Əbədiyyətdəki əziz ünvanlarımız

Şəhidlər ölməz, Vətən bölünməz!

Həyat nə qədər şirin olsa da, ölüm heç bir insan övladının qaça bilməyəcəyi tale yazısıdır. Amma Allah qatında seçilmiş elə insanlar var ki, onlar ölmür, cismən bu dünyanı tərk edib, ruhən Yaradana - əbədiyyətə qovuşurlar. Ölümlərin ən şərəflisi də deyirlər buna. Bu, müqəddəs şəhidlik zirvəsidir ki, hər kəsə qismət olmaz.

Ali Baş Komandan cənab İlham Əliyevin rəhbərliyi ilə sentyabr ayında başlanan və 44 gün davam edən Vətən müharibəmiz 30 ilə yaxın erməni işğalında olan torpaqlarımızın, Qarabağın azadlığıyla nəticələndi.

Müharibə varsa, şəhid də var, qazi də, itkin də... Nə yazıq ki, bu müharibəmiz də qurbanlarsız ötüşmədi. Azərbaycanın üç minə yaxın qəhrəmanı torpaqlarımızın azadlığı uğrunda şəhidlik zirvəsinə ucaldı, minlərlə igid qazi adını qazandı. "525-ci qəzet" olaraq bu layihəmizdə mütəmadi şəkildə hissə-hissə həmin igidlərimizi oxucularımıza tanıtdıracağıq. Hər biri bir qəhrəmanlıq dastanı olan bu həyatlarla qürur duyur, onları unutmayacağımıza, unutdurmayacağımıza söz veririk! Allah hər birinə rəhmət eləsin!

P.S. Bu layihəmizə dəstək olmaq üçün ətrafınızda tanıdığınız, bildiyiniz şəhidlər varsa, həyat yoluna güzgü tutmaq məramı ilə müəllifin göstərilmiş e-mail ünvanıyla əlaqə saxlaya bilərsiniz!

***

Bəşir Xəqani oğlu Həsənov 1995-ci il iyulun 13-də Şəmkir rayonunun Təzəkənd kəndində anadan olub. 2001-2012-ci illərdə S.Vurğun adına Təzəkənd kənd tam orta məktəbində təhsil alıb. Subay idi.

Bəşir Həsənov 2013-2015-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub.

Azərbaycan Silahlı Qüvvələrinin əsgəri olan Bəşir Həsənov 2020-ci il sentyabrın 27-də Vətən müharibəsi zamanı Cəbrayıl, Hadrut və Füzulinin azadlığı uğrunda gedən döyüşlərdə könüllü savaşıb. Oktyabrın 25-də Füzuli döyüşləri zamanı qəhrəmancasına şəhidlik zirvəsinə yüksəlib. Şəmkir rayonunun Təzəkənd kəndində dəfn olunub.

Bəşir Həsənov şəhadətindən sonra "Vətən uğrunda", "Döyüşdə fərqlənməyə görə" və "Füzulinin azad olunmasına görə" medalı ilə təltif edilib.

***

Sakit İsmayıl oğlu İsmayılov 1985-ci il yanvarın 7-də Şəki rayonunda Aran kəndində anadan olub.1991-ci ildə Şəki rayon Aran kənd orta məktəbinə daxil olub, 1999-cu ildə həmin məktəbin 9-cu sinfini bitirib. 1999-2002-ci illərdə Şəki Peşə kollecində təhsil alıb.

Sakit İsmayılov 2003-2004-cü illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2010-cu ildən isə müddətdən artıq həqiqi hərbi xidmət qulluqçusu olaraq xidmət edirdi. 2011-2018-ci illərdə manqa komandiri olub.

Azərbaycan Ordusunun kiçik çavuşu olan Sakit İsmayılov 2020-ci il sentyabrın 27-də ıbaşlanan Vətən müharibəsi zamanı Suqovuşanın azadlığı uğrunda gedən döyüşlərdə savaşıb. Sakit İsmayılov oktyabrın 23-də Ağdərə istiqamətində şəhidlik zirvəsinə ucalıb.

Sakit İsmayılov şəhadətindən sonra "Vətən uğrunda" və "Suqovuşanın azad olunmasına görə" medalı ilə təltif edilib.

Ailəli olan şəhidimizdən Vətənə əmanət iki övladı qalıb.

