Özbəkistan səfiri Xalq yazıçısı Anarla görüşdü

Özbəkistan səfiri Baxrom Aşrafxanov Azərbaycan Yazıçılar Birliyinin (AYB) sədri, Xalq yazıçısı Anarla görüşüb.

525.az xəbər verir ki, Xalq yazıçısı birliyin fəaliyyəti ilə bağlı səfirə ətraflı məlumat verib.

Bundan başqa, AYB sədri Azərbaycan-Özbəkistan ədəbi əlaqələrindən söz açıb.

Səfir böyük özbək şairi, Nizami Gəncəvinin davamçılarından olan Əlişir Nəvainin 580 illik yubiley tədbirləri ilə bağlı danışıb.

Özbəkistan-Azərbaycan ədəbi əlaqələrinin inkişafı üçün nəzərdə tutulmuş yeni layihələrlə bağlı məlumat verən diplomat “Cahan ədəbiyyatı”nın bir sayının tamamilə Azərbaycan ədəbiyyatına həsr ediləcəyini bildirib.

Görüşdə Xalq şairi Fikrət Qoca, Xalq yazıçısı Çingiz Abdullayev, Bədii tərcümə və Ədəbi Əlaqələr Mərkəzinin sədri Səlim Babullaoğlu da iştirak ediblər.

Görüş zamanı geniş fikir mübadiləsi aparılıb və iki qardaş ölkənin ədəbi qurumları arasında memorandum imzalanması və qarşılıqlı ədəbi layihələr həyata keçirilməsi qərara alınıb.

525-ci qəzet.- 2021.- 6 fevral.- S.13.