Jurnalistika nədir? Televiziya ekranından özünü göstərməkmi?

İbrahim Nəbioğlu, jurnalist:

- Poznerin təklifi

Vladimir Pozner çox mübahisəli bir fiqurdur. Ehtimal edirəm ki, onu qəbul etməyənlər edənlərdən qat-qat çoxdur. Di gəl ki, professionallığı şübhəsizdir. Təcrübəsi və intellekti mübahisə predmeti ola bilməz.

Haqqin.az-da oxuyuram ki, Pozner jurnalistika fakültələrinin ləğv olunmasını təklif edib. Tanınmış teleaparıcının sözlərinə görə, insana əsər yazmağı, rəsm çəkməyi və ya nota oxumağı öyrətmək olar, lakin onu yazıçı, rəssam və ya bəstəkar olmağı öyrətmək mümkün deyil. Jurnalistika ilə də eyni şeydir: əsl jurnalist müəyyən istedadla doğulmalıdır.

"Məsələn, mən jurnalistika fakültələrini ləğv edərdim və bunun əvəzinə alitəhsilli olanlar üçün jurnalistika məktəbləri yaradardım. Onlar artıq həyatı bir az tanıdıqları üçün jurnalistikaya niyə gəlmək istədiklərini başa düşərdilər. Anlayardılar ki, jurnalistika televiziya ekranından özünü göstərmək deyil", - deyə Pozner bildirib...

İnana bilməzdim ki, bir gün Poznerin hansısa bir fikrini ikiəlli müdafiə edə bilərəm. İmzalarına, yazı və dünya görüşlərinə hörmət etdiyim jurnalistlərin böyük bir hissəsi jurnalist təhsili almayıblar. Maraqlıdır ki, mənim tanıdığım və Usta saydıqlarımın böyük bir hissəsi heç humanitar təhsil də almayıblar. Çoxluq dəqiq elmlər, mühəndislik və iqtisadiyyat fakültələrindən məzundur.

Poznerin bu fikrilə razılaşmayıb, tez-tələsik əks-arqumentlər səsləndirməyə tələsənlərə isə ənənəvi jurnalistika deyə bir şeyin qalmadığını, dijitallaşmanın klassik jurnalistikanı başqa axarlara sürüklədiyini xatırlatmaq istəyirəm. Gəlin əvvəlcə yeni platformlara ayaq uydurmağa çalışacaq. Sonrası nisbətən asan olacaq...

Əfsaləddin Ağalarov, jurnalist:

- Ukraynanın tanınmış siyasi və hərbi ekspertləri Yuriy Koçevenko, Dmitri Qromokov, Yuriy Cukro və Valentina Bikova ilə olduqca mühüm və maraqlı müzakirələrimiz baş tutdu. Azərbaycan və Ukrayna arasında media əlaqələrinin qurulması istiqamətində fikirlərimizi bölüşdük. Onların Qarabağ müharibəsindəki böyük zəfərimizlə bağlı yüksək fikirlərini dinlədik. Sevindirici haldır ki, ekspertlər Azərbaycan ordusunun yüksək hərbi bacarıqları ilə bağlı bir xeyli məlumatlı idilər.

Elxan Şahinoğlu, politoloq:

- Rusiyanın Ermənistandakı səfiri Sergey Kopırkin bildirib ki, Rusiya sərhədçiləri artıq Ermənistanla Azərbaycan sərhədinin Zəngəzur hissəsində xidmətə başlayıblar. Bu, İrəvanın Moskvadan xahişi, daha doğrusu, çoxsaylı yalvarışlarıdır. Ermənistan öz tərəfində kimi istəyir yerləşdirə bilər, sadəcə erməni siyasətçilərdən və ictimai xadimlərdən biri özünə və cəmiyyətinə sual verməlidir ki, onlar bu illərdə "qurduqları" hansı dövlətdən danışırlar ki, ölkələrinin sərhədlərini də (Türkiyə, İran və Azərbaycan) başqa dövlətin - Rusiyanın hərbçiləri qoruyur?