***

Elnur Arif oğlu İsmayılov 2001-ci il fevralın 24-də Şəkinin Baş Küngüt kəndində anadan olub. 1-ci sinfə həmin kənddə gedib. Atası Arif İsmayılov I Qarabağ qazisi olduğundan Prezident tərəfindən ona Şəki şəhərində ev verilib. Ona görə də Elnur ailəsiylə birgə Şəki şəhərinə köçüb. Elnur Şəki şəhəri 19 №li məktəbin ibtidai sinfini bitirib, təhsilini Şəki şəhəri 8 nömrəli tam orta məktəbdə davam etdirib. Oranın 9-cu sinfini başa vurub. Orta təhsillə birgə Elnur Şəki şəhəri 3 №li musiqi məktəbində də oxuyub, orda qarmon ifaçısı ixtisası üzrə təhsil alıb.

Elnur İsmayılov 2019-cu ildə hərbi xidmətə çağırılıb. Əvvəlcə xidmətinə Cəlilabadda başlayıb. And içmədən sonra Ağcabədidə olub. İki aydan sonra isə Beyləqanla Füzuli arasındakı Harami düzündə N saylı hərbi hissədə xidmətinə davam edib.

Hərbi xidmətini bitirməsinə üç gün qalmış Vətən müharibəsi başlayıb və Elnur da digər silah yoldaşları kimi döyüşlərə qatılıb. O, 2020-ci il oktyabrın 13-də son dəfə ailəsiylə danışıb və oktyabrın 14-də Füzulidə ağır döyüşlərin birində şəhidlik zirvəsinə ucalıb. Elnurun nəşi oktyabrın 21-də gətirilir və oktyabrın 22-də Şəkidə Şəhidlər xiyabanında torpağa tapşırılır. Şəhidimizin yoxluğuna dözməyən Rüstəm babası da 20 gün sonra vəfat edib.

Elnur İsmayılov şəhadətindən sonra "Vətən uğrunda" və "Füzulinin azad olunmasına görə" medallarıyla təltif olunub.

***

Səbuhi Əlixan oğlu Həsənquliyev 11 aprel 2002-ci ildə Ucar rayonunun Boyat kəndində anadan olub. Atasının işinə görə Sumqayıt şəhərinə köçdüklərindən 2008-ci ildə Sumqayıt şəhər Cəbrayıl rayonu 5№li məktəbində birinci sinifə başlayır. 2017-ci ildə həmin məktəbin 9-cu sinifini bitirərək peşə liseyinə daxil olur.

2020-ci ildə peşə liseyini bitirdikdən sonra həmin ilin aprel ayında hərbi xidmətə yollanır. 2020-ci il sentyabrın 27-də başlanan Vətən müharibəsi zamanı cəmi 5 ayın əsgəri olan Səbuhi xüsusi şücaət göstərib. Fiziki keyfiyyətlərinə və qoçaqlığına görə onu Xüsusi Təyinatlı Dəstəyə cəlb edirlər və bundan sonra Səbuhi "yaşma"larla birgə ən öndə getməyə başlayır. Füzulinin, Cəbrayılın, Xocavəndin və Şuşanın azadlığı uğrunda gedən döyüşlərdə vuruşub. O, bu döyüşlər zamanı oktyabrın 19-da döyüş yoldaşını güllədən xilas etmək istəyərkən özü düşmən gülləsinə tuş gəlir. Çiynindən, yaxın məsafədən ürəyindən və boğazından vurularaq qəhrəmancasına şəhidlik məqamına yüksəlib. O, Sumqayıt şəhər Şəhidlər xiyabanında dəfn edilib.

Səbuhi Həsənquliyev şəhadətindən sonra "Vətən uğrunda", "İgidliyə görə", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə" və "Şuşanın azad olunmasına görə" medalları ilə təltif olunub.

***

Abbas Salam oğlu Əliyev 1988-ci il yanvarın 9-da Bakı şəhəri Sabunçu rayonunun Ramana qəsəbəsində anadan olub. 1994-2005-ci illərdə R.Zorge adına 90 nömrəli tam orta məktəbdə təhsil alıb.

2006-cı ildə hərbi xidmətini Naxçıvanda başa vurduqdan sonra fərdi sahibkarlıqla məşğul olub. 2011-ci ildə ailə həyatı qurub, 2012-ci ildə İsmayıl adlı oğul övladı dünyaya gəlib.

