Borçalıdan Ana Vətənə uzanan milli dəyərlər körpüsü

Azərbaycanın və Gürcüstanın tanınmış şair-publisisti, Gürcüstan Aşıqlar Birliyinin sədri, qonşu ölkədə yaşayan soydaşlarımızın ictimai hərəkat lideri Osman Əhmədoğlu vəfat edib.

Bu barədə Azərbaycan və Gürcüstan mediasında, sosial şəbəkədə yayılan məlumatda bildirilir ki, iki ölkə arasında ictimai-mədəni əlaqələrin inkişafına ciddi töhfələr vermiş, qonşu respublikda milli-mənəvi dəyərlərimizin hamisi kimi geniş fəaliyyət göstərmiş cəfakeş soydaşımız uzun sürən ağır xəstəlikdən sonra 72 yaşında dünyasını dəyişib.

Zəngin və mənalı ziyalı ömrü yaşamış Osman Əhmədoğlu 1948-ci ildə Marneuli rayonunun Keşəli kəndində anadan olub. Səkkizillik məktəbi doğma kəndində, orta təhsili qonşu Kəpənəkçi kəndində başa vurub. Soydaşımız 1974-cü ildə Azərbaycan Dövlət Universitetinin filologiya fakültəsini bitirib. Yeniyetməlik illərindən şeir yazan Osman tələbəlik dövründən mətbuatda tarixi-məfkurəvi mövzularda, müxtəlif səpkili yazılarla çıxış etməyə başlayıb.

Azərbaycan Yazıçılar və Jurnalistlər birliklərnin üzvü olan Dərviş Osman bədii yaradıcılıqla bərabər, jurnalistik fəaliyyətini də hər iki ölkənin mətbuatında ardıcıl çıxışları ilə davam etdirib. Şair-publisist gənc yaşlarında Gürcüstanda nəşr olunan "Yeni Yol" qəzetində redaktor müavini vəzifəsində çalışıb. Osman Əhmədoğlu sonralar "Dədə Qorqud" adlı jurnala rəhbərlik edib, "Meydan" toplusu idarə heyətinin fəal üzvlərindən biri olub.

Azərbaycanda, Gürcüstanda, Türkiyədə və bir sıra türkdilli ölkələrdə "Osman Keşəli", "Osman Əfəndi", "Dərviş Osman" imzaları ilə tanınan istedadlı şairin "Borçalıda ocaq yanır" adlı ilk şeirlər kitabı 1989-cu ildə Bakıda "Yazıçı" nəşriyyatında işıq üzü görüb. Sonrakı illərdə onun şeir və poemalardan ibarət bir neçə kitabı və Azərbaycan xalqının etnoqrafiya və folkloruna həsr olunan iki tədqiqat əsəri çap olunub.

Osman Əhmədoğlu Gürcüstanda aşıq yaradıcılığının yaşadılmasında və inkişafında da böyük xidmətlər göstərib. Onun təşkilatçılığı ilə görkəmli aşıq, şair, alim və digər ad-sanlı ziyalılarımızın Borçalı ellərində bir sıra yubileyləri və xatirə məclisləri keçirilib. Yurdsevər soydaşımız Azərbaycanın ictimai-mədəni həyatında da yaxından iştirak edir, Dağlıq Qarabağ münaqişəsi ilə bağlı xalqımızın haqq səsini, müstəqil Azərbaycan dövlətinin tarixi uğurlarını xarici ölkələrdə də geniş yayırdı.

Dərviş Osman yarım əsrdən artıq davam edən ictimai-mədəni fəaliyyəti ilə Borçalıdan Ana Vətənə uzanan milli dəyərlər körpüsünə çevrilmişdi. Amansız ölüm ali milli dəyərlərimizlə tərbiyələnmiş, qəlbi həmişə öz xalqına, yurduna sevgi ilə döyünmüş, ictimai ideallara xidmətdən heç vaxt yorulmayan Osman Əhmədoğlunu aramızdan aparsa da, onun işıqlı xatirəsi tanıyanların qəlbində, tükənməz arzu-istəkləri isə məsləkdaşlarının əməllərində daim yaşayacaq.

Allah rəhmət eləsin!

Tahir AYDINOĞLU

Azərbaycan Mətbuat Şurası Ahıl Jurnalistlər Məclisinin sədr müavini

525-ci qəzet.- 2020.- 20 mart.- S.12.