Karantindən sonrakı "Qızıl toy"

Mədəni istirahətimizin əsas ünvanı olan teatrların açılışı əsasən teatrsevərlər üçün əsl bayrama çevrilib. Bu günlərdə teatrlara olan sonsuz marağın da əsas səbəblərindən biri məhz budur: iki illik fasilədə yetərincə darıxmaq. Ona görədir ki, tamaşaçılar axın-axın teatra üz tutur, bir aylıq repertuarın biletləri indidən satılıb qurtarır.

Oktyabrın 31-i Akademik Musiqili Teatrın qarşısında bunun bir daha şahidi oldum. Bir gün öncə "O olmasın, bu olsun" tamaşasıyla teatr mövsümünü açıq elan edən Musiqili Teatrda həmin gün "Qızıl toy" tamaşası oynanılacaqdı. Tamaşaya hələ 20 dəqiqədən çox zaman qalsa da, giriş qapısı və foye adamla dolu idi. Bir teatrsevər və illərdir teatrdan yazan mədəniyyət müxbiri kimi ilk sevincimi bu mənzərəyə şahid olduğum foyedə yaşadım və bu sevincimi Musiqili Teatrın direktoru, Əməkdar İncəsənət Xadimi Əliqismət Lalayevlə də bölüşdüm. Əliqismət müəllim teatrlara olan maraqdan ağızdolusu danışdı: "Bildiyiniz kimi, pandemiyayla əlaqədar teatrlar uzun müddətdir işləmədiyindən biz də fəaliyyətimizə ara vermişdik. Dünən, yəni oktyabrın 30-da biz Üzeyir Hacıbəylinin "O olmasın, bu olsun" komediyası ilə mövsümün ilk tamaşasını göstərdik. Çox sevincli idik. Tamaşaçılarımız da çox sevinirdilər. Bizim zalımız 450 nəfərlikdir. İndi pandemiya şərtlərinə görə 225 nəfər tamaşaçı qəbul etmək icazəmiz var. Zal bütünlüklə dolu idi. Ondