Oçerkist
Qüdrət
Piriyev-70
Tam səmimiyyətlə
deyirəm ki, bu qeydlərimi yazmağa başlayarkən xeyli tərəddüd
etdim. Görkəmli bir portret ustasının rəsmini yaratmaq rəssam
dostu üçün nə qədər çətindisə,
imzası brendə çevrilən bir publisist barədə
yubiley məqaləsi yazmaq mənə də bir o qədər müşkül
görünürdü.
Qələmini
klassik jurnalistikanın, demək olar ki, bütün
janrlarında sınamış və hər birində dəyərli
nümunələr ortaya qoymuş həmkarım barədə
yazıma nədən başlamaqda, hansı sahəni önə
çıxarmaqda xüsusilə çətinlik çəkirdim.
Nəhayət, oçerkləri diqqətimi daha çox cəlb etdiyi üçün
yazıya, istər-istəməz "Oçerkist" sərlövhəsi
seçdim. Və zənnimcə, bu söz ona köhnə
kişilərə buxara papağı yaraşan kimi
yaraşır. Ömrünün 70-ci zirvəsinə
çatmış həmkarımız Qüdrət Piriyev bu
haqqı çox sayda parlaq oçerkləri ilə
qazanmışdır. Bir sözlə, yazının sərlövhəsi
artıq hazırdır. Ardını yazmaq isə o qədər
çətin olmadı. Mən onu - köhnə dostumu
artıq 47 ildir ki, az qala özüm
kimi tanıyıram.
Qüdrət Ağsu rayonunun Növcü kənd orta məktəbində oxuduğu illərdə jurnalistikaya mehr salmışdı. İlk cəhdlərdən BDU-ya daxil olmaq arzusuna qovuşa bilməsə də, ruhdan düşməmiş, bir müddət Bakının tikinti idarələrində fəhləlik etmiş (bunun gələcəkdə sadə əmək adamlarının həyat və düşüncələrini dərindən əsk etdirməsi üçün ona böyük faydası olacaqdı), sovet ordusunda əsgəri xidmət keçdikdən sonra, nəhayət, 1973-cü ildə məqsədinə çataraq jurnalistika fakültəsinə daxil olmuşdur. Burada oxuduğu beş il ərzində bir çoxları kimi vaxtını fövtə vermədən, kifayət qədər ciddi nəzəri və təcrübi biliklərə yiyələnmişdir.
1978-ci
ildə ali təhsilini başa vurub "Azərbaycan gəncləri"
qəzetində əmək fəaliyyətinə başlayanda
bu sakit, mülayim təbiətli, zahirən iddiasız gənc
tezliklə "qələmli" jurnalist kimi özünü
təsdiq edərək, çalışdığı
kollektivdə rəğbət və etimad qazana bilmişdir.
Mən
"zahirən iddiasız gənc" ifadəsini təsadüfən
işlətmədim. Qüdrət Piriyev
qəzetçilik peşəsinə idman
qaçışı üzrə kiçik məsafələri
qət etməyə çıxan sprinter kimi gəlməmişdi.
Heç vaxt tez və ucuz şöhrət axtarmadı. O,
jurnalistikada marafon yarışlarına çıxaraq, parlaq və
davamlı uğurlar qazanmaq arzusunda idi. Bu yolda hər cür zəhmətə
qatlaşır, daim axtarır, öyrənir, yaxşı mənada
fərqlənməyə çalışırdı.
"Azərbaycan
gəncləri" qəzetində gənc jurnalistin öz təşəbbüsü
ilə Smolensk vilayətinə səfərindən
reportajları, ilk kosmonavt Yuri Qaqarinin anası ilə
görüşdən hazırladığı material,
Desnaqorsk şəhərində inşa olunan Smolensk Atom
Elektrik Stansiyasının tikintisində çalışan azərbaycanlı
gənclərin çətin və fədakar əməyindən
bəhs edən maraqlı məqalələr onun parlaq
istedadından xəbər verdiyi kimi, imzasını da
geniş oxucu auditoriyasına tanıtdıraraq sevdirirdi.
