"Biz Əjdər Olu ləyaqətli və dürüst insan kimi tanıyırıq" -

AZƏRBAYCANIN TANINMIŞ ƏDƏBİYYAT XADİMLƏRİ ŞAİR, YAZIÇI ƏJDƏR OL İLƏ BAĞLI HADİSƏDƏN NARAHATLIQLARINI İFADƏ ETDİLƏR

Əmək və Əhalinin Sosial Müdafiəsi Nazirliyinin keçmiş aparat rəhbəri, tanınmış şair, yazıçı Əjdər Ol bu günlərdə hüquq-mühafizə orqanları tərəfindən saxlanılıb, məhkəmənin qərarı ilə barəsində həbs qətimkan tədbiri seçilib.

Şair, yazıçı Əjdər Ol öz əsərləri ilə təkcə ölkəmizdə yox, dünyanın bir çox ölkələrində də yaxşı tanınır. Baş verən bu hadisədən sonra Azərbaycanın tanınmış qələm sahibləri ilə yanaşı, dünyanın ayrı-ayrı ölkələrində - Türkiyə, Polşa və Moldovada yaşayan və fəaliyyət göstərən bir çox nüfuzlu ədəbiyyat adamları da müxtəlif səviyyələrdə, o cümlədən, sosial şəbəkələrdə çıxış edərək Əjdər Ol yaradıcılığı barədə öz fikirlərini bölüşüb, bu hadisədən təəssüfləndiklərini bildiribər.

Qəzetimizin ötən saylarından birində bir sıra ədəbiyyat adamlarının bununla bağlı sosial şəbəkələrdə paylaşılan fikirlərindən nümunələr dərc olunmuşdu. Bu dəfə isə Azərbaycanın tanınmış şair və yazıçılarının, ədəbiyyat adamlarının Əjdər Ol barədə fikirlərini oxuculara təqdim edirik.

Anar, AYB-nin sədri, Xalq yazıçısı:

- Əjdər Olu mən çox dəyərli bir ədəbiyyat adamı kimi tanıyıram. O, çox istedadlı şair, istedadlı nasirdir. Ən son yazdığı "Lo" romanı bizim Azərbaycanda XX əsrin son illərində baş verən ictimai-siyasi hadisələri çox dəqiq və bədii cəhətdən inandırıcı şəkildə əks etdirib. Əjdər Ol yaradıcılığının bir başqa maraqlı cəhəti də onun yazıçılarla, sənət adamlarıyla bağlı müxtəlif rəvayətləri, məzəli söhbətləri, ibrətamiz hadisələri özünəməxsus ustalıqla qələmə almasıdır. Bu səpkidə onun maraqlı əsərlərindən biri də unudulmaz Ulu öndər Heydər Əliyevlə bağlı xatirələri, söhbətləri, deyimləri əhatə edən kitabdır ki, bu da Ulu öndərin xarakterinin bir çox cəhətlərini açır bizimçün. Mən Əjdər Olun bir ədib kimi, Yazıçılar Birliyinin üzvü kimi dəyərini çox yüksək qiymətləndirirəm.

Fikrət Qoca, AYB-nin birinci katibi, Xalq şairi:

- Əjdər Olu mən ilk şeirlərindən tanıyıram. Ümumiyyətlə, mənim istedadlı şair və yazıçılarla tanışlığım ancaq yazıları vasitəsiylə olub, sonra şəxsi münasibətdə davam etdirmişəm. Yazılarıyla bağlı fikirlər yarananda isə zənnim çox zaman məni aldatmayıb. Eləcə də Əjdərdə yanılmamışam. Əjdər ilk şeirlərindən orijinal idi, indi də orijinaldır. Mən qələm dostlarımı təkcə şəxsi münasibətə görə izləmirəm, izləyirəm ki, görüm inkişaf varmı, mütaliə edirmi? Çünki istedad elə bir şeydir ki, müəyyən zamandan sonra əksinə, hətta qurtara bilər. Onu mütaliəylə zənginləşdirmək lazımdır. Əjdər Ol da çox istedadlı, istedadını qoruya bilən, mütaliəli insandır. Əgər o, bu günə kimi ədəbiyyata, sözə sadiqliyini qoruyub-saxlaya bilibsə, deməli, bundan sonra da saxlayacaq. Onun ən çox xoşuma gələn cəhətləri bunlardır.

Əjdər, həmçinin, çox ailəcanlı insandır, gözəl ailə başçısıdır.

Bu yaxınlarda Mədəniyyə Nazirliyinin xəttiylə mənim on cildlik kitabım çıxmalı idi. Mən onun redaktorluğunu Əjdərdən xahiş etdim. Baxmayaraq ki, onun işləri çoxdur, o, mənim xahişimi canla-başla yerinə yetirdi. On cildin hamısını tez zamanda özü də çox böyük dəqiqliklə oxudu, ürəkdən iş gördü. Dəfələrlə əsərlərin üstündə müzakirələrim oldu, düzəlişlərini elədi. Bu, böyük bir zəhmətin nüumunəsi idi. Əjdər müəllimdə işlə bağlı "yox" sözü yoxdur. O, çox bacarıqlı insandır. Allah ona cansağlığı versin. Mən ondan yerdən göyə kimi razıyam.