Abbas Əliyevin babası 1941-1945-ci illər Böyük Vətən müharibəsi, atası isə I Qarabağ müharibəsi iştirakçısı olub. Hələ 5 yaşında ikən atasıyla döyüş bölgəsinə gedib və orda çox maraq göstərdiyi silahla xatirə şəkli çəkdirib. Elə uşaqlığından o, bu torpaqlara qəhrəman kimi qayıdacağını deyərmiş.

Azərbaycan Ordusunun əsgəri olan Abbas Əliyev 2020-ci il sentyabrın 27-də başlanan Vətən müharibəsinə könüllü qatılıb. İlk döyüşləri Qubadlı-Füzuli istiqamətində olub. Ailəsinin sözlərinə görə, o, hər dəfə evlə əlaqə saxlayarkən alınan torpaqların sevincini bölüşər və Qarabağın cənnət olduğunu deyərdi.

O, noyabrın 2-də Xocavənd döyüşləri zamanı şəhidlik zirvəsinə yüksəlib və noyabrın 4-də Ramana qəsəbəsində dəfn olunub.

Abbas Əliyev şəhadətindən sonra "Vətən uğrunda" və "Xocavəndin azad olunmasına görə" medalları ilə təltif edilib.

***

Elmir Arzu oğlu Məmmədov 1999-cu il iyunun 3-də Salyan rayonunun Xocalı kəndində anadan olub. 2004-2008-ci illərdə Xocalı kənd tam orta məktəbində, 2008-2015-ci illərdə isə Salyan şəhərinin 1 nömrəli tam orta məktəbində təhsil alıb. 2015-2020-ci illərdə Azərbaycan Dövlət Neft və Sənaye Universitetində ali təhsil alıb.

Azərbaycan Ordusunun əsgəri olan Elmir Məmmədov 2020-ci il sentyabrın 27-də başlanan Vətən müharibəsi başlanan zaman 3 ay idi ki xidmət edirdi. O, müharibə başlamazdan üç gün öncə son dəfə əmisi oğlu ilə telefonda danışıb və təlimlərə gedəcəyini deyib.

Elmir Məmmədov sentyabrın 27-də Füzuli istiqamətindəki döyüşlərdə şəhidlik zirvəsinə ucalıb. Salyan rayonunun Xocalı kəndində dəfn olunub.

Elmir Məmmədov şəhadətindən sonra "Vətən uğrunda" və "Döyüşdə fərqlənməyə görə" medalları ilə təltif edilib.

***

Turan Vidadi oğlu Şərifov 20 iyun 2001-ci ildə Bakıda anadan olub. Orta təhsilini Əliağa Şıxlınski adına 135 №li orta məktəbdə alıb. Məktəbi bitirdikdən sonra Ukraynanın Çerkass Dövlət Texnologiya Universitetinə qəbul olub. Həmin universitetin birinci kurs tələbəsi olan Turanın ən böyük arzusu hərbi xidmətə getmək olub. Buna görə də təhsilini saxlayaraq 23 oktyabr 2019-cu ildə hərbi xidmətə gedib. 2020-ci il 27 sentyabrda Vətən müharibəsi başlayanda tuşlayıcı kimi döyüşlərdə iştirak edib. Son dəfə böyük qardaşı Tural və atasıyla danışıb. Qardaşına haqqını halal etməsini, müharibədə hər şeyin ola biləcəyini deyib.

Laçın istiqamətində vuruşan Turan Laçın uğrunda gedən döyüşlərdə artilleriya atəşi nəticəsində 5 noyabr 2020-ci ildə, müharibənin bitməsinə 4 gün qalmış şəhadətə yüksəlib. O, II Fəxri xiyabanda Milli Qəhrəman Mübariz İbrahimovun yanında dəfn olunub.

Turan Şərifov şəhadətindən sonra "Vətən uğrunda", "Hərbi xidmətlərə görə", "Cəbrayılın azad olunmasına görə", "Qubadlının azad olunmasına görə" və "Laçının azad olunmasına görə" medalları ilə təltif edilib.

***

Polkovnik-leytenant Tağıyev Ruslan Fuad oğlu 1982-ci il iyun ayının 12-də İsmayıllı rayonunun Qubaxəlilli kəndində anadan olub. 1988-ci ildə İsmayıllı rayonunun 1 saylı orta məktəbinə daxil olub. 1989-cu ildə İsmayıllı rayonunun 3 saylı orta məktəbində təhsilini davam etdirib, 1999-cu ildə həmin məktəbi bitirib.

