Bu televiziya ki var...

Məşhurlardan birinin sözüdür: "Televiziya o dərəcədə önəmlidir ki, onu ancaq televiziya işçilərinin öhdəsinə buraxmaq olmaz" . Son illərin hadisələri göstərir ki, doğrudan da, bu belədir və populyar filmlərdən birində deyildiyi kimi: "Bu televiziya ki var..." çox çətin və çətin, qəliz olduğu qədər də vacib bir sahədir və bu səbəbdən həddən artıq umduğumuz efirdən, onun uğurlu və uğursuz tərəflərindən ürəklə yazmağı da bacarmaq lazımdır. Bu mənada zaman-zaman tamaşaçı zövqünü korlayan, günün tələblərinə cavab verməyən, mənəvi-əxlaqı dəyərlərimizlə səsləşməyən halların təbliğ olunduğu ayrı-ayrı proqramların efirlərə ayaq açmasının ictimai müzakirəyə çıxarılması təbiidir.

Başlayaq ondan ki, son dövrlər İctimaiyyəti narahat edən və ən çox müzakirə olunan məsələlərdən biri televiziya kanallarında aşağı səviyyəli, keyfiyyətsiz, əyləncə və şou-biznes xarakterli verilişlərin çəkisinin artmasıdır. Hər hansı bir ictimai dəyəri olmayan mövzulara həsr olunan verilişlərin hazırlanması, cəmiyyətdə xoşagəlməz, bəzən iyrənc halların, hadisələrin çılpaqlığı ilə işıqlandırılması son nəticədə gənclərin və yeniyetmələrin zövqünü zədələyir, dünyagörüşünü korlayır. Bəzən bunu reytinq xatirinə, hazırkı rəqabət mühitində öndə getmək, lider mövqedə dayanmaq naminə edildiyini söyləyənlərə eyni səmimiyyətlə deməliyik ki, bu belə deyil. Heç nə mənəvi dəyərlərimizdən, adət-ənənələrimizdən üstün tutula bilməz...Bu, əslində çox geniş mövzudur... Danışdıqca danışılacaq, yazıldıqca yazılacaq...

Bununla yanaşı, efirdəki müsbət dəyişiklikləri, tamaşaçı rəğbəti qazanan layihələri, intellektual səviyyəni inkişaf etdirən, vətənpərvərlik duyğularını gücləndirən, bir növ mənəviyyata xidmət edən proqramları da qeyd etməliyik.

D.Frostalicin bir sözü var: "Televiziya elə adamlardan həzz almağa imkan verir ki, onları biz evin kandarına da buraxmarıq". Demək hər şey elə efirdən - o sehirli güzgüdən bizə baxan insanlardan -aparıcılardan, proqrama dəvət alan qonaqlardan, ekspertlərdən başlayır. Tamaşaçı hər gün səhər, axşam ona müraciət edən bu simaların səmimiyyətinə, səviyyəsinə, biliyinə inanmaq istəyir. Çünki bu xüsusiyyətlər olmadan hansı haqla efirdən tamaşaçıya xitab etmək, ona "ağıl vermək" səlahiyyətinin olduğuna iddia edə bilərsən?!

Bu mənada televiziya kanallarının rəhbərləri, mütəxəssislər, ekspertlər cəmiyyətin tələblərini, ictimai marağı, tamaşaçıların istək və arzularını öyrənməli, efir məkanının tarazlığına, mövcud nöqsanların aradan qaldırılmasına səy göstərməlidirlər.

Milli-mənəvi dəyərlərin qorunması cəmiyyətin ən "yaralı yeri"dir desək, yanılmarıq. Nə yaxşı ki, bizi əhatə edən efir bolluğunda uzun illərdir bu dəyərləri həm qoruyan, həm də yaşadan AzTV var...

Tamaşaçı, əsasən, televiziyalardan gözlədiklərini, umduqlarını burada tapa bilir, bu "ailə efiri"ni doğma ocağında, uşaqları ilə rahat, sevə-sevə izləyir. Bilir ki, bu kanalın efirindən onun evinə ancaq xoş ovqat, sevgi, ümid ötürüləcək. Doğru deyiblər, təqlid heç zaman uğur gətirmir. Bəziləri xarici kanallardakı müəyyən layihələri götürüb yüngülcə "əl gəzdirməklə" Azərbaycan tamaşaçısına "yeni bir hadisə" kimi təqdim etməyə çalışırlar... Nəticə isə göz önündədir... Unutmayaq ki, biz özümüz özümüzlə olanda daha yaxşı, qeyri-adi və təkrarsız görünürük. Əlbəttə, dünyada baş verən bütün yenilikləri izləyib, onlardan bəhrələnib və son nəticədə onu öz həyat fəlsəfəmizə uyğun şəkildə tamaşaçıya təqdim edə biliriksə, bu başqa... . Bax AzTV son illər bunu etməyə daha çox can atır və istəyinə, demək olar ki, çatır.