Bu arada, Azərbaycan XİN-in açıqlamasına ehtiyac var ki, Rusiyaya mədəni sürətdə xatırladılsın ki, Azərbaycan-Ermənistan sərhədinin tamamı müəyyənləşəndən sonra həmin hissələrdə başqa dövlətin sərhədçiləri xidmətə başlaya bilər. Misal üçün, biz sərhəddə Qara gölün tamamına iddialıyıq, çünki bizə aiddir. İndi Rusiya sərhədçiləri sərhədin həmin hissəsində harda xidmət keçməyi planlaşdırırlar?

Asif Nərimanlı, jurnalist:

- Araikin etirafı: Qarabağda cəmi 35 min erməni var...

Seçkilərdə Paşinyanın qərargahında olduğu üçün Xankəndidə etirazla qarşılaşan separatçıların başçısı Araik Arutyunyan bunun səbəblərini izah edərkən, "Ermənistana möhtac olduqlarını" deyib və ciddi bir faktı etiraf edib.

"Ermənistanla əlaqələr qurmadan 35 min "vətəndaşın" sosial probleminin həllini necə təsəvvür edirsiniz?" - separatçıların başçısı bununla Paşinyana dəstəyini izah etməyə çalışıb.

35 min "vətəndaş": Araik hazırda sülhməramlıların nəzarət etdiyi ərazilərdə 35 min erməninin olduğunu etiraf edir.

Halbuki Rusiya Müdafiə Nazirliyi və separatçıların yaydığı məlumatlarda bu rəqəm iki dəfə və daha çox şişirdilir.

Rusiya Müdafiə Nazirliyi: sonuncu dəfə 52700 erməninin Qarabağa qaytarıldığını açıqlayıb;

Separatçılar: 105 min erməninin qayıtdığını iddia edirdi;

Bu rəqəmlərin şişirdildiyi bilirdik, amma Araikin dediklərini bunun sübutu hesab edə bilərik.

Qarabağa qayıdan ermənilərin bir qisminin verilən yardımı almaq üçün gəldiyi, daha sonra geri qayıtdığı haqda da məlumatlar var.

***

- Erməni mənbələri Azərbaycanla Ermənistan sərhədinin Geğarkunik bölgəsində Rusiya hərbçilərinin yerləşdiriləcəyi məlumatlarını yayıb. Ermənistanın Təhlükəsizlik Şurasının katibi Armen Qriqoryan və baş qərargah rəisi Artak Davtyan məlumatı təsdiqləyir.

Məlumatda diqqət çəkən məqam Rusiya hərbçilərinin sərhədin Azərbaycan yox, Ermənistan tərəfdən olan hissəsində və Sotk-Xoznavar istiqamətində yerləşəcəyidir.

Bu, proseslərin iki mümkün istiqamətdə inkişaf etdiyi ehtimalını önə çıxarır:

Birincisi, Azərbaycan hərbçiləri sərhəddə mövcud olduqları mövqelərdən geri çəkilmir və sərhədlərin müəyyənləşməsi SSRİ xəritələrinə uyğun həyata keçiriləcək;

İkincisi, sərhədlərin müəyyənləşməsi ilə bağlı mövcud olan "beynəlxalq müşahidəçi" təklifi arxa plana keçib.

İkinci məqam həm də Rusiyanın vasitəçiliyi ilə sərhədlərlə bağlı yeni müqavilənin aktuallığından xəbər verir.

Nikol Paşinyan sərhədlərin müəyyən edilməsi üçün ATƏT-in Minsk qrupunun həmsədr ölkələrinin iştirakı ilə "beynəlxalq müşahidəçilərin" yerləşdirilməsini təklif etmişdi: bu, Azərbaycan və Ermənistan dövlət sərhədinin bütün istiqamətini yox, Kəlbəcər istiqamətində - Sotkdan (Söyüdlü) Qafanın Xoznavar (Xəzinəvar) kəndinə qədər olan ərazini nəzərdə tuturdu.

