Qüdrətli rəhbər, müzəffər sərkərdə

Prezident İlham Əliyev 60 yaşını Qalib Ali Baş Komandan, dünyada nüfuzlu siyasi lider kimi qeyd edir

Bu gün ömrünün yeni bir müdriklik çağını - 60 yaşını bütün Dünya azərbaycanlıları olaraq hamılıqla qeyd etdiyimiz Azərbaycan Prezidenti, Ali Baş Komandan, Böyük Zəfərlə başa çatmış 44 günlük Vətən müharibəsindəki qələbəmizin memarı cənab İlham Əliyevin fəaliyyəti dövlətimizin başçısı seçilməzdən xeyli əvvəl - hələ Dövlət Neft Şirkətinin birinci vitse-prezidenti vəzifəsində çalışdığı dövrlərdən ictimaiyyətin gözü qarşısında idi. Cənab Prezident Azərbaycan mətbuatında ilk böyük müsahibəsini 1998-ci ilin oktyabrında məhz "525-ci qəzet"ə vermişdi. "Neft bizim üçün məqsəd yox, vasitə olmalıdır" başlıqlı həmin müsahibədə İlham Əliyev Azərbaycanın gələcəyi və iqtisadi inkişafı ilə bağlı proqnozlarını açıqlamışdı.

Həm bu müsahibəni, həm də ümumən İlham Əliyevin 1998-2003-cü illərdəki siyasi fəaliyyəti ilə bağlı "525-ci qəzet"də dərc olunmuş yazıları ayrıca kitab halında nəşr etdirmişdik. Təxminən 18 il əvvəl işıq üzü görən, "Siyasi olimpə doğru" adlanan həmin kitabda İlham Əliyevin fəaliyyəti müxtəlif yönlərdən işıqlandırılmış, ayrı-ayrı müəlliflərin öz yazılarında onun Azərbaycanın Avropa Şurası Parlament Assambleyasındakı nümayəndə heyətinin rəhbəri kimi hər bir sənədə necə böyük həssaslıqla, dərin məsuliyyət hissi ilə yanaşması, Azərbaycanın milli maraqlarına, dövlət mənafeyinə cavab verən hər bir ifadənin Assambleyanın sənədlərinə salınması yönündəki ardıcıl fəaliyyəti barədə ətraflı təhlillər yer almışdı. Zaman-zaman İlham Əliyevin atdığı hər bir addımın arxasında gələcəyə hesablanmış böyük məqsədlərin dayandığı öz təsdiqini dəfələrlə tapmış oldu.

2003-cü ilin Prezident seçkisi ərəfəsində dövlətimizin başçısı - Ümummilli lider Heydər Əliyev Klivlenddən Azərbaycan ictimaiyyətinə ünvanladığı müraciətində Prezidentliyə namizəd İlham Əliyevə böyük inamını ifadə edərək xalqı seçkilərdə onun namizədliyini dəstəkləməyə çağırdı. Ulu öndərin "Mən İlham Əliyevə özüm qədər inanıram" sözləri ictimaiyyətdə ona sonsuz etimad yaratmaqla bərabər, Azərbaycanın gələcək taleyi ilə bağlı müəyyən tərəddüd və nigarançılıqlara da son qoydu. Düzdür, arxada qalan bu illər ərzində dövlət başçısı kimi İlham Əliyevi kifayət qədər yaxından tanımaq imkanımız olmuşdu, ölkədə aparılan çoxşaxəli islahatların, gerçəkləşdirilən genişmiqyaslı, saysız-hesabsız layihələrin Azərbaycanın sosial-iqtisadi, ictimai-mədəni həyatında ciddi dönüş yaratdığını, əhalinin sosial rifahının ildən-ilə daha da yaxşılaşdırılması istiqamətində ciddi uğurlar qazanıldığını, xarici siyasət kursundakı incə və peşəkar korrektələrin dövlətimizin beynəlxalq aləmdə nüfuzunun artırılması baxımından böyük əhəmiyyət daşıdığını dəfələrlə görmüşdük. Amma 2020-ci ilin 27 sentyabrında başlanan 44 günlük Vətən müharibəsində dövlət başçısı kimi İlham Əliyevin yeni və çox önəmli digər keyfiyyətlərini böyük qürur hissi ilə müşahidə etdik, məğrur, qətiyyətli, əyilməz Ali Baş Komandan obrazına heyran qaldıq və Ümummilli liderin həmin sözlərini dönə-dönə yenidən xatırladıq.

