Akademik Azad Mirzəcanzadə haqqında yeni nəşr

Azərbaycanda neft elminə böyük töhfələr vermiş alimlərdən biri də akademik Azad Mirzəcanzadə olub.

Onun elmi əsərləri, neft sənayesinin inkişafı üçün gördüyü işlər öz dövrünün tədqiqatlarına mayak olub, hətta gələcək nəsillərin araşdırmalarına da istiqamət verib. Azərbaycan tarixində elmin inkişafı naminə əvəzolunmaz əməyi olan Azad Mirzəcanzadənin elmi görüşləri bu gün də ali təhsil ocaqlarında tədris olunur, tədqiqatçılar onun yazılara həkk edilən təcrübəsindən bəhrələnir.

2019-cu ildə texnika elmləri doktoru, professor Eldar Şahbazov və Neftqazelmitədqiqatlayihə İnstitutunun "Qazma və sement məhsulları" laboratoriyasının müdiri, texnika elmləri doktoru Elçin Kazımovun həmmüəllif olduğu "Akademik Azad Mirzəcanzadə - Neft elminin fenomeni" adlı monoqrafiya işıq üzü görüb. Ötən illərin nəşrlərini vərəqlədikdə bu kitabın xüsusi əhəmiyyət kəsb elədiyinin şahidi oluruq. Azad Mirzəcanzadənin həyat və yaradıcılığının məcmusu olan kitab oxucular üçün əsas bələdçi rolunu oynayır. Onun fəaliyyətindən xəbərsiz olan kimsə bu kitab vasitəsilə çox mətləblərdən agah ola bilər. Monoqrafiya alimin pedaqoji fəaliyyətinə, neft sənayesində fundamental işlərinə, elmi əsərlərinə, bu günə və gələcəyə yönələn baxışlarına həsr olunub.

Kitabda məlumatlar üç dildə - Azərbaycan, rus və ingilis dillərində öz əksini tapıb. Ön sözdə yüzlərlə elmi əsərin və patentin müəllifi Azad Mirzəcanzadənin elmi ixtiraları, tədqiqat istiqaməti barədə məlumat verilib. Kitabın müəllifləri Azad Mirzəcanzadənin tələbələri olduqları üçün qürur duyduqlarını qeyd ediblər.

"Alim, müəllim, pedaqoq, ensiklopediyaçı, ziyalı, erudit" bölməsində vaxtilə Eldar Şahbazovun Azad Mirzəcanzadədən aldığı müsahibə öz əksini tapıb. Növbəti səhifələrdə akademikin bioqrafiyası ilə tanış ola bilirik. Həmçinin, Azad Mirzəcanzadənin xatirələrindən maraqlı nüanslar oxuculara təqim olunub. Onun ixtiralar, müəllifi olduğu monoqrafiyalar, sədri olduğu beynəlxalq konfranslar, seminarların təşkilat komitələri növbəti hissələrdə sadalanıb.

"Akademik Azad Mirzəcanzadə şagirdlərin gözü ilə" adlanan hissədə Ələkbər Süleymanov, İ.M.Ametov, A.R.Kinzikbeyev, Eldar Şahbazov, Elmira Ramazanova, Tulparxan Salavatov, Əhəd Canəhmədovun Azad Mirzəcanzadə haqqında müxtəlif sərlövhəli yazıları yer alıb.

Kitabın sonunda Azad müəllimin ömrünün müxtəlif illərindən fotolar əks olunub.

Nadir YALÇIN

525-ci qəzet.- 2021.- 9 iyul. S. 15.