Qərb ölkələrinin "beynəlxalq müşahidəçi" adı altında bölgəyə gəlməsi məsələsinin gündəmdən çıxması bir neçə kontekstdə əhəmiyyətlidir:

1. SSRİ xəritəsinə uyğun sərhədlərin müəyyənləşməsi ilə bağlı yeni müqavilə imzalanacaq: "beynəlxalq müşahidəçi"lərin gəlişi bu prosesdə əsas əngəl ola bilərdi;

2. Bu müqavilə Azərbaycan və Ermənistanın bir-birinin dövlət sərhədinin tanıması, İrəvanın Qarabağı Azərbaycan ərazisi kimi qəbul etməsi deməkdir;

3. Qərb-ABŞ bölgədə Rusiyaya qarşı alternativ kimi Türkiyənin mövcudluğunu qəbul edir və bu, həm sərhəd, həm Qarabağ məsələsində Bakının əlini ikiqat gücləndirir.

Elçin Alıoğlu, jurnalist:

- Sentyabrın ortalarında Ermənistanın Azərbaycanla ölkəmizin ərazi bütövlüyü və sərhəd toxunulmazlığını rəsmən tanıyacağı anlaşma imzalayacağı gözlənilir.

Mirsəməd Cəfərli, jurnalist:

- Yaxşı, maksimum 150 nəfərin iştirakı ilə toy. Axı bəzi adamların sosial statusuna heç uyğun gəlməyəcək? Onlar öyrəşiblər genliyə, bolluğa...

Bir vaxtlar toy ətrafında nə qədər pullar fırlanırdı, nə qədər israfçılıq, bədxərclik olurdu...

Foto-video sahəsində işləyən bir dostumuz danışır ki, bir toy üçün sifariş alırlar, qiymət təyin edirlər, 4000 manat.

Bəy çıxarıb 500 manat beh verir, qalanı da toydan sonra.

Uşaqlar da sevinib, gedirlər pivə içməyə.

Axşam bəydən zəng gəlir ki, u

şaqlar, bu 500 manat behi saxlayın özünüzə, amma toyda başqa adamlar çəkiliş edəcək.

Bəs niyə?

Bəy deyir, nişanlısı eşidəndə ki, foto-videoya cəmi dörd min manat xərclənəcək, etiraz edib, deyib niyə belə ucuz, onların gördüyü iş nə olacaq?

Aqşin Yenisey, şair:

- 18-20 yaşı var, yazıb ki, yaşamağı bacarmadım. Sən nə yaşadın ki, bu işi bacarmadığına əmin oldun? Kütləvi savadsızlıq!

Bir dəfə 22 yaşlı gənc şair müsahibə vermişdi, 21 yaşında başına gələn əhvalatı "mazide kalan" xatirə kimi danışmışdı.

Azərbaycanda qocalıq kultu o qədər dominantdır ki, gənclər xoşbəxtliyi vaxtından əvvəl qocalmaqda, hətta tələm-tələsik ölməkdə görürlər.

Cənazə şöhrəti!

Rövşanə Ağasəfqızı, jurnalist:

- Uzun illərdir efirdəyəm... Kamera ömür dostum... Kimləri görmədim ki... Kameranın işığı aydınlatdı dəyişən üzləri... Özünü ağıllı göstərəni, riyakarı, yalancı pafosu, dərs verəni, dərs deyəni, vedrə danqıltısı çıxaranın zəkadan danışmasını, mövqesizi, simasını satanı gördüm. Qalstuklu zəki görüntü, dayaz düşüncə, silikonlu gözəlçə, efir hesabına ortalıqda parıltı yaradan məzmunsuz varlıqlar gördüm. İstedadsızın millətə özünü necə sırıdığını, şeirdən bixəbərin söz yığnağının şahidi oldum, qiraətdən xəbərsizin cır səsindən qulağım batdı, heç kimə lazım olmayan təşkilat sahiblərinin gözə girməyindən gözlərim kor oldu, xoruz banını susduran səslər, hüquq qoruyan kəslər... Kameranın da gözü qamaşdı deyəsən.

İşıq düz üzümüzə düşür... Lap güzgü kimi...

Elçin İlqaroğlu, jurnalist:

- Fərz edək ki, il yarımdır nişanlı qalan cütlüyün 10 gün sonra toyudur. Gəlinin COVİD-19 pasportu olsa da, bəy hələ ki vaksinasiya olunmayıb. İndi nə olacaq, yazıq gəlin masanın arxasında tək oturacaq?

Özüm ölüm, xataya düşmüşük də...

525-ci qəzet.- 2021.- 25 iyun. S. 6.