1999-cu ildə Heydər Əliyev adına Azərbaycan Ali Hərbi Məktəbinə daxil olmuş və 2003-cü ildə həmin məktəbi "Qoşun kəşfiyyatı" ixtisası üzrə bitirib.

2003-2004-cü illərdə Silahlı Qüvvələrin Təlim və Tədris mərkəzində dinləyici, ardınca müvafiq olaraq Naxçıvan Muxtar Respublikasında N saylı hərbi hissədə taqım komandiri, kəşfiyyat bölüyünün komandiri, kəşfiyyat bölmə rəisinin köməkçisi və kəşfiyyat bölməsinin rəisi vəzifələrində xidmət edib.

2012-2014-cü illərdə Silahlı Qüvvələrin Hərbi Akademiyasına təhsilini davam etdirib. 2014-cü ilin iyul ayından 2017-ci ilin fevral ayına qədər Şəmkir korpusunda N saylı hərbi hissənin kəşfiyyat rəisinin kəşfiyyatın planlaşdırılması üzrə baş köməkçisi vəzifəsində xidmət edib.

2017-ci ilin 20 fevral tarixindən Azərbaycan Respublikasının Müdafiə Nazirliyinin Baş Kəşfiyyat idarəsinin baş zabiti vəzifəsinə təyinat alıb.

Ruslan Tağıyev 2019-cu ildə hərbi biliklərini artırmaq məqsədilə ikili razılaşma əsasında Çinin Pekin şəhərində təhsilini davam etdirib və "Çin Xalq Qurtuluş Ordusunun Milli Müdafiə Akademiyası"nın 68-ci ali komandanlıq kursunu uğurla bitirib.

Xidmət etdiyi dövr ərzində hərbi hissə qarşısında qoyulmuş tapşırıqların icrası zamanı vəzifə borcunu şərəflə və vicdanla yerinə yetirdiyi üçün Azərbaycan Respublikası Prezidenti İlham Əliyevin Sərəncamları ilə bir sıra təltifləri olub.

Polkovnik-leytenant Ruslan Tağıyev 27 sentyabr 2020-ci ildə başlayan Vətən müharibəsində Tərtər, Kəlbəcər, Suqovuşan, Qubadlı, Laçının işğaldan azad edilməsi uğrunda gedən döyüş əməliyyatları zamanı rəhbərlik etdiyi bölmələrə yüksək peşəkarlıqla başçılıq edib, düşmənin xeyli canlı qüvvəsinin və döyüş texnikasının məhv edilməsində şəxsən fədakarlıq və rəşadət göstərib. Döyüş şəraitində düşmənin saysız-hesabsız strateji obyektlərinin koordinatlarının dəqiq müəyyən olunub vaxtında məhv edilməsində misilsiz xidmətləri olub.

Ruslan Tağıyev noyabrın 4-də Laçın uğrunda gedən gərgin döyüşlər zamanı döyüş tapşırığını yerinə yetirərkən qəhrəmancasına şəhidlik zirvəsinə ucalıb. Vətən uğrunda canını fəda edən, 38 illik ömrünün 21 ilini Vətənə xidmət edən igid zabitimiz Ruslan Tağıyev II Fəxri xiyabanda dəfn edilib. Özündən sonra Vətənə Fuad, Polad və Nuray adlı övladlarını əmanət edib.

Ruslan Tağıyev şəhadətindən sonra "Vətən uğrunda", "İgidliyə görə", "Laçının azad olunmasına görə" medalları ilə təltif edilib.

***

Cavid Faiq oğlu Manafov 4 fevral 1999-cu ildə Bakı şəhərində anadan olub. 2005-2016-cı illərdə Heydər Əliyev adına liseydə təhsil alıb.

Məktəbi bitirdiyi il yüksək balla Bakı Dövlət Universitetinin Psixologiya fakültəsinə daxil olub. 2020-ci ildə universiteti bitirib və iyul ayında hərbi xidmətə çağırılıb.

2020-ci il 27 sentyabrında Vətən müharibəsi başladığı gündən Cavid Füzulinin azad edilməsi uğrunda gedən döyüşlərdə böyük şücaət göstərib. O, Qrad21 kordinatoru idi.