Bu günlərin təəssüratı ilə mən, qeyri-ixtiyari olaraq, 1995-ci ildə Ulu öndər Heydər Əliyevin Xocalı sakinlərilə keçirdiyi görüşü xatırladım. Həmin görüşdən bir qədər əvvəl Ümummilli lider 26 fevralın hər il Azərbaycanda Xocalı soyqırımının anım günü kimi qeyd olunması ilə bağlı fərman imzalamışdı. Görüşdə Xocalı sakinlərini dinlədikcə gözlərindən kədər yağan Heydər Əliyev - bir vaxtlar SSRİ kimi nəhəng, dünyanın super dövlətlərindən birinin rəhbərlərindən olmuş böyük siyasətçi xeyli üzgün halda dərindən köks ötürsə də, əminliklə ifadə etmişdi ki, mülki insanlara qarşı belə qəddarlıq heç vaxt cəzasız qalmayacaq, bu soyqırımı törədənlər bir gün mütləq öz cəzalarını alacaqlar.

Ümummilli lider bu fikirləri dilə gətirəndə Azərbaycan müstəqilliyini yeni bərpa etmiş, iqtisadi cəhətdən zəif bir dövlət idi. Dağlıq Qarabağ münaqişəsilə bağlı çətin danışıqlar prosesi gedirdi. Bu sözləri deyərkən sanki Heydər Əliyev bir yandan gələcəyə ümid bəsləyir, Azərbaycan xalqının bir gün bu qisası alacağına inanır, bir yandan da BMT-nin məlum qətnamələrinin icra olunmadığı, dünyada ikili standartların hökm sürdüyü və bizim faciələrimizə biganə yanaşıldığı, özümüzün isə zəif olduğumuz bir vaxtda ilahi ədalətə, ilahi qüvvənin köməyinə inamını ifadə edirdi. Həmin an 1992-ci ilin fevralında, o faciəni yaşadığımız günlərdə Ağdama pənah gətirmiş Xocalı sakinlərinin ah-fəryadı, tez-tez onların dilindən eşitdiyim "Allah bu zülmü yerdə qoymaz" sözləri yadıma düşmüşdü. Hələ də xatırlayıram, məhz o zaman bu faciəni yaşayan, gücsüz və çarəsiz vəziyyətdə olan insanların tək ümidi Allaha idi.

Mərhum Xalq şairimiz Vaqif Səmədoğlunun belə bir misrası var: "Allaha kömək vaxtıdır". Mənə elə gəlir ki, əvvəl Heydər Əliyevin, daha sonra isə İlham Əliyevin Xocalı faciəsini dünyaya tanıtmaq, erməni faşizminin mahiyyətini faş etmək, həm dövlətimizin, həm də ictimai təşkilatların bu məqsədlə gördüyü işlər, "Xocalıya ədalət" kampaniyası, bütün beynəlxalq qurumlarda qəbul olunan sənədlər, hər deyilən söz, hər işlədilən kəlmə, hər görülən iş, atılan hər qətiyyətli addım bu illərdə məhz Allaha ilahi ədalətin bərpası naminə kömək cəhdləri idi. İşğalçı düşmənə, erməni faşizminə layiqli cəzanın verilə biləcəyi məqamı isə "Mən nəyi nə zaman edəcəyimi bilirəm" deyən Prezident İlham Əliyev hamımızdan çox gözləyir və hər birimizdən də yaxşı duyub dərk edirdi. Bu illər ərzində təcavüzkarın törətdiyi vəhşiliklərə, Dağlıq Qarabağdakı xunta rejiminin çıxardığı çirkin oyunlara böyük təmkin və səbrlə yanaşırdı.

