Musiqimizin sabahından soraq verən istedad

Hər ilin 1 iyunu Uşaqların Beynəlxalq Müdafiəsi Günü kimi qeyd olunur. Dünyanın bir çox ölkələrində olduğu kimi, Azərbaycanda da bu günə xüsusi önəm verilir, dövlət səviyyəsində qeyd edilir.

Ümumiyyətlə, Azərbaycanda uşaqların sağlam inkişafının təmin olunmasını, onların təhsilinin, sosial fəaliyyətinin gücləndirilməsi və eləcə də, təhlükəsizliyinin qorunması üçün ciddi və önəmli addımlar atılır, layihələr həyata keçirilir. Heç təsadüfi deyil ki, Azərbaycan Respublikasının Prezidenti İlham Əliyevin Azərbaycan Respublikasında uşaqlara dövlət qayğısının gücləndirilməsi, uşaq problemlərinə vətəndaş cəmiyyəti qurumlarının diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədi ilə 22 dekabr 2008-ci il tarixli Sərəncam imzalamışdı. Sərəncama görə, 2009-cu il "Uşaq ili" elan olunmuşdu. Bu kimi tədbirlərin sayəsində, gün keçdikcə ölkəmizdə müxtəlif sahələrdə uğurlu uşaqların sayı artmaqdadır. Xüsusən, mədəniyyət və incəsənət yönündə istedadlı uşaq və gənclərimiz gündən-günə parlayırlar.

Həmin istedadlı uşaqlardan biri də Məhəmməd Allahverdiyevdir. Məhəmməd Bülbül adına orta ixtisas musiqi məktəbinin 7-ci sinif şagirdidir. O, burda fortepiano və bəstəkarlıq üzrə təhsil alır. Caz, muğam, vokal dərsləri ilə isə fərdi məşğul olur. Könlünü, həyatını musiqiyə bağlayan gənclərimizdəndir Məhəmməd. Professional musiqini öyrənməyin və təbliğinin tərəfdarıdır. O, təkcə musiqini öyrənməklə kifayətlənmir, praktiki şəkildə öz üzərində işləyərək, müxtəlif layihə və müsabiqələrə, festivallara qatılaraq, həm təcrübəsini genişləndirir, həm də musiqimizi ölkə xaricində də təbliğ edir. Bir çox beynəlxalq musiqi festivallarında uğurla çıxış edərək laureat olub.

Yaşının az olmasına baxmayaraq, bəstələdiyi bir çox mahnı uğur qazanıb. Məsələn, ərazi bütövlüyümüz uğrunda baş verən Vətən müharibəmizdə parlaq qələbəyə həsr etdiyi "Zəfər marşı" hərbi orkestr tərəfindən səsləndirilib. 11 yaşında bəstələdiyi bir əsəri yerli serialların birində "soundtrack"ə çevrilib.

Dünyada və ölkəmizdə bir ildən çoxdur ki davam etməkdə olan məlum pandemiya bütün sahələr kimi, mədəniyyət sahəsinə də ciddi təsirlərini göstərdi. Bir sıra mədəni tədbirlər, festivallar ya fəaliyyətini dayandırdı, ya da onlayn rejimə keçdi. Gənc musiqiçimiz Məhəmməd Allahverdiyev isə bu dövrdə də fəaliyyətini dayandırmayıb. Onlayn fəaliyyətdən maksimum yararlanmağa çalışıb və nəticədə internet üzərindən Azərbaycan Xalq və bəstəkar mahnılarının təbliğatı istiqamətində "Friendship Project" layihəsinə başlayıb. Dünyada inkişaf etmiş ölkələrlə dostluq musiqi layihəsi etməyi qarşısına məqsəd qoyan Məhəmməd bu layihə çərçivəsində həyata keçirdiyi bir çox işləriylə bu məqsədinə hər gün bir az da yaxınlaşır. Layihə çərçivəsində o, Danimarka, İspaniya, Türkiyə, Pakistan, İran, İsrail və Braziliya sənətçiləri ilə Azərbaycan musiqisinin maraqlı sintezini aranjiman edərək video-rolik ilə təqdim edir. Bu günə kimi o, "Gəl, ey səhər" (Türkiyə), "Ayrılıq" (İran), "Gül açdı" (Danimarka), "Gəl" (İspaniya), "Evlər var xana-xana" (Braziliya), "Yaşa, Azərbaycan!" (Türkiyə-Pakistan-İsrail) mahnılarını sözügedən ölkə musiqiçiləriylə birgə ifa edib. Əlbəttə, bu da qismən də olsa Azərbaycan mədəniyyət dostluğuna gətirib çıxarır. Hazırda Ukrayna sənətçiləri ilə birgə "Sarı gəlin" xalq mahnısını ərsəyə gətirməyi düşünür. Özünün sözlərinə görə, bu istiqamətdə artıq işlər başlayıb, məşqlər gedir. Məhəmməd Allahverdiyevin artıq bir albomu rəqəmsal musiqi platformalarında işıq üzü görüb.

Müxtəlif müsabiqələr laureatı Məhəmməd Allahverdiyevin yaşı az olsa da, istəkləri, aruzları və qarşısına qoyduğu məqsədi böyükdür. Məhəmməd və onun kimi Azərbaycan musiqisinin vurğunu, Azərbaycan mədəniyyətini, incəsənətini dünyada tanıtmağa iddialı gənclərimizin varlığı hər birimiz üçün sevinc və fəxr yeridir. Biz də Məhəmməd və onun timsalında bütün uşaqları 1 İyun Uşaqların Beynəlxalq Müdafiəsi Günü münasibətilə təbrik edir, onlara möhkəm sağlamlıq və yeni uğurlar arzulayırıq!

Şahanə MÜŞFİQ

525-ci qəzet.- 2021.- 1 iyun .- S.9.