Füzuli azad edildikdən sonra Cəbrayıl və Zəngilan istiqamətindəki döyüşlərdə iştirak edib. Oktyabrın 31-də Zəngilan-Qubadlı istiqamətində əməliyyata gedərkən düşmən tərəfindən Qrad21 maşını vurulur, maşın alışmağa başlayır. Cavid komandirini və əsgər yoldaşlarını xilas edərkən, açılan Qradın dalğası təzyiqindən Cavidi zərbə ilə atır. Zərbə nəticəsində ağır kəllə-beyin travması alır. O, iki dəfə açıq beyin əməliyyatı keçirib.

Ona ilkin tibbi yardım Füzuli rayonunda göstərilib, sonra təcili olaraq noyabrın 1-də Bakı şəhəri Neyrocərrahiyyə xəstəxanasına yollanıb və ikinci dəfə əməliyyat olunub.

Ailəsinin onun yaralanmasından xəbəri olmayıb. Onlar Cavidlə son dəfə oktyabrın 30-da danışıblar. O, anasına nigaran qalmamasını, hər şeyin yaxşı olacağını deyib. Dörd gün ailə Caviddən heç bir məlumat ala bilməyib və axtarışa başlayıblar. Noyabrın 3-də Müdafiə Nazirliyinin qaynar xəttindən Cavid Manafov adlı ağır yaralı bir əsgərin olduğunu öyrənirlər.

Noyabrın 7-nə kimi həyatda qalmaq üçün mübarizə aparan Cavid həmin gün şəhidlik zirvəsinə ucalıb.

Cavid Manafov şəhadətindən sonra "Vətən uğrunda" medalıyla təltif olunub.

***

Ayxan İlham oğlu Heydərli 1996-cı il dekabrın 26-da Beyləqan rayonunun Orta Əlinəzərli kəndində anadan olub. 2003-2014-cü illərdə K.Əliyev adına Orta Əlinəzərli kənd tam orta məktəbində təhsil alıb.

Ayxan Heydərli 2015-2016-cı illərdə Azərbaycan Silahlı Qüvvələrinin Naxçıvan şəhərində yerləşən N saylı hərbi hissəsində müddətli həqiqi hərbi xidmətdə olub. 2016-cı ildən isə müddətdən artıq həqiqi hərbi xidmət qulluqçusu idi.

Azərbaycan Ordusunun kiçik çavuşu olan Ayxan Heydərli 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb və oktyabrın 6-da Füzuli döyüşləri zamanı qəhrəmancasına şəhidlik məqamına yüksəlib.

Ayxan Heydərli şəhadətindən sonra "Vətən uğrunda" və "Füzulinin azad olunmasına görə" medalı ilə təltif edilib.

***

Asif Nəsir oğlu Mədədov 1988-ci il iyunun 1-də Ağstafa rayonunun Kolxəlfəli kəndində anadan olub. 1994-2005-ci illərdə Kolxəlfəli kənd tam orta məktəbində təhsil alıb. Ailəli idi.

Asif Mədədov 2006-2008-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2015-ci ildən Azərbaycan Silahlı Qüvvələrinin sıralarında müddətdən artıq həqiqi hərbi xidmət hərbi qulluqçusu kimi xidmət edirdi.

Azərbaycan Silahlı Qüvvələrinin əsgəri olan Asif Mədədov 2020-ci il sentyabrın 27-də başlanan Vətən müharibəsi zamanı Hadrut və Şuşanın azadlığı uğrunda gedən döyüşlərdə savaşıb. Asif Mədədov noyabrın 8-də Şuşa döyüşləri zamanı şəhid olub. Ağstafa rayonunun Kolxəlfəli kəndində dəfn olunub.

Asif Mədədov şəhadətindən sonra "Vətən uğrunda", "Döyüşdə fərqlənməyə görə", "Şuşanın azad olunmasına görə" və "Hərbi xidmətlərə görə" medalları ilə təltif edilib.

***

Elçin Bəxtiyar oğlu İsrafilzadə 1990-cı il iyulun 11-də Şəmkir rayonunun Qədimqala kəndində anadan olub. 1996-2005-ci illərdə Qədimqala kənd tam orta məktəbində təhsil alıb.

Elçin İsrafilzadə 2008-2010-cu illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2015-ci ildən Azərbaycan Silahlı Qüvvələrinin sıralarında müddətdən artıq həqiqi hərbi xidmət hərbi qulluqçusu kimi xidmət edirdi.