2020-ci il oktyabrın 4-də, Vətən müharibəsinin başlanmasının 8-ci günündə Cəbrayıl şəhərinin işğaldan azad olunması münasibətilə xalqa müraciətində biz Azərbaycan rəhbərini məğrur, müzəffər və qətiyyətli Ali Baş Komandan kimi bir daha gördük və buna ürəkdən, bütün varlığımızla inandıq. O, "Bizim müqəddəs şəhərimizi murdarlayırlar" deyə Şuşa haqqında danışır, Cəbrayılın işğaldan azad olunmasını böyük fəxarət hissilə vurğulayırdı. Ali Baş Komandanın "Bizim işimiz haqq işidir, biz qalib gələcəyik" sözləri isə həmin o ilahi ədalətin təcəlli etdiyini, o müqəddəs anın artıq gəlib çatdığını göstərirdi. Prezident İlham Əliyevin ən yaxın silahdaşı, Birinci vitse-prezident Mehriban Əliyevanın elə o ərəfələrdə sosial şəbəkələrdə paylaşdığı "Qoy uca Tanrı hər bir Azərbaycan vətəndaşına müqəddəs Qarabağ torpağını öpməyi nəsib etsin" sözləri isə Azərbaycan xalqında torpaqlarımızın işğaldan tamamilə azad olunacağına, üçrəngli bayrağımızın Şuşada dalğalanacağına sonsuz əminlik yaratdı. Əsgər və zabitlərimizin, ümumən ordumuzun, insanlarımızın böyük ruh yüksəkliyi də bundan xəbər verirdi. Azərbaycan Prezidenti hər çıxışı ilə həm xalqa böyük ruh verir, həm də xarici ölkələrin nüfuzlu media orqanlarına verdiyi müsahibələri ilə uzun illərdən bəri informasiya savaşında üzləşdiyimiz bütün sədd və baryerləri öz dəmir məntiqi ilə vurub dağıdır, savaş meydanında hər gün irəliləyən şanlı ordunun Ali Baş Komandanı, siyasət meydanında güclü təzyiqlərə sinə gərən qüdrətli dövlət xadimi kimi davamlı olaraq zəfər tariximizin parlaq səhifələrini yazırdı.

Şəhər və kəndlərimiz bir-birinin ardınca azad olunduqca xalqa müraciətləri ilə insanları dərindən təsirləndirib kövrəldən, eyni zamanda həm də ruhlandıran Prezident İlham Əliyevin təhkiyəsi, danışıq üslubu, ürəkdən tikan çıxaran sözləri hər birimizin könlünü oxşayırdı. "Azərbaycan xalqının ləyaqəti bərpa olunur" deməklə xalqın qürurunu özünə qaytarır, "Şuşasız bizim işimiz yarımçıq qalar" sözləri ilə hər birimizin içindəki mübhəm, nisgilli arzunun həyata keçəcəyinə inamı daha da gücləndirirdi.

Hələ 2013-cü ildə jurnalistlər üçün inşa olunmuş yaşayış binasının Prezident İlham Əliyevin də iştirak etdiyi açılış mərasimindəki çıxışım zamanı dövlət başçısının öz 50 illik yubileyini Ağcabədidə, Taxta körpüdə laçınlı məcburi köçkünlərlə keçirdiyini yada salaraq, bu addımın böyük jest, eyni zamanda, işğalçı dövlətə bir mesaj olduğunu bildirmişdim. Çıxışımda Şuşanı da xatırlamış, İlham Əliyevin hələ 1980-ci illərin əvvəllərində valideynlərilə birlikdə Şuşada, Cıdır düzündə olduğunu qeyd etmişdim. Şübhəyə yer qoymayan bir əminliklə Prezidentə xitabən demişdim ki, biz inanırıq, Sizin Ali Baş Komandanlığınızla torpaqlarımız işğaldan azad ediləcək, Azərbaycan bayrağı Şuşada dalğalanacaq və bir gün Siz Azərbaycan yazarlarının əsərlərində nisgilli bir ah kimi keçən Cıdır düzünün həndəvərində yaradıcı insanlar üçün bir yaradıcılıq evinin təməlini qoyacaqsınız. Həqiqətən də, istər həmin vaxt, istərsə ondan sonrakı illərdə yaradıcı insanların içində bu möhtəşəm arzunun bir gün mütləq gerçəkləşəcəyinə sonsuz inam həmişə, hər saat olub.

Noyabrın 8-də - Şuşanın azad edildiyi möhtəşəm Zəfər günündə Ümummilli liderin məzarını ziyarət edərkən müzəffər Ali Baş Komandanın "Xoşbəxt insanam ki, ata vəsiyyətini yerinə yetirdim" və Şəhidlər xiyabanında dilə gətirdiyi "Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik!" sözləri uşaqdan böyüyə qədər hamının dilinin əzbərinə çevrildi.

