Qənirə Paşayeva Xalq şairi Fikrət Qoca ilə görüşüb

Milli Məclisin Mədəniyyət Komitəsinin sədri Qənirə Paşayeva Azərbaycan Yazıçılar Birliyində Xalq şairi, Birliyin birinci katibi Fikrət Qocayla görüşüb.

Şairin 85 illik yubileyi və "İstiqlal" ordeninə layiq görülməsi münasibətilə keçirilən görüş haqqında millət vəkili özünün sosial şəbəkə hesabında paylaşım edib:

"Azərbaycan Yazıçılar Birliyinin I katibi, Xalq şairi Fikrət Qocanın 85 illik yubileyi münasibəti ilə Yazıçılar Birliyində olduq. Hörmətli şairimizi həm yubileyi, həm də cənab Prezidentin imzası ilə "İstiqlal" ordeni ilə təltif olunması münasibəti ilə təbrik etdik.

Görkəmli şairimizi Milli Məclisin Mədəniyyət komitəsi adından və şəxsən öz adımdan təbrik edərkən, onun uzun illər ədəbiyyatımıza yorulmadan xidmət etdiyini, söz sənətimizi zənginləşdirdiyini, klassiklərin ənənələrini yeni məzmun və formalarda davam və inkişaf etdirdiyini, Yazıçılar Birliyinin rəhbərlərindən biri kimi də, ictimai-mədəni mühitimizdə özünəməxsus rola, nüfuza malik olduğunu vurğuladıq.

Fikrət müəllimin təqdirəlayiq fəaliyyəti, ədəbiyyat qarşısında xidmətləri dövlətimiz tərəfindən həmişə yüksək qiymət alıb. 85 illik yubileyi münasibəti ilə ali ordenlə təltif olunması bu qiymətin parlaq təcəssümüdür.

Ustad şairimizi bir daha təbrik edir, möhkəm can sağlığı, yeni yaradıcılıq uğurları arzulayırıq!"

Ona göstərilən bu diqqətə görə təşəkkürünü bildirən Fikrət Qoca dövlətin ədəbiyyata, mədəniyyətə hər zamankı qayğısından razılığını ifadə edib.

Şahanə MÜŞFİQ

525-ci qəzet.- 2020.- 3 sentyabr.- S.13.