanaşan insanlarla yanaşı, şübhəsiz ki, baş verənlərə barmaqarası baxan, etinasızlıq və laqeydlik göstərənlər də yox deyildi. Təbii ki, belə vəziyyətdə hadisələri öz axarına buraxmaq kəskin nəticələrə yol aça bilərdi. Uzağa getməyək, infeksiyanın böyük fəsadlara yol açdığı qonşu ölkədə inanclı radikal kəsim hökumətin virusin yayılmasının miqyasını məhdudlaşdırmaq niyyətilə kütləvi tədbirlərin, toplum halında ziyarət və ibadətlərin müvəqqəti dayandırılması ilə bağlı qərarına qarşı çıxır, baş verənləri ilahi qüvvənin, Allahın iradəsinə buraxıb seyrçi mövqe tutmaqda israr edir. Bu mənada, Azərbaycan hökumətinin atdığı qabaqlayıcı addımlar, görülən bir sıra sosial izolyasiya tədbirləri həm də problemin hassaslığını və ciddiyyətini dərk etməyən təbəqələrin məsuliyyətini artırmaq, təsəvvürünü dəyişmək baxımından əhəmiyətlidir.

Hər şey göz qabağındadır, mövcud qlobal təhlükənin Azərbaycana təsirini mümkün qədər minimallaşdırmaq məqsədi ilə dövlət səviyyəsində ardığcıl tədbirlər həyata keçirilir. Yaşadığımız günlərdə yaşından, sosial statusundan, cəmiyyətdəki mövqeyindən asılı olmayaraq hər bir vətəndaşın bu həssas mərhələdə öz məsuliyyətini dərk etməsinə, necə deyərlər, əlini daşın altına qoymasına əlahiddə ehtiyac var. Sənətinə, ixtisasına, sosial mövqeyə uyğun olaraq işinə xüsusi həssaslıqla yanaşmaq, yaxasını kənara çəkməmək vətəndaş kimi hər birimizin vəzifəsidir.

Və təbii ki, bu günlər üzərinə daha çox məsuliyyət düşən fəliyyət sahələrindən biri də jurnalistikadır. Son illər, xüsusilə də sosial medianın təşəkkül tapdığı mərhələdə, təəssüf ki, jurnalıstıkamızda hay-küylü, dezinformasiya tipli xəbərlərin cəmiyyətdə ajiotaj yaratması halları ilə az üzləşməmişik. Sosial şəbəkələrin həyatımızın bir parçasına çevrilməsndən sonra bu tendensiya daha da güclənib. Barmağı klaviatura tutan beyniqanlı sosial şəbəkə istifadəçilərinin aşırı fəallığı bu məkanda təsadüf etdiyimiz təmkinli, düşündürücü, abırına qısılan nüfuzlu fikir sahiblərinin səsini, az qala, eşitməz edib. Belə bir durumda klassik media ənənələrinin zədələnməsi, jurnalıstikanın ən önəmli prinsiplərinin unudulması arzuolunmaz və məyusedici faktordur. Amma bununla belə, uzun illərdən bəri Azərbaycan müharibə şəraitində yaşadığından sözə məsuliyyət, ölkənin informasiya təhlükəsizliyinin qorunması baxımından təqdir olunası ənənələrimiz də az deyil. İndiki həssas situasiyada məhz bu prinsiplərə əməl olunmasına həmişəkindən də çox ehtiyac və zərurət yaranıb. Cəmiyyətin informasiya təhlükəsizliyinin bütün prinsiplərdən önəmli olduğunu unutmadan yazılan hər bir sözə, deyilən hər bir kəlməyə son dərəcə diqqətli yanaşmaq, öz məsuliyyətini dərk etmək qaçılmazdır. Bu mənada, hesab edirəm ki, ölkəmizin, vətəndaşlarımızın sınaq qarşısından olduğu bu günlərdə cəmiyyətdə panika və ajiotaj yaranmasına, insanlarda narahatlıq yarada biləcək məlumat və şayiələr yayılmasına yol verməmək üçün hər bir media orqanı, jurnalıst, sosial şəbəkə istifadəçisi maksimum dərəcədə səy göstərməyə, öz imkan və potensialı çərçivəsində əlindən gələni etməyə borcludur".

525-ci qəzet.- 2020.- 18 mart.- S. 9.