Böyük Zəfərimizdən sonra Cəbrayılda, daha sonra Ağdam Cümə məscidinin önündə çıxış edən Ali Baş Komandan deyirdi: "Azərbaycan xalqının cəlladları, Xocalı cəlladları, biz sizi məğlub etmişik, sizin ordunuzu məhv etmişik". Həmin an Ümummilli liderin Xocalı sakinləri ilə görüşdə əminliklə dediyi fikirləri xatırlayır və ilahi ədalətin bərpa olunduğunu, qatillərin məğlubiyyətini düşünürdüm.

Möhtəşəm qələbədən sonra, yanvarın 14-də Şuşaya ilk səfəri zamanı Azərbaycan Respublikasının Prezidenti, Ali Baş Komandan cənab İlham Əliyevin dilindən möcüzə şəhər haqqında o gözəl və səmimi sözləri eşitdik: "Biz dünən gecə Şuşada qalmağa qərar verdik, halbuki Bakıya qayıtmalı idik. Ancaq mən hesab etdim ki, mütləq gecə Şuşada qalmalıyıq. Çünki Azərbaycan Prezidenti ilk dəfədir ki, Şuşaya gəlib. Bizim müstəqilliyimizin təxminən otuz yaşı var. Ancaq bu otuz il ərzində birinci dəfə Azərbaycan Respublikasının Prezidenti, Ali Baş Komandan Şuşaya gəlib, Şuşada qalıb və sözün düzü, Şuşadan getmək istəmir. Şəhərin nadir memarlığı, relyefi, təbiəti, havası, aurası təkrarolunmazdır. Bir daha gördüm ki, bu şəhərin nadir aurası, təbiəti, memarlığı bizim böyük sərvətimizdir".

Dövlət başçısı martın 16-da - Novruz bayramı ərəfəsində ilaxır çərşənbəsi günü yenidən Şuşaya səfər etdi. Bu səfər zamanı Cıdır düzündən xalqa müraciət edən dövlət başçısı Şuşanın və azad edilən bütün torpaqların sürətlə bərpa olunacağını vurğuladı: "Şuşa bizim qədim şəhərimizdir. Erməni təbliğatı, saxta alimlər, fırıldaqçı siyasətçilər, beynəlxalq dairələr nə qədər desələr də, xeyri yoxdur, tarix var. Pənahəli xan Şuşanın təməlini qoydu, Şuşanı tikdi, qurdu. Biz isə Şuşanı əsarətdən çıxardıq və xalqımıza qaytardıq, dövlətimizə qaytardıq. Şuşa qədim Azərbaycan şəhəridir, həmişə belə olub. Son 28 il ərzində mənfur düşmən nə qədər çalışsa da, Şuşanın Azərbaycan ruhunu, Azərbaycan görkəmini dəyişdirə bilməyib. Biz Şuşanı bərpa edəcəyik, mütləq bərpa edəcəyik. Biz nəinki Şuşanı, azad edilmiş bütün torpaqları bərpa edəcəyik".

Cənab Prezident hər dəfə Şuşada olarkən müqəddəs şəhərimiz barədə dərin mənalı, sevgi dolu fikirlər səsləndirir. Mayın 12-də Cıdır düzündə "Xarıbülbül" musiqi festivalının açılışındakı çıxışına "Biz Şuşanın azadlığını qəhrəman əsgərlərimizə borcluyuq" sözlərilə başlayan dövlət başçısı işğaldan azad olunandan sonra Şuşaya üçüncü dəfə gəldiyini dedi: "Mən, artıq 3-cü dəfədir, Şuşadayam və demişəm ki, hər dəfə bura gələndə burada qalmaq istəyirəm, buradan ayrılmaq istəmirəm. Şuşanın özünəməxsus aurası var. Mən dünyada Şuşaya bənzər şəhər görməmişəm, bəlkə də yoxdur".

