Hazırladığım əl işlərinin çoxunu hədiyyə edirəm"

Ramin Qulammirzəyev: "Bizdə əl işlərinə maraq çox azdır"

Taxtadan hazırladığı əl işləri ilə sosial mediada məşhurlaşan Ramin Qulammirzəyev ixtisasca operator olsa da, bu sahəyə daha çox maraq göstərir. Dediyi kimi, əl işləri hazırlamağı və rəsm çəkməyi hobbi sayır.

Ramin Qulammirzəyevlə söhbəti təqdim edirik.

***

- 2015-ci ilə qədər hər yeni ildə uşaqlara hədiyyə alırdım. Həmin il hədiyyə ala bilmədiyim üçün internetdən taxtadan əl işi hazırlamağın üsullarını araşdırdım. Onlar üçün taxtadan hədiyyə hazırladım. Elə o vaxtdan bəri müxtəlif suvenirlər hazırlayıram.

- Nə qədər vaxt sərf edirsiniz həmin işləri hazırlamağa?

- Suvenirin hazırlanması onun həcminə görə dəyişir. Əvvəlcə kəsib hazırlayıram. Sonra yapışdırma və boyama işi başlayır. Beləcə, əl işlərinin hazırlanması təxminən bir həftə vaxt aparır.

- Hazırladığınız əl işlərindən qazanc əldə edirsinizmi?

- Sata biləndə satıram, alınmayanda isə hədiyyə verirəm. Toz bağlayana kimi kiminsə evində xoş bir aura yaradır. Kimisə sevindirərək özüm də sevinirəm. Qazancım əsasən köhnə stolları, divan və kresloları yenidən təmir edəndə olur.

- Hazırda harada işləyirsiniz?

- İlk dəfə ANS telekanalında operator kimi çalışmağa başlamışam. Sonradan isə İctimai Televiziya yaranan gündən fəaliyyətimi orada davam etdirdim.

- Sosial şəbəkələrdə əl işlərinizi paylaşmaq qərarına necə gəldiniz?

- Elə sosial mediada paylaşım etməyə də 2015-ci ildən başlamışam. Dostlar sağ olsunlar, bəziləri məsləhət verib köməklik etdilər. Beləcə bu işə başlamağıma vəsilə oldular.

- Hər bir insanın sevdiyi musiqi olur. Bəs siz əl işlərinizi hazırlayarkən hansı musiqilərə qulaq asırsınız?

- Mən iş gördüyüm zaman musiqiyə qulaq asmıram. Çünki alətlərin səsi musiqinin səsini öldürür. Onun üçün musiqini yol gedərkən qulaqcıqda dinləyirəm və hər düzəltdiyim suvenirin fonunda gözəl musiqilər seçib paylaşıram.

- Bildiyim qədər, əl işlərinizin çox olmasına baxmayaraq, emalatxananız yoxdur. Emalatxana açmaq fikriniz varmı?

- Emalatxana üçün müəyyən maliyyə və hazırladığın əl işlərinə tələbat olmalıdır. Onlar olmadığı halda emalatxana açmaq xeyir əvəzinə zərər gətirəcək. Daha çox heyvanlar üçün evlər düzəltdiyimə görə istəyərəm həyətində bir emalatxanam olsun, amma onun üçün də yer yoxdur.

- Gələcəklə bağlı hansı planlarınız var?

- Mən çox vaxt nəyisə planlaşdırmağı sevmirəm. Çünki əvvəlcədən nəyisə planlaşdıranda alınmır. Adicə suvenirləri də anidən gələn fikirlərlə hazırlayıram. Amma xaricdə mənim hazırladığım əl işlərinə maraq olduğu üçün orda yaşayıb, əl işlərimi hazırlayıb marağında olan insanlar üçün istehsal etmək istərdim.

Günel ABBAS

525-ci qəzet.- 2021.- 7 iyul. S. 22.