"Əsas məqsədim insanları
düşündürməkdir"
TƏLİMÇİ
ORXAN ŞAHBAZ: "HƏMİŞƏ
İSTƏMİŞƏM Kİ, MƏNİ ÖYRƏDƏN,
İNSANLARA FAYDA VERƏN BİRİ KİMİ TANISINLAR"
Keçmişdə insanlar nəyisə öyrənmək, məlumat
almaq üçün
mütləq ya cild-cild kitablar oxumalı, ya da uzun yollardan
keçib bilgili insanları axtarıb tapmalı olurdular.
Artıq dünya dəyişib, ən müxtəlif fəaliyyət sahələri
yaranıb. Amma bununla belə öyrənmək, bilgi əldə etmək imkanları da genişlənib.
Bu gün insanlara
müəyyən mövzular
barədə bilgi verən, məqsədlərinə
çatmaqları üçün
onlara yardım edən ən məşhur fəaliyyət
sektorlarından biri də təlimdir.
Davamlı keçirilən təlim və seminarlar vasitəsilə insanlar öz potensiallarının
daha tez fərqinə varır və nə etməli olduqlarını
öyrənirlər.
Budəfəki müsahibimiz Orxan Şahbazla söhbətimiz
də təlim və təlimçilik haqqındadır.
Orxan Şahbaz 1992-ci il
martın 7-də Füzuli
rayonunun Qaraxanbəyli
kəndində anadan olub. Ali təhsilini Odlar Yurdu və
Amerikanın "Lincoln" Universitetinin ikili diplom proqramı ilə biznesin idarə edilməsi və marketinq ixtisası üzrə alan Orxan
Şahbaz hazırda Şotlandiyanın Qlazqo Universitetində sosial psixologiya ixtisası üzrə distant təhsil
alır.
***
- Təlimçi olmağa necə qərar verdiniz?
- Təlimçi olmağa qərar verməyimdə iki əsas nüans
rol oynadı. Birincisi, həmişə istəmişəm
ki, məni tanısınlar. İkincisi, məni
öyrədən, kimlərəsə
fayda verən biri kimi tanısınlar.
- Bəs ilk dəfə insanlara fayda verdiyinizi, tanındığınızı
nə vaxt hiss etdiniz? İlk təəssürat necə oldu?
- Bu, birdən baş verməyib, amma təlim keçdiyim müddətdə geri dönüşlər var idi. Sosial şəbəkələr vasitəsilə təşəkkür
edir, dəyişiklikləri
gördüklərini deyirdilər.
Təsir
edə bildiyimi görmək xoş gəlir mənə.
Hətta
bir video paylaşdıqdan
sonra insanlar oradan nəsə götürüb özlərində
tətbiq edirlərsə,
bu, əladır.
Bir də, düşünürəm
ki, insanların həyatda çatmaq istədiyi yerə getməsinə, dəyişməsinə
yardım edə bilsən, həyatda hər şeyə sahib olarsan.
- Azərbaycanda təlimçi
yetişdirən kurslar
və təlimçilər
sürətlə çoxalır.
Sizcə, hər kəs təlimçi ola bilərmi?
Ya da təlimçi olmaq üçün nələr lazımdır?
- Xeyr, hər kəs təlimçi ola bilməz.
Çünki burada insanın
öyrədə bilmək,
analiz etməyi bacarmaq kimi xüsusi
keyfiyyətlər mühüm
rol oynayır. Ümumiyyətlə, təlimçi dediyiniz
insanda mütləq şəkildə oxumaq, araşdırmaq, müzakirə
etmək, nələrisə
analiz etmək və öz beynində yaratdığı
nələrisə ortaya
qoya bilmək bacarığı olmalıdır.
Təlimçi olmaq üçün
bu bacarıqları formalaşdırmaq mütləqdir.
Təlimçi yetişdirən kursların
çox olması məsələsinə gəldikdə
isə, fikrimcə, birinci səbəb bu sahənin gəlirli sahə olduğunu düşünməklə
bağlıdır. Yəni təlim
keçdinsə, hamı
gələcək deyə
düşünürlər, ancaq belə bir şey yoxdur.
İkinci əsas məsələ isə tanınmaq ola
bilər. Ölkədə yeni olan şeylər hər zaman insanlar tərəfindən dəbdəbə
ilə qarşılanır.
Onlar bunun yeni olduğuna
görə məşhurlaşacağını
düşündükləri üçün belə bir yol seçirlər.
Amma başqa müxtəlif səbəblər
ola bilər.
Bu insanlar təlimçi
ola bilər
deyə müəyyən
standartlar yoxdur.
- Nitqində irad tutulan, auditoriya qarşısında ləhcə
ilə danışan bir çoxları deyir ki, əsas
nə danışdığındır.
Bəs sizcə, həqiqətən
nitqin mükəmməlliyi
təlimçi üçün
ikinci plandadır?
- Burda önəmli olan nə deməyin
yox, necə deməyindir. Ola bilər
ki, insan şəkili, qarabağlı,
bakılı olub öz ləhcəsindən
istifadə etsin.