"Bakı və Baku"
axşam qəzetlərinin baş redaktoru,
görkəmli jurnalist Nəsir İmanquliyev keçmiş tələbəsi
olan Qüdrətin yaradıcılıq uğurlarını
yaxından izləyir və buna çox sevinirdi. Nəsir müəllim fürsət düşən
kimi, Qüdrəti öz kollektivinə dəvət edərək
onun yaradıcılığının daha da püxtələşməsi
üçün imkan yaratdı. Piriyev "konveyer" kimi
yorulmaq bilmədən çalışan redaksiyada
karıxmadı, əksinə, abırlı, məsuliyyətli
davranışı ilə seçildi, ən
başlıcası, qəzetin sanbalını daha da artıran
maraqlı yazılar ortaya qoydu.
"Bakı"
qəzetində ilk illər Nəsir İmanquliyev, Şamil
Şahməmmədov, Əliabbas Əliyev və digər təcrübəli
jurnalistlərdən qəzet işinin təşkili və ədəbi
redaktənin sirlərini dərindən öyrənərək,
bunları özü üçün həmişəlik əxz
etməyə çalışan Q.Piriyev, təsadüfi deyil
ki, bu gün ölkəmizdə ən yaxşı redaktə
qabiliyyəti olan jurnalistlərdən biri sayılır.
"Bakı"
qəzetinin redaksiyasında heç kimi ən xırda korrektə
və üslub səhvinə görə
bağışlamırdılar. Bu sərt və ədalətli
cəza prinsipinin hökm sürdüyü qəzetin
"şinelindən çıxmış" Piriyev bu
gün də hər bir sözün, ifadənin düzgün
yazılışına, dəqiq, yerində işlənməsinə
dərin məsuliyyət hissi ilə
yanaşır.
1980-ci illərin əvvələrində ölkənin "bir nömrəli qəzeti" sayılan "Kommunist"in "İnsanlar və talelər" rubrikası altında elan etdiyi ən yaxşı yazı müsabiqəsində "Atasının oğlu" oçerki ilə ("Kommunist" 23 sentyabr 1980-ci il) Qüdrət Piriyev imzası, heç şübhəsiz ki, daha çox tanındı və sevildi. Bir müddət sonra həmin kollektivə dəvət olundu və o vaxtdan burada "külüng vuraraq" baş redaktorun birinci müavini vəzifəsinə qədər yüksəldi.
Qüdrət
Piriyev klassik jurnalistika məktəbindən çox şey
götürmüş, bir yerdə işlədiyi Nəsir
İmanquliyev, Rəfael Nağıyev, Əşrəf
Hacıyev kimi ustad qələm sahiblərinin təcrübəsindən
yararlanaraq, fərdi yaradıcılıq üslubuna yiyələnmişdir.
Məhz bu qabiliyyəti sayəsində
Qüdrət müəllim öz yazılarına cəlbedici
forma və cazibədar deyim tərzi tapmaqla, oxucuların diqqətini
cəlb etməyi bacarmışdır.
Qüdrətin
60 illik yubileyində onun uğurları barədə söz
açan tələbə yoldaşımız, professor Qulu Məhərrəmli
onun yaradıcılıq məziyyətlərini geniş təhlil
etmiş, çeşidli janrlarda parlaq nümunələr
yaratdığını xüsusi qeyd edərək belə
yazmışdır: "İndi xarici ölkələrdən
səfər təəəssüratları yazmaq, hansısa
regiondan reportajlar vermək dəbdədir. Mənim
düşüncəmə görə, bu
tip yazılar çox az jurnalistdə Qüdrətdəki qədər
yaxşı alınır. Onun şirin təhkiyəsi,
maraqlı epizodlar seçib təqdim etməsi, oxucunu drammatik
situasiyalarla üzləşdirmək məharəti bu silsilədən
olan yazılarını xeyli oxunaqlı edir."
