Əbədiyyət ünvanı

O GÜNDƏN QIRX GÜN ÖTDÜ...

İyunun 4-də Kəlbəcər rayonun Susuzluq kəndinə gedən yolda AZƏRTAC-ın əməkdaşı Məhərrəm İbrahimovla Azərbaycan televiziyasının operatoru Sirac Abışovun tank əleyhinə mərminin partlaması nəticəsində həlak olaraq şəhidlik zirvəsinə yüksəldikləri gündən qırx gün keçdi...

Ağrı, iztirab, üzüntü, təəssüf, həsrət dolu qırx gün...

Susuzluq yolunda partlayan mərminin səsi haralarda eşidilmədi, kimləri silkələmədi? Dünyanın aparıcı informasiya agentlikləri, televiziya kanalları, ayrı-ayrı ölkələrin mətbu nəşrləri peşə fəaliyyətini yerinə yetirərkən erməni terrorunun qurbanı olan həmkarlarımız haqqında faciəni dünyaya yaydılar. Tanınmış ictimai-siyasi xadimlər, siyasətçi və politoloqlar erməni vəhşiliyinin növbəti ifadəsi olan bu hadisəyə münasibət bildirdilər.

Həmin o mərminin bir qəlpəsi də milyon-milyon ürəklərə yayıldı, iş başında xidməti vəzifəsini icra edən günahsız adamların faciəli ölümü sinələri göynətdi...

İşğaldan azad edilmiş Füzuli, Cəbrayıl, Xocavənd, Ağdam, Qubadlı rayonlarını kənd-kənd, məhlə-məhlə, küçə-küçə, ev-ev lentə alıb erməni quldurlarının törətdiyi vandallığı tarixin yaddaşına çevirənlər indi özləri yaddaşa çevrildılər.

Hər gün Bakının Binəqədi rayonunda Məmmədəmin Rəsulzadə qəsəbəsi, Cəfər Cabbarlı küçəsində dalan yollarına düşən izlərdən biri itdi. Qırx gündür ki, bu həyətdə hər şey dəyişib, evin hər küncünə, hər qarışına atasızlıq, kimsəsizlik və hüzn çöküb.

Üç qardaşın, dörd bacının istəkli qardaşı, iki uşağın atası Məhərrəm İbrahimov həyat səhnəsindən çəkilib getdi...

Qırx gündür ki, Məhərrəmsiz qalan ev, həyət, küçələr, iş yeri... Onsuz qalan ailə üzvləri, qohumlar, dostları, yoldaşları...

O, bir də bu dalan yolları ilə addımlayıb qapının ağzında dayanıb yolunu gözləyən həyat yoldaşı Baharın, bir cüt gül balasının görüşünə tələsməyəcək...

Axşamlar işdən qayıdıb darvazadan içəri girəndə bir cüt uşağın tamet döşənmiş həyətdə onun qarşısına yüyürüb "Atam gəldi!" sədası qaçaq düşdü...

Böyük oğlu Uğur "Ata, bazar günü məni gəzməyə apararsan" deməyəcək...

Səhərlər evdən çıxanda kiçik oğlu "Ata, axşam mənə şirniquş alıb gətirərsən" tapşırmayacaq...

Qardaşları Əkbər, Əsgər, Qarabağ əlili Ələsgər, bacıları Sevda, İradə, Fəridə və Azadə ötən qırx günün hər saatında, hər dəqiqəsində ailənin sonbeşik üzvünün itkisi ilə yanıb-yaxıldılar...

Azərbaycan Televiziyasının həyətində ağ mərmər lövhə üzərində Birinci Qarabağ müharibəsi dövründə öz peşə fəaliyyətini yerinə yetirərkən şəhid olan jurnalistlərin sırasına AZƏRTAC-ın müxbiri Məhərrəm İbrahimov və Azərbaycan Televiziyasının operatoru Sirac Abışovun da adları əlavə olundu. Televiziyanın girişində, AZƏRTAC-ın foyesində şəhid jurnalistlərin xatirəsini əbədiləşdirən guşənin önünə hər gün təzə-tər gül-çiçək dəstələri qoyuldu.

Prezidentin Sərəncamı ilə 3-cü dərəcəli "Vətənə xidmətə görə" ordeni ilə təltif edildi.

"Vikipediya"nın beş xarici dil bölməsində "Susuzluq kəndi yaxınlığında partlayış" adlı məqalə yaradıldı.

Niderlandda azərbaycanlı jurnalistlərin xatirəsinə beynəlxalq poçt markası buraxıldı.

... AZƏRTAC-ın ordu və hüquq xəbərləri redaksiyasında Məhərrəmin oturduğu stul qırx gündür ki, boşdur.

İş yerinin dördüncü mərtəbəsində pilləkənin başındakı zibilxanaya atılan siqaret kötükləri azaldı, dost-tanış toylarında bir hava çalınmadı...

Rus yazıçısı Vladimir Nabokov yazır ki, insan ömrünün ən qısa tarixçəsi qəbiristanlıqda başdaşlarının üstünə həkk olunmuş rəqəmlərdir. İndi Məhərrəmin qara mərmər başdaşı üzərində iki rəqəm yazılıb: 1982-2021. Amma bu iki rəqəm arasına nə qədər hiss, həyəcan, duyğu və iztirab sığışıb.

Bir şairin misralarıdır:

Söykəndik dünyanın yaxşı dağına,

Heyf, sonra bildik sonu hədərdi.

Heyf yaxşıların yaxşılığına

Hamısı bir ömrün boyu qədərdir.

Amma yox! Nə yaxşılıq, nə qəhrəmanlıq bir ömrün boyu qədər ola bilməz. İllər ötüb keçəcək, Suzuzluq yolunda baş verən faciəli hadisə zaman-zaman xatırlanacaq və həmin faciənin qurbanı olan Məhərrəm İbrahimovla Sirac Abışov həmişə ən xoş hisslərlə xatırlanacaq, onların ruhuna dualar oxunacaq...

İnsan doğulur ölmək üçün, ölür yaşamaq üçün. Dünyanın bu əzəli və əbədi qanununa qarşı kim çıxa bilib ki? Ölüm gec-tez, əvvəl-axır hamının qismətidir. Qardaşı Əsgərin də dediyi kimi: "İnsan ömrü 70-80, bəlkə də bir az artıq ola bilər. Şəhid ömrü isə əbədidir. Biz bu dünyada olmayanda onların adı yaşayacaq, xatırlanacaq, göstərdikləri nümunə sonrakı nəsillərə örnək olacaq. Qardaşım əbədiyaşarlıq qazandığına görə iftixar hissi keçirirəm".

Lakin Məhərrəm 39 yaşında öz ölümsüzlüyünü, əbədiyyətini qazandı. Zaman ötsə də, neçə-neçə illər keçsə də, o, bu dünyanın əbədi sakinlərindən biri olaraq qalacaq...

Süleyman QARADAĞLI

525-ci qəzet.- 2021.- 14 iyul.- S.24.