Musa Yaqub, Xalq şairi:

- Əjdər Olun həbs edilməsi xəbərini eşidəndə çox narahat oldum. Əjdər bizim hamımıza kömək edən dostumuzdur. Əvvəl Maliyyə Nazirliyində işləyirdi, daha sonra Əmək və Əhalinin Sosial Müdafiəsi Nazirliyində işləməyə başladı. O, mənim üçün doğma adamdır. Onun "Günəbaxan zəmisi" adlı şeiri var və ona mən şeir həsr etmişəm. Əjdər də o "Günəbaxan zəmisi"ndən bir tum götürüb və gərək onu buna görə həbs etməsinlər.

Mən onun tez bir zamanda azadlığa çıxmasını arzulayıram. Çünki yazıçılardan heç kim bu adla həbsdə yatmayıb. Əjdər çox tərbiyəli, bizim adlı-sanı yazıçımızdır. Onun gözəl şeirləri və misraları var. Mən qələm əhlindən xahiş edirəm ki, Əjdər Olun azadlığa çıxması üçün dövlətimizə müraciət etsinlər. Gərək Günəbaxan zəmisindən tağını kəsməyəydilər. Əjdər torpağa bağlı bir insandır. Elə bir yerdə işləyib ki, ordan tüstü qalxıb və Əjdər Ol da o tüstüyə düşüb.

Seyran Səxavət, yazıçı:

- Əjdər istedadlı, yaxşı şair, istiqanlı yoldaşdır. Bu ölkədə korrupsiyaya bulaşanların hamısını tutandan sonra keçib yazıçını, şairi həbs eləmək olar. İntəhası, Əjdərin korrupsiyaya bulaşmasına inanmıram, inana bilmirəm. Əjdərə Allah kömək olsun, inanmıram ki, belə iş görüb. İstedad adamı nataraz işlərlə məşğul olmağa qoymaz.

Aqil Abbas, yazıçı, millət vəkili:

- Əjdər Ol çox gözəl yazıçı, çox gözəl şair və çox gözəl insandır. İndi onun orada nə işi olubsa, hüquq mühafizə orqanları araşdırıb deyə bilər. Çox təəssüflənirəm. Əjdər Ol ədəbiyyatımızda xüsusi yeri olan bir imzadır.

Səyyad Aran, yazıçı:

- Çağdaş Azərbaycan ədəbiyyatının istedadlı və tanınmış nümayəndələrindən Əjdər Olun həbsi məni və onu tanıyan minlərlə oxucusunu çox üzdü. Biz hamımız Əjdəri ləyaqətli, namuslu, doğru, dürüst bir insan kimi tanıyırıq. Onun hansısa dolaşıq-bulaşıq işlərdə əlinin və iştirakının olmasına inanmırıq. Ədalətli məhkəməmiz əminəm ki, inamımızı doğruldar. Düz həmişə əyrini kəsib. Bu dəfə də belə olar, inşallah!

Allah qapını açsın, Əjdər!

Paşa Qəlbinur, şair:

- Mən Əjdəri 39 ildir tanıyıram - Vaqif İbrahimin şeir dərnəyindən... Bu illər ərzində ara-sıra görüşlər, qələm dostlarımızla ədəbiyyat, həyat, dünya söhbətləri edərdik.

Əjdərlə Dünya Azərbaycanlıları Konqresinin müxtəlif ölkələrdəki tədbirlərində görüşlərimiz, iki il əvvəl Yazıçılar İttifaqının xətti ilə Mərakeş səfərimiz hələ də xəyalımda canlıdır.

Pandemiya başlayandan yalnız telefonla əlaqə saxlayırdıq...

Əjdər Olun "Canlı lətifələr, əhvalatlar, deyimlər" kitabını və "40" romanını bir də vərəqləyirəm. O, Ulu öndər Heydər Əliyev haqqında böyük hörmətlə və məhəbbətlə yazır: "Görkəmli siyasətçi və dövlət xadimi, Azəbaycan dövlətçiliyi tarixində əvəzsiz xidmətlər göstərən, hakimiyyət ustası, ayıq-sayıq, çətin anlarda özünü itirməyib xoş günlərində hissə qapılmayan, şəraiti həmişə doğru-düzgün qiymətləndirən, əzəmətli, şax, çevik, yorulmaz, dözünlü, hafizəli, gərgin vəziyyətdən çıxış yolu tapmaqda bənzərsiz iti fikri, qətiyyəti olan Heydər Əlirza oğlu Əliyev bütün yüksək keyfiyyətlərilə yanaşı, həm də güclü yumor hissinə malik, hazırcavab, sözün çəkisini bilən, dediyini vaxtında və yerində deyən bir şəxsiyyət idi".