Azərbaycan Prezidentinin Şuşa sevgisi ilahi sevgidir. Avqustun 29-da başlanan Vaqif Poeziya Günlərində Şuşa haqqında danışarkən onun çöhrəsini ilahi bir nur bürümüşdü. O qədər şövqlə, ürəkdən, içdən danışırdı ki, bu sevginin hərarəti dinləyənlərə də sirayət edir, onları da ovsunlayır, Şuşanı görməyənlər də, tanımayanlar da bu möcüzə-şəhərin heyranına çevrilirdi. Hər sözündə, hər kəlməsində Şuşaya canlı insan kimi xitab edir, sanki canlı insanla təmas yaradırmış kimi onunla qəribə bir canıyananlıqla ünsiyyət qururdu.

Azərbaycan Prezidentinin diqqəti daha çox cəlb edən addımlarından biri də Ali Baş Komandan kimi hər zaman ordumuza göstərdiyi həssas münasibət, böyük diqqət və qayğıdır. Böyük zəfərimizi şərtləndirən başlıca amillərdən biri də, bəlkə, elə bu diqqət və qayğı idi. Təsadüfi deyil ki, bir qayda olaraq öz çıxış və nitqlərində Azərbaycan əsgərinin döyüş əzmini yüksək qiymətləndirən dövlət başçısı Zəfər gününü də məhz Şuşada, məhz hərbçilərlə birlikdə qeyd elədi.

Sonsuz sayğıya, böyük ehtirama layiq Şuşa sevgisi budur!.. Bu sevginin daha bir təcəssümü kimi bu il iyun ayının 15-də iki qardaş ölkə - Azərbaycan və Türkiyə arasında imzalanan müttəfiqlik sənədi - Şuşa bəyannaməsi həm də bu doğma, müqəddəs şəhərə verilən böyük dəyər mənasında simvolik məna kəsb edirdi.

Diqqət yetirsək, görərik ki, Azərbaycan-Türkiyə münasibətlərinin böyük sürətlə, ardıcıl inkişafı daima Prezident İlham Əliyevin uzaqgörən və məqsədyönlü siyasətinin prioritetlərindən olub. Cənab Prezident Türkiyə barədə həmişə o qədər ürəkdən danışır, bu qardaş ölkə haqqında fikirlərini elə böyük səmimiyyətlə ifadə edir ki, o sözləri adi diplomatik mətn kimi dinləmək olmur: "Türkiyənin hərbi sənaye kompleksi, həqiqətən də, möcüzələr göstərir. Bu avadanlıq bizə döyüş meydanında çox kömək edir... Türkiyə, əfsuslar olsun ki, indi müxtəlif avropalı siyasətçilərin hücumuna məruz qalır. Türkiyəni qaralamaq cəhdləri var. Türkiyəni şantaj etmək, ona təzyiq göstərmək cəhdləri var. Bu, tamamilə qəbuledilməzdir. ...Biz Türkiyə hərbi avadanlığını alırıq və almağa davam edəcəyik".

İnamın, etibarın, sədaqətin, əbədi qardaşlığın bundan möhtəşəm ifadəsi, açıq nümayişi varmı?

Tarixdə bəzən ən xəyalpərvər adamların da təsəvvür edə, təxəyyülünə gətirə bilməyəcəyi hadisələr baş verir. Son bir ildə biz Azərbaycanın timsalında belə möcüzələrin bir neçə dəfə şahidi olduq. Bu möcüzələrdən biri də bir neçə ay öncə - avqustda Laçın rayonunun Qorçu kəndi ərazisində Laçın Beynəlxalq Hava Limanının təməlinin qoyması ilə baş verdi. Dəniz səviyyəsindən o qədər hündürlükdə, elə bir relyefdə hava limanının tikilməsi, doğrudan da, ağlasığmaz hadisə idi. Prezident İlham Əliyevin təbirincə desək, "...indi bunu təsəvvür etmək belə çətindir, dünya tarixində belə relyefdə bəlkə də ilk dəfə hava limanı tikilir. Çünki bütün hava limanları adətən düzən ərazidə inşa edilir".

Dağların zirvəsində - Laçının, Kəlbəcərin, Şuşanın ortasında bir gün hava limanının tikiləcəyini xəyal etməyin, təsəvvürə gətirməyin özü belə, bir hünər idi. Bu xəyalın reallaşması isə böyük iqtisadi güc və peşəkar mütəxəssis əməyindən əlavə, həm də sarsılmaz iradə, əzm, inam və əlbəttə, böyük sevgi istəyir. Bunu yalnız bütün bu keyfiyyətləri özündə cəmləşdirən tarixi şəxsiyyət bacarardı. Və necə ki bacarır!

