AMEA Naxçıvan Bölməsində qədim əlyazmaların təqdimatı olub

AMEA Naxçıvan Bölməsində Naxçıvan Muxtar Respublikasının Mədəniyyət Nazirliyi tərəfindən bu elmi qurumun Əlyazmalar Fonduna hədiyyə edilən qədim əlyazma və çap kitablarının təqdimatı olub.

Naxçıvan Bölməsinin mətbuat xidmətindən AZƏRTAC-ın Naxçıvan bürosuna bildirilib ki, bölmənin sədri, akademik İsmayıl Hacıyev təqdimat mərasimində çıxış edərək, muxtar respublika ərazisindən toplanılan əlyazma və qədim çap kitablarının tariximizin və mədəniyyətimizin öyrənilməsi baxımından əhəmiyyətini qeyd edib. Alim daim dövlət qayğısı ilə əhatə olunan Əlyazmalar Fondunun 15 il ərzində muxtar respublikaya aid müxtəlif tarixi qaynaqları əhatə edən nəşrlərlə xeyli zənginləşdiyini deyib. Bildirib ki, fondda mühafizə olunan əlyazmaların bəziləri Naxçıvan Muxtar Respublikasının Ali Məclisinin Sədri Vasif Talıbov tərəfindən hədiyyə olunub.

İsmayıl Hacıyev Mədəniyyət Nazirliyi tərəfindən müxtəlif tarixi qaynaqları əhatə edən yeni əlyazma və qədim çap kitablarının bölmənin Əlyazmalar Fonduna hədiyyə edilməsinin artıq ənənə halını aldığını deyib. Qeyd edib ki, fondun balansına daxil olan nümunələr əməkdaşlar tərəfindən bərpa edilir, cildlənir və onlara müəyyən gigiyenik xidmət göstərildikdən sonra sistemli tədqiqatlara cəlb olunur.

Naxçıvan Muxtar Respublikasının Mədəniyyət naziri Natəvan Qədimova çıxış edərək bildirib ki, Azərbaycan xalqı əvəzsiz yazı, əlyazma sərvəti ilə dünya mədəniyyətində layiqli yer tutub. Bu gün tarixin müxtəlif dövrlərində əlyazma və kitab şəklində yazıya alınmış qədim nümunələr xalqımızın milli mədəniyyətini və qədim keçmişini, eləcə də dərin bilik və mədəni qabiliyyətini özündə ehtiva edir.

Qeyd olunub ki, Naxçıvan Bölməsinə hədiyyə edilən qədim əlyazma və kitablar diyarın qədim tarixinin, burada mövcud olmuş zəngin mədəniyyətin elmi şəkildə və əhatəli formada öyrənilməsində, eyni zamanda, təbliğində mühüm rol oynayacaq.

Natəvan Qədimova Naxçıvan Muxtar Respublikasında mədəniyyətimizin, tariximizin öyrənilməsinə, bu sahələrin elmi əsaslarla əhatəli şəkildə tədqiqinə göstərdiyi böyük diqqət və qayğıya görə ziyalılar adından Naxçıvan Muxtar Respublikası Ali Məclisinin Sədrinə minnətdarlığını bildirib.

Əməkdar mədəniyyət işçisi Akif Hacıyev tarix və mədəniyyətimizin, milli-mənəvi dəyərlərimizin araşdırılması, qorunması, təbliğinin və gələcək nəsillərə ötürülməsi hər kəsin vətəndaşlıq borcu olduğunu deyib.

Tədbirdə Əlyazmalar Fondunun direktoru, filologiya elmlər doktoru Fərman Xəlilov Mədəniyyət Nazirliyi tərəfindən fondun balansına 39 adda qədim əlyazma və çap kitabı daxil olunması ilə bağlı məlumat verib. Bildirib ki, XIX əsrin ikinci yarısı - XX əsrin əvvəllərinə aid, Azərbaycan, ərəb və fars dillərində olan kitablar arasında Sədi Şirazinin “Gülüstan”, Rəşid bəy Əfəndiyevin “Bəsirətul-ətfal”, Bəhaəddin Məhəmməd Amilinin çapı Məşədi Hacı tərəfindən sifariş edilən “Cameyi-Abbasi”, Əli ibn Məhəmmədhəsən Təbrizinin “Pəncah hədis”, Hafiz Şirazinin “Qəzəliyyat”, “Zinətul-məcalis” və digər elmi, bədii, dini kitablar, həmçinin dərs vəsaitləri də yer alıb. Bunlar içərisində XX əsrin əvvəllərində Bakıda çap olunan Hüseyn Cavidin “Şeyx Sənan”, Abdulla Şaiqin “İldırım”, Əbdürrəhim bəy Haqverdiyevin “Şeyx Şəban” və “Bəxtsiz cavan” kitabları da var.

Fərman Xəlilov nazirlik tərəfindən ötən dövr ərzində Əlyazmalar Fonduna, ümumilikdə, 100-ə yaxın qədim əlyazma və çap kitablarının verildiyini diqqətə çatdırıb. O, fond əməkdaşları tərəfindən nəşr etdirilən “Farsdilli əlyazma və əski çap kitablarının kataloqu” və “Türkdilli əlyazma və çap kitabları kataloqu”nu Mədəniyyət nazirinə təqdim edib. Bildirib ki, fondun balansına daxil edilən yeni kitablar da gələcəkdə hazırlanan kataloqlara salınacaq.

Sonda tədbir iştirakçıları fonda hədiyyə edilən qədim əlyazma və çap kitabları ilə yaxından tanış olublar.

525-ci qəzet.- 2020.- 11 sentyabr.- S.9.