Məktəbəqədər təhsil müəssisələrinin Təhsil Nazirliyinin tabeliyinə verilməsi nə vəd edir?

Əməkdar elm xadimi Şahlar Əsgərov: "Bu, məktəblərə hazırlıq prosesinin lazımı səviyyədə təşkilinə şərait yaradacaq"

Bu günlərdə Prezident İlham Əliyev dövlət məktəbəqədər təhsil sistemində idarəetmənin təkmilləşdirilməsi haqqında sərəncam imzaladı. Sərəncamla yerli icra hakimiyyəti orqanlarının tabeliyindəki dövlət məktəbəqədər təhsil müəssisələri (uşaq evləri istisna olmaqla) Təhsil Nazirliyinin tabeliyinə verildi.

Qeyd edək ki, hazırda ölkədə 1825 uşaq bağçası fəaliyyət göstərir. Onlardan 1692-i dövlətə məxsusdur. Orada 126 mindən çox uşaq tərbiyə alır. Azərbaycanda 133 özəl bağça fəaliyyət göstərir. Orada 5124 uşaq var. İlin əvvəlinə olan məlumata görə, bağçalarda 17 218 nəfər işləyir.

Əməkdar elm xadimi, professor Şahlar Əsgərovun sözlərinə görə, uşaqların fərdi inkişafı və sosiallaşmasında bağçaların əhəmiyyətli böyükdür. Məktəbəqədər təhsil müəssisələri həmçinin körpələrin təlim-tərbiyəsində də mühüm rol oynayır: "Uşaqların dünyagörüşünün inkişafında, danışıq, nitq, davranış vərdişlərinin formalaşmasında bağçalar xüsusi rola malikdir. Eyni zamanda, uşaqların məktəbə hazırlıq dövrü də məhz bağçadan başlayır. Bu səbəbdən də bağçaların inkişafına, təlim-tərbiyə işlərinin daha da yüksəldilməsinə nail olmaq lazımdır. Hesab edirəm ki, dövlət məktəbəqədər təhsil müəssisələrinin Təhsil Nazirliyinin tabeliyinə verilməsi sözügedən müəssisələrdə təlim-tərbiyə və məktəblərə hazırlıq prosesinin lazımi səviyyədə təşkil olunmasına şərait yaradacaq".

Azərbaycan İnternet Forumunun prezidenti Osman Gündüzün fikrincə, hər il Bakı şəhəri İcra Hakimiyyəti tərəfindən bağçalara elektron qəbul sisteminin qurulması vədi verilirdi. Ancaq uzun zaman keçməsinə baxmayaraq, məsələ ilə bağlı heç bir müvafiq tədbirlər görülmürdü: "Hətta dəfələrlə Təhsil Nazirliyi Bakı şəhər İcra Hakimiyyətinə bağçalara elektron qəbul sisteminin qurulmasına köməklik etməyə hazır olduğunu bildirmişdi. İcra Hakimiyyəti isə nazirliyin köməyindən imtina edib sistemi qısa müddət ərzində özləri tərəfindən quracağı vədi verilmişdi. Ancaq xeyli müddət keçməsinə baxmayaraq, dəfələrlə məsələ qaldırılmasına rəğmən İcra hakimiyyəti bu elektron qəbul sistemini qurmadı və ya qurmaq istəmədi. Görünür bağçalara elektron qəbul sisteminin qurulması İcra hakimiyyətinə sərf etmirdi. Elektron hökumətin inkişafına cavabdeh qurum da dövlətin rəqəmsal resurslarından effektiv istifadəyə yetərincə diqqət yetirmədi. Bağçalara nəzarətin yenidən Təhsil Nazirliyinə verilməsi təhsil sisteminin ilk pilləsi olan məktəbəqədər təhsil müəssisələrində vəziyyətin yaxşılaşmasına gətirib çıxaracaq. Ümid edirəm ki, Təhsil Nazirliyi elektron qəbul sistemini bağçalara daha effektiv formada tətbiq edə biləcək".

Millət vəkili Etibar Əliyev bildirib ki, uzun illərdir, müxtəlif səviyyələrdə qaldırılan çox mühüm bir məsələ nəhayət ki, həllini tapdı: "10 il müddətində təhsilin bu mühüm pilləsində geriləmələr baş verdi. Bu böyük zaman kəsiyində baş verən neqativ hallar aradan qaldırılmalıdır. Məktəbəqədər təhsil müəsisələri hər bir ölkənin təhsilinin özəyidir".

Təhsil eksperti Nadir İsrafilovun dediyinə görə, təhsildə varislik və fasiləsizlik prinsiplərininin təmin edilməsi baxımından uşaq bağçalarının yenidən Təhsil Nazirliyinə qaytarılması təqdirəlayiqdir: "Bu, təhsilin bir sistem kimi vahid mərkəzdən idarə olunması, ceviklik və mobilliyin təmin edilməsi, cavabdehliyin və məsuliyyətin artırılması baxımından da məqbul hesab oluna bilər".

Təhsil naziri Emin Əmrullayev isə deyir ki, Təhsil Nazirliyi bağçalarda təlim-tərbiyə işinin yüksək səviyyədə təşkil olunmasında və uşaqların bağçalara çəlb olunmasında maraqlıdır: "Biz istəyirik ki, daha çox uşaq bağçalara getsin. Çünki bağçalar bir neçə problemi həll edir. İlk növbədə bu uşaqların təhsilidir. İkinci, qadınların işləməsinə şərait yaradır. Bağça çox olduqca bu, bu iqtisadiyyatın inkişafına təsir edir. Bağçaların sayının artması hər kəsin marağındadır. Sadəcə, bu, dayanıqlı sistemlə artmalıdır".

Nazirin sözlərinə görə, dövlət məktəbəqədər təhsil müəssisələrində (uşaq bağçaları) vahid məlumat bazası mövcud deyildi. Vakant yerlərin formalaşması, uşaq və müəllimlərlə, direktorların işə qəbulunda rəqabətliliyə diqqət etməliyik. Daha çox özəl sektorun sayının artırılması, alternativ təhsil müəssisələri ilə bağlı addımlar atılmalıdır . Özəl bağçaların artması əsas hədəflərdəndir. Təhsil naziri vurğulayıb ki, bundan sonra dövlət məktəbəqədər təhsil müəssisələrində tədris aparacaq şəxslərin işə qəbulu müəllimlərin işə qəbulu üzrə tətbiq olunan oxşar prinsiplə həyata keçiriləcək. Həmin müəllimlərin və ya tərbiyəçilərin müxtəlif ixtisasartırma kurslarına cəlbi də mümkündür. Eyni zamanda, məzmun dəyişiklikləri də olmalıdır: "Məktəbəqədər təhsil müəssisələrində çalışan işçilərin qiymətləndirilməsi aparılacaq. Bu pillə üzrə təhsil işçilərinin bu və ya digər formada diaqnostik qiymətləndirilməsinin aparılması labüddür. Ümumtəhsil müəssisələrində bu üsul özünü doğrultdu. Biz gördük ki, hansı müəllimin fəaliyyəti nədir. Saat bölgüsündə bunu nəzərə aldıq".

S.QARAYEVA

525-ci qəzet.- 2021.- 25 dekabr.- S.9.