"Azərbaycan" jurnalının yeni sayı çıxıb

Bu günlərdə Azərbaycan Yazıçılar Birliyinin mətbu orqanı "Azərbaycan" jurnalının 5-6-cı sayı işıq üzü görüb.

Jurnal Xalq şairi Rəsul Rzanın 110 illik yubileyinə həsr olunmuş xüsusi bölmə ilə açılır. Bölmədə Əhməd Qəşəmoğlunun "Rəsul Rza" poemasından parçalar və Eşqanə Babayevanın "Dəniz Rəsul Rza və Fazil Hüsnü Dağlarca poeziyasında" məqalələri verilib.

"Poeziya" bölməsində Süleyman Abdulla, Eldar İsmayıl Böyüktürk, Tahir Taisoğlu, Ağasəfa, Musa Ələkbərli, Vasif Süleyman, Xosrov Natil, Müzəffər Məzahim, Məhərrəm Vüqarlı və İbrahim İbrahimlinin şeirləri çap olunub.

"Nəsr"də Elçin Hüseynbəylinin "Vida" povesti, Azər Abdullanın "Çat" romanının sonu və Müzahim İsmayılzadənin "Hasarın o üzü" hekayəsi yer alıb.

"Yeni tərcümələr" rubrikasında Yeremey Aypın "Mənim şahzadəm", Yuri Solovyovun "Gözlənilməz görüş" hekayələri Məmməd Orucun tərcüməsində təqdim olunub.

Fuad Vəliyevin "Ağıldan bəla" məqaləsi "Publisistika", Vaqif Yusiflinin "Mən də yaşayacağam" yazısı "Dünya, səndən kimlər keçdi..." rubrikalarındadır.

"Ədəbi portretlər"də oxucular Qəşəm Nəcəfzadə "Söyüdlü arxın düşüncələri", Bədirxan Əhmədlinin "Rabindranat Taqor: Nobelə gedən yol" məqalələrini oxuya biləcəklər.

Zümrüdün hazırladığı "Ədəbi kaleydoskop" rubrikasında yazıçı Herbert Uelsin yaradıcılığı, əsərləriylə bağlı maraqlı faktlar verilib.

Ənənəvi olaraq jurnalın "Kitab rəfi" rubrikasında yeni nəşrlərdən söz açılır.

Şahanə MÜŞFİQ

525-ci qəzet.- 2020.- 23 sentyabr.- S.13.