"Belə-belə işlər", "Əsrlər, nəsillər", "Tarixin izi ilə", "Texno Xəbər", "Döyüşçü", "Oxuyan Vətən", "Körpü", "Çıxışa doğru"... Demək olar ki, adını çəkdiyim və çəkə bilmədiyim AzTV ilə yanaşı İdman və Mədəniyyət kanallarında yayımlanan bu kimi layihələr Azərbaycan efirində ən çox baxılan və gözlənilən proqramların önündə gedir və böyük tamaşaçı auditoriyasına sahibdir. Çünki burda TV birbaşa üzərinə düşən missiyanı - maarifçiliyi uğurla yerinə yetirməyi bacarır. İnternetin dünyada əhatə dairəsinin günü-gündən genişləndiyi bir dövrdə: "Televiziyalara, doğrudanmı, baxılır?"- sualına burada artıq əminliklə cavab verə bilərik: maraqlı süjet xətti, kreativ düşüncə məhsulu olan, müasir tələblərə cavab verən verilişə mütləq baxılır. Bu mənada yeknəsəqlikdən yorulan, "özünü başqa yerdə axtaran" tamaşaçını yenidən ekranlara bağlamağın yolu çox sadədir: keyfiyyətli iş, səmimi ünsiyyət, təmiz söhbət... Əminliklə deyə bilərik: AzTV bunun öhdəsindən böyük ustalıqla gəlir. Peşəkarların illərə söykənən təcrübəsi, yeniliyə can atan yaradıcı gənclərin bir araya toplanması və hər cür maraqlı layihəyə, təklifə açıq olan rəhbərlik... Bu keyfiyyətləri özündə cəmləşdirən AzTV, sözün həqiqi mənasında, cəmiyyətin televiziyası, tribunası olmaq rolunun öhdəsindən ləyaqətlə gələ bilir. Dövlət Televiziyamızın bir çox nailiyyətlərə imza atması, texniki və yaradıcılıq baxımdan ildən-ilə inkişaf etməsi də buna bir sübutdur.

AzTV-dən danışarkən ictimai-siyasi xarakterli proqramlara mütləq toxunmalıyıq. Yadımdadır, vaxtilə AzTV-nin "Xəbərlər"i ancaq müəyyən "qrup" insanlara "maraqlıydı": kimi çıxardılar, kimi təyin etdilər, kim mühakimə olundu və s... Artıq "Xəbərlər"in auditoriyası çox genişlənib. Çünki burada günün ən mühüm hadisələrini rahatlıqla izləyə bilirsən. "Əsas məsələ", "Obyektiv" kimi proqramlarda ən aktual məsələlər operativ şəkildə müzakirəyə çıxarılır. Gündəlik "Xəbərlər"i və bazar günləri yayımlanan, artıq öz geniş auditoriyası olan " Həftə" siyasi-analitik proqramını izləməklə ölkəmizdə və dünyada baş verən ən mühüm hadisələrin "iştirakçı"sına çevrilə bilərsiniz.

AzTV-nin peşəkarlığı artırmaq, nəzəriyyəni praktika ilə birləşdirmək yolunda atdığı uğurlu addımlardan biri də Teleradio Akademiyasının təşkilidir. İndiyə kimi Jurnalistika fakültəsində daha çox nəzəri biliklərə yiyələnənlər artıq bunu praktikada həyata keçirmək, redaksiyalarda iş tapmaq imkanı da qazanırlar.

Televiziyanın yaradıcılarından biri olan Filo Teylor Farnsuort öz övladlarına televiziyaya baxmağı məsləhət görməyib. Səbəbini isə çox sadə izah edib: orada baxmaq üçün elə də maraqlı bir şey yoxdur. Amma bu mümkün olubmu? Təbii ki, yox. Bu televiziya ki var, artıq mümkünsüzü də mümkün edə bilir deyəsən...

Kəmalə ƏVƏZ

525-ci qəzet.- 2021.- 21 dekabr.- S.11.