Bu, tamamilə normaldır. Ancaq yaxşı
olar ki, akademik çıxışları
bacarsın. Yeri gələndə
məişət, yeri
gələndə isə
akademik çıxışlar
etsin. Dolayısı ilə ləhcənin
olub-olmaması nitqimizə
o qədər də təsir göstərmir.
Ləhcəni nitqimizdə elə
formada təqdim edə bilərik ki, insanlara çox
maraqlı və şirin görünə bilər. Bu da
bizə əlavə müsbət aura yaradar.
- Təlimlərinizdə insanlara
vermək istədiyiniz
əsas şey hansılardır? İstədiyiniz nəticəni alırsınızmı?
- Mənim əsas məqsədim insanları
düşündürməkdir. Yəni heç bir insana "gedin bunu eləyin, uğurlu olacaqsınız"
kimi yanaşmıram.
Bir insanı düşündürə
bilirsənsə, o, hər
şey etməyə qadirdir. Ona görə mütləq
düşündürəcək nələrsə eləməyə
çalışıram. Bu da suallar və müzakirələr
vasitəsilə olur.
Bir insanın özü ilə üzləşməsinə
yardımçı oluram.
Və həmin insan özü ilə üz-üzə qalanda nələrin doğru, nələrin yanlış
olduğunu daha yaxşı analiz edə bilir. Analiz edə bildiyinə görə daha yaxşı düşünə
bilir və bu düşüncə onu daha da
yaxşı inkişaf
etdirir.
- Bu sahənin inkişafı ilə bağlı hansısa planlarınız
varmı?
- Hazırda sosial araşdırmalar aparıram.
Cəmiyyətin akademik səviyyəsinin
daha da artırılması
üçün bəzi
planlarım var. Təlim
sektoru ilə bağlı nələrisə
dəyişmək üçün
nazirliyə müraciət
edəcəyəm. İnsanların fərdi inkişaf etməsi üçün
yeni planlar və təlimlər hazırlayıram. Yavaş-yavaş bunları tətbiq etməyə başlayacağam.
- Təlimlərinizdə qeydə
alınan ən maraqlı və sizinçün fərqləndirilə
bilən hansısa anlar olubmu?
- Belə anlar çox olub, xüsusilə qıcıqlanma
ilə bağlı
lap çox olub. Kənardan mənə deyirlər ki, çox eqoist görünürsünüz.
Hər zaman mənə əzici, qıcıqlandırıcı
və neqativ suallar verməyə meyilli olublar. Ona görə də xatirələrim daha çox neqativlərlə
bağlıdır. Və bunların üzərində
işləyərək neqativlərə
çoxlu cavablar hazırlamışam. Nümunə
olaraq birini deyə bilərəm: bir dəfə 500 nəfərlik forumda bir oğlan ayağa qalxıb gülə-gülə, lağ
edərcəsinə sual
verdi ki,
Orxan müəllim, təlimçi söhbət
xırdalaya bilər? Mən də cavabında dedim ki, yox, qardaş,
iri söhbətləri
xırdalamaq üçün
valyuta kəşf olunmayıb. Əslində, onların məqsədi
məni qıcıqlandırıb
əsəbiləşdirmək idi. Ancaq mənim cavabım
onlara daha maraqlı gəldi və bu anı
idarə edə bildim. Adətən, xanımlarla belə
neqativ hadisələr
olub. Hər birinə cavabımı
vermişəm və maraqlı alınıb.
Hələ ki auditoriyada
mənə qarşı
yönələn hər
hansı neqativdə qırılıb qalmamışam,
hamısına rahat cavab verə bilmişəm.
- Təlimçi kimi hansı mövzu haqqında danışmağa
çətinlik çəkmisiniz?
- Əslində, bütün
mövzular mənim üçün çətindir. Çünki
hər bir mövzunun məsuliyyəti
var və o məsuliyyət bir az çətinliklər
yarada bilir. Amma düşünürəm ki,
təlimdə iştirak
edənlərlə düzgün
kommunikasiya yaradılsa,
istənilən mövzunun
çətinliyini rahatlıqla
dəf eləmək olar. Və bu, məndə
alınır. Ona görə
yaranan ən xırda çətinliyi belə, insanlarla düzgün kommunikasiya yaradaraq aradan qaldırmağı bacara bildiyimi düşünürəm.
- Sizcə, Azərbaycanda ən çox hansı sosial mövzularda təlimlərə
ehtiyac var?
- Birinci əsas məsələ insanların
düşüncə və
davranışları ilə
bağlı təlimləri
çoxaltmaqdır. Buna təlimlərdən çox
seminarlar aiddir. Daha sonra insanların
sosial həyatı ilə bağlı, misal üçün, kişi və
qadın, ailədaxili
münasibətlər və
sairə bu kimi sosial mövzular
daha çox qabardılıb insanlara təqdim edilməlidir. Əlavə olaraq, insanların bacarıqlarının təkmilləşdirilməsi
ilə bağlı çoxlu təlimlər keçirilməlidir.
Aytac ASLAN
525-ci qəzet.- 2021.- 23 iyun.- S.17.