Bu 39 ildə həmişə Əjdəri Vətənimizi, torpaqlarımızı, dövlətçiliyimizi, Azərbaycan uğrunda fədakarlıq edənləri, dostlarını, ailəsini, üç qız balasını sevən görmüşəm. Onu həmişə yerini bilən, dürüst, əyni-başı səliqəli, danışığı, məclisdə nuş etdiyi içki və təamın qədərini bilən, heç bir hərəkətində ifrata varmayan, insanları yaxşı tanıyan görmüşəm.

Əjdər Ol şairdir!

Neçə illər əvvəl hamı tərəfindən atılmış, unudulmuş, daima sərxoş olan, istedadlı yazıçımız Namiq Abdullayevin Novruz bayramında görüşünə getməyinin şahidi olmuşam. O anda Namiq müəllimin gözlərindəki ifadəni ömrüm boyu unutmayacağam...

Etiraf edim ki, mənim bir şakərim var: Uzun illər tanıdığım adamların məşhur filosofların hansı təyin və kəşflərinə uyğun gəlmələrini beynimdə müqayisə edirəm. Dünya şöhrətli alman filosofu Artur Şopen Hauer yazır ki, insanın etik baxışları onun əqli qabiliyyəti ilə (təfəkkür) eyni kökdən qidalanır. Mən bu müddəanı (kəşfi) oxuyanda onun düzgünlüyünə sübut kimi həmişə gözlərimin önünə Əjdər Ol gəlib.

Böyüklərin və kiçiklərin yanında yerini bilən, bir an da olsa Allahını, Vətənini unutmayan ləyaqət sahibi. Üç qız atası, çoxlu kitabların müəllifi, Azərbaycanı dünyada tanıdan Ulu öndərimizi, möhtərəm Prezidentimizi, yazarları, fırça sahiblərini, alimləri sevə-sevə vəsf edən qələm sahibi.

Elçin Hüseynbəyli, yazıçı:

- Əjdər Ol Azərbaycan nəsrinin dəyərli imzalarından biridir. Onun portret hekayələri özünəməxsusluğu, milli koloriti ilə bənzərsizdir. Yazıçının axıcı təhkiyəsi nəsrimizə maraqlı çalarlar qatır. O, qələmə aldığı hadisəni, obrazları dərindən öyrənir, müşahidə edir və oxucunu dediklərinə, yazdıqlarına inandıra bilir. Bütün bunlar əsl nəsrə xas xüsusiyyətlərdir...

Yunus Oğuz, yazıçı:

- Əjdər Olu 33 ildir tanıyıram. Müstəqillik uğrunda fəaliyyəti danılmazdır. Azərbaycanın gələcəyinə, ədəbiyyatına özəl fikirləri var. Eredusiyalıdır, nəzm və nəsrdə öz sözü olan şəxsdir. Onun "Azərbaycan" şeiri əvəzolunmazlar sırasındadır. "Lo" romanı isə 80-ci illərin ensiklopadiyasıdır. Düşünürəm ki, ona qarşı sürülən ittihamlara aydınlıq gətiriləcək.

Ramiz Qusarçaylı, şair:

- Mən Əjdər Olla 40 ilə yaxındır ki, ailəvi dostam. Eyni ədəbi nəslin nümayəndələri kimi ədəbi uğurlarımıza birlikdə sevinmişik, bir yerdə ədəbi görüşlər, tədbirlər keçirmişik. Əjdər mənim yaradıcılığım barədə "Bənövşə, bal arısı, su daşı" adlı məqalə və şeir yazıb, mən də onun yaradıcılığına Əjdər Olun "Can Azərbaycanı" adlı məqalə və şeir həsr etmişəm. Əjdərin poeziyasından, nəsr və dram əsərlərindən boylanan vətən məhəbbəti, vətən ruhu mükəmməldir, təqdirəlayiqdir. Əjdərin Ulu öndər Heydər Əliyevin çevik siyasi dühası, ali insani keyfiyyətləri və müdrik dünyagörüşləri barədə yazdığı kitab da onun çoxşaxəli yaradıcılıq məziyyətlərinə malik olduğunu göstərir. Əmin olmaq istərdim ki, tezliklə belə bir istedadlı və vətənpərvər yazarın həbsdən azad edilməsinin şahidi olacağıq.

Qardaşxan, şair:

- Əslində, Əjdər Olun kimliyi, nəçiliyi - istər şeiri olsun, istər nəsri - onun yazdıqlarındadır. İndiki məqamda arzu-diləyimi elə Əjdərin öz deyimi ilə ifadə etmək istəyirəm:

"Sol gedib, sağ cinah qalır,

Haqq solaxayda durmasa".

Ümid edirəm ki, haqq "sağ cinahda" duracaq.

525-ci qəzet.-2021.- 20 fevral.- S. 15.