Mənim
zənnimcə isə oçerk janrı Qüdrətin
yaradıcılığında daha qabarıq üzə
çıxır. Bu janrdakı
yazılarının hər biri təkcə zövqlü oxucu
auitoriyasında deyil, eləcə də jurnalist cameəsində
hər dəfə parlaq bir mədəniyyət hadisəsinə
çevrilmişdir. Bu oçerklərin gücü nədədir?
Şəxsən mənim üçün bu sual heç vaxt
ritorik olmayıb. Ona görə ki, mənə çox vaxt
gözəl hekayələr qədər güclü təsir
bağışlayan Qüdrətin
oçerklərinin sirrini tam dərk etməkdə
çətinlik çəkmişəm.
Jurnalistikanın
"şah janrı" sayılan, bəzi tədqiqatçıların
"sənədli hekayə" adlandırdıqları
oçerk janrında kamil nümunələr ortaya qoymaq hər
kəsə nəsib olmur. Bir vaxtlar hər bir nüfuzlu
qəzetdə oçerk yazmağı bacaranlar olurdu,
onları, teatrda Hamlet, yaxud
başqa bu qəbildən olan böyük səhnə
obrazlarını canlandıran aktyorlarla müqayisə edənlər
də tapılırdı.
Qüdrət Piriyevin bu qabiliyyətini zərrə qədər şişirtmirəm və kiminsə etiraz edəcəyini düşünmürəm. Bəli, tam məsuliyyətlə demək olar ki, o, bu sahədə "as"lardan biridir. Heç vaxt bir-birinə bənzəməyən bu publisistika nümunələri təhkiyəsinin ifadəliliyi, obrazların psixoloji dərinliyi, dilinin oxunaqlığı, struktur orijinallığı və digər üstün cəhətləri ilə fərqlənib.
Müəllif oçerklərinin qəhrəmanlarının
üzləşdikləri real hadisələrin fonunda daxili
dünyalarını, arzu və düşüncələrini,
psixoloji durumlarını elə ustalıqla təsvir edir ki,
bunlar uzun müddət oxucunun yaddaşından silinmir.
Qüdrət
Piriyevin bu qabiliyyəti Nəsir İmanquliyev, Rəfael
Nağıyev, Tofiq Rüstəmov, Yalçın Əlizadə,
Şakir Yaqubov və başqa görkəmli jurnalistlər tərəfindən
hər zaman yüksək dəyərləndirilib. Yuxarıda adını çəkdiyim
"Atasının oğlu" oçerkinin müəllifini
təbrik etmək üçün "Bakı" qəzeti
redaksiyasına gələn görkəmli pedaqoq və publisist
Nurəddin Babayev baş redaktor Nəsir İmanquliyevin
kabinetində Qüdrəti bağrına basaraq, "mən
bunu sənin kimi belə gözəl yaza
bilməzdim" deyib.
Görkəmli
yazıçı Cəmil Əlibəyovdən Q.Piriyevin
parlaq istedadına heyran qaldığını, "belə
bir güclü jurnalist"in özünün rəhbərlik
etdiyi "Kommunist" qəzetində
çalışmasından qürur duyduğunu söyləməsini
qulağımla eşitmişəm.
Bugünkü kimi yadımdadır. 1989-cu ilin payızında
Bakı Ali Partiya Məktəbində bir qrup partiya və mətbuat
işçisi üçün mühazirə kursları təşkil
olunmuşdu. Cəmil Əlibəyov
auditoriyadakı çıxışı zamanı baş
redaktoru olduğu qəzetdə "Meydan hadisələri"nin
işıqlandırılması prinsiplərindən söz
açarkən redaksiyanın iki əməkdaşının
(onlardan biri Qüdrət Piriyev idi) bu kifayət qədər
çətin və mübahisəli mövzunu oxuculara böyük
məharətlə təqdim etdiklərini aşkar hiss olunan fəxrlə
söylədi.