Azərbaycan Silahlı Qüvvələrinin əsgəri olan Elçin İsrafilzadə 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Elçin İsrafilzadə oktyabrın 20-də Füzuli döyüşləri zamanı şəhid olub. Şəmkir rayonunun Qədimqala kəndində dəfn olunub.

Ailəli olan şəhidimizin Kənan, Leyla və Yusif adlı üç övladı yadigar qalıb.

Elçin İsrafilzadə şəhadətindən sonra "Vətən uğrunda" medalı ilə təltif edilib.

***

Eldost Asəf oğlu Hüseynov 1996-cı il dekabrın 16-da Şamaxı rayonunun Talışnuru kəndində anadan olub. 2002-2013-cü illərdə Talışnuru kənd tam orta məktəbində, 2013-2017-ci illərdə isə Azərbaycan Dövlət Bədən Tərbiyəsi və İdman Akademiyasında (ADBTİA) təhsil alıb. Subay idi.

Eldost Hüseynov 2017-2018-ci illərdə Azərbaycan Silahlı Qüvvələrinin Tərtər rayonunda yerləşən N saylı hərbi hissəsində müddətli həqiqi hərbi xidmətdə olub.

Vətən müharibəsi zamanı Tərtər rayonunun Talış qəsəbəsinin azadlığı uğrunda gedən döyüşlərdə savaşan Eldost oktyabrın 7-də Talış döyüşləri zamanı şəhidlik zirvəsinə ucalıb. O, Şamaxı Şəhidlər xiyabanında dəfn olunub.

Eldost Hüseynov şəhadətindən sonra "Vətən uğrunda" medalı ilə təltif edilib.

***

Səid Nofəl oğlu Rəşidzadə 1990-cı il yanvarın 28-də Füzuli rayonunun Horadiz şəhərində anadan olub. Onun atası Nofəl Qasımov da 1992-1993-cü illərdə Füzuli rayonunun erməni işğalçılardan müdafiəsinə fədakarlıqla başçılıq edənlərdən olub. Səid Rəşidzadə 1996-2007-ci illərdə Nərimanov rayonunda S.Yolçuyev adına 207 nömrəli tam orta məktəbdə təhsil alıb. Ali təhsilini isə 2007-2011-ci illərdə Heydər Əliyev adına Azərbaycan Ali Hərbi Məktəbində alıb. Subay idi.

Səid Rəşidzadə 2011-ci ildən Azərbaycan Silahlı Qüvvələrinin sıralarında xidmət edirdi. Səid Rəşidzadə 2016-cı ilin 2-5 aprelində baş verən döyüşlərdə Polad Həşimovla çiyin-çiyinə savaşıb.

Bir neçə il əvvəl Azərbaycan Ordusundan tərxis olunsa da, Tovuz döyüşləri zamanı Polad Həşimovun öldürülməsi ona çox pis təsir edib. 2020-ci il sentyabrın 27-də başlanan Vətən müharibəsi zamanı könüllü olaraq döyüşlərə yollanıb. Səid Rəşidzadə Hadrutun azadlığı uğrunda gedən döyüşlərdə savaşıb və oktyabrın 11-də Hadrut qəsəbəsində Azərbaycan bayrağını sancan zaman şəhid olub. Füzuli rayonunda dəfn olunub.

Səid Rəşidzadə şəhadətindən sonra "Vətən uğrunda" və "Xocavəndin azad olunmasına görə" medallarına layiq görülüb.

***

Şükür Aslan oğlu Hacıyev 8 mart 2000-ci ildə Yevlax şəhərində doğulub. Əslən Laçın rayonunun Budaqdərə kəndindən idi. Orta məktəbi bitirdikdən sonra 2018-ci ilin iyul ayında müddətli həqiqi hərbi xidmətə yollanıb.

Azərbaycan Ordusunun əsgəri olan Şükür Hacıyev 2020-ci il sentyabrın 27-dən başlanan Vətən müharibəsində iştirak edərək Qubadlı döyüşlərində vuruşub. O, noyabrın 5-də Şuşanın azad edilməsi uğrunda gedən döyüşlərdə döyüş tapşırığını yerinə yetirərkən şəhid olub.

Şükür Hacıyev şəhadətindən sonra "Vətən uğrunda" və "Qubadlının azad olunmasına görə" medalı ilə təltif edilib.

Şahanə MÜŞFİQ

525-ci qəzet.- 2021.- 1 iyul. S. 14-15.