Prezident İlham Əliyev rəhbəri olduğu dövləti həm sosial-iqtisadi baxımdan inkişaf etdirən, həm beynəlxalq aləmdə nüfuzunu artıran, regionda aparıcı ölkəyə çevirən və ən əsası, bütün bu nailiyyətləri hərbi qələbələrlə taclandıran müdrik dövlət xadimi, Müzəffər Ali Baş Komandan kimi bu gün dünya arenasında böyük siyasi lider kimi önəmli bir mövqedə qərar tutub. Uzağa getməyək, bu il oktyabrın 15-də MDB Dövlət Başçıları Şurasının videokonfrans formatında keçirilən iclasında Azərbaycan Prezidentinin çıxışını xatırlayaq. Riyazi dəqiqliklə hesablanmış, praqmatik çıxışı ilə cənab prezident əsl dövlət başçısına xas təmkinlə, tutarlı arqumentlərlə unudulmuş bir məqam, bir nöqtə də buraxmadan düşmənin bütün yalanlarını alt-üst etdi.

Prezident İlham Əliyevin Ali Baş Komandanlığı altında 30 ilə yaxın düşmən işğalında olan torpaqlarımızın azad edilməsi ilə Azərbaycan xalqı Böyük Zəfərə şahidlik etdi, Azərbaycan tarixinə bugünəcən rast gəlinməyən Şanlı Zəfər səhifələri yazıldı. Əzəli torpaqlarımızın düşmən əsarətindən qurtulması, prezidentin öz sözləri ilə desək, mədəniyyətimizin incisi olan şəhərimizin Azərbaycana qaytarılması ilə həm də xalqımızın ləyaqəti, qüruru özünə qaytarıldı. Azərbaycan xalqının içindən gələn arzuları həyata keçirməklə dövlətimizin başçısı həm də Azərbaycan yazıçılarına, mədəniyyət və incəsənət xadimlərinə, yaradıcı insanlara bir ruh bəxş etdi, onlara böyük yaradıcılıq ehtirası, gələcək üçün tükənməz stimul verdi. Bu gün hər birimizin qəlbində sarsılmaz bir əminlik var ki, çox keçməyəcək, Prezident İlham Əliyevin rəhbərliyi ilə bütün Qarabağ ən müasir səviyyədə tərəqqi tapacaq, Ağdamda 300 min nəfərlik müasir tipli şəhər qurulacaq, Qarabağ xanlığının əsasını qoyan şəxsiyyətlərin uyuduqları müqəddəs İmarət məbədi bərpa olunacaq, mədəniyyət paytaxtımız Şuşanın gözəlliyi birə on artacaq, işğaldan qurtulmuş ərazilərimizin yeni abad mənzərəsini dünya heyrətlə izləyəcək. Bu gün neçə-neçə insanın ürəkdən gələn, səmimi müraciətlərində deyildiyi kimi, xalqımız - uşaqdan-böyüyə hər kəs bu Böyük Zəfərin memarı kimi öz qəlbində Prezident İlham Əliyevin əzəmətli abidəsini ucaldıb. Millətimiz öz keçmişinə, tarixinə sahib çıxan, bugünkü və sabahkı rifahını qurub-yaradan, ilahi ədaləti və ərazi bütövlüyümüzü bərpa edən Prezident İlham Əliyevin bu yolla həm də Allaha yardımçı olan qətiyyətli addımlarını heç vaxt unutmayacaq.

Cənab Prezident! Bu gün Siz 60 yaşınızı Müzəffər Ali Baş Komandan kimi bütöv - Şuşalı, Qarabağlı Azərbaycanın rəhbəri, bütün türk dünyasının və dost ölkələrin sevimli siyasi xadimi kimi qeyd edirsiniz. Biz Sizinlə qürur duyur və bu böyük sevinc duyğularını bizlərə yaşatdığınıza görə Sizə öz dərin minnətdarlığımızı bildiririk.

Ad gününüz mübarək, cənab Prezident!

Tanrı Sizi qorusun!

Rəşad MƏCİD

Azərbaycan Yazıçılar Birliyinin sədr müavini, "525-ci qəzet"in baş redaktoru

525-ci qəzet.- 2021.- 24 dekabr.- S.6-7.