O, həmçinin,
Qüdrət Piriyevlə Elman Qədirovun Xəzərətrafı
bölgələrə - Azərbaycanın,
Dağıstanın və Həştərxanın (Rusiya
Federasiyası), Qazaxıstanın və Türkmənistanın
sahil şəhərlərinə, Qaraboğazqol körfəzinə
səfərinin nəticəsi kimi meydana çıxan silsilə
yazılarından ağızdolusu danışdı.
O da
yadımdadır ki, Bakı Dövlət Universitetinin professoru
Yalçın Əlizadə 1990-1995-ci illərdə "Xalq
qəzeti"nin baş redaktoru olmuş görkəmli
jurnalist, rəhmətlik Tofiq Rüstəmovun anadan
olmasının 80 illiyi ilə bağlı yazının
"qələminə tanıdığı jurnalistlər
arasında hamıdan çox güvəndiyi" Qüdrət
Piriyevin qələmə almasını arzu və tövsiyə
etdi. Mən bu ismarıçı
Qüdrətə çatdıranda, o, həyəcanla bunun son
dərəcə böyük məsuliyyətli və şərəfli
vəzifə olduğunu bildirdi. Məsələ
burasındadır ki, Qüdrət çoxumuz kimi mərhum
Tofiq müəllimin həm tələbəsi olmuş, həm
də qəzetdə onunla rəhbərliyi altında
çalışmışdı. Piriyev yüksək mədəniyyəti
və mənəviyyatı ilə sonsuz qürur duyduğu
müəllimi barədə gözəl bir oçerk ərsəyə gətirə bilmişdi.
Bu
yerdə bir təklifimi dilə gətirmək istəyirəm.
Hesab edirəm ki,
Qüdrət Piriyev kimi zəngin yaradıcılıq təcrübəsinə
malik olan jurnalistlərin həyatlarını qəzetçilik
peşəsinə həsr etməyə hazırlaşan tələbələr
üçün "ustad dərsləri" keçməsinə
şərait yaradılmalıdır. Xarici ölkələrdə çoxdan
belə bir uğurlu praktika var. BDU-nun jurnalistika fakültəsinin
rəhbərliyi də bu barədə düşünsəydi,
pis olmazdı.
Q.Piriyev hər hansı bir mövzuda və janrda yaxşı yazmağı bacaran universal jurnalistdir. Lakin qeyd etdiyim kimi, oçerkləri onun yaradıcılığında xüsusi yer tutur. Oçerk janrı, həqiqətən onun stixiyasıdır. Dəfələrlə şahidi olmuşam ki, ən dar məqamlarda belə o, kabinetində qapanıb 4-5 saat ərzində sujet və məzmun baxımından mükəmməl oçerklər ərsəyə gətirib. Bu yazıların üzərində təzədən işləməyə, nəyisə dəyişib əlavə etməyə ehtiyac olmayıb.
O, dərin inam və inanc sahibidir. Hacıdır. 1999-cu ilin baharında müqəddəs Həcc ziyarətində olmuş, oradan qayıdandan sonra "Xalq qəzeti"ndə bu barədə olduqca duyğulu xatirələrini gözəl bir tərzdə qələmə almışdır. Etiraf edim ki, həmin silsilə yazılar bu mövzuda oxuduğum çox sayda məqalələr arasında hələlik ən parlağıdır.
Hacı Qüdrət Piriyev həyatda uca Allahın lütfü ilə halallıq, mənəvi təmizlik, ədalət yolunu tutaraq, bu gün özü, ailəsi, savadlı, bilikli, ən başlıcası yüksək tərbiyəli övladları ilə bərabər, xalqımıza, millətimizə, dövlətçiliyimizə sidq-ürəklə xidmət edir, dostun-tanışın, qohum-qardaşın xeyrində-şərində yaxından iştirak etməyi özünə borc bilir. Buna görə də, o, el-oba arasında həqiqi ağsaqqallıq səviyyəsinə yüksələ bilmişdir.
Məsaim ABDULLAYEV
Əməkdar mədəniyyət
işçisi
525-ci qəzet.- 2020.- 3 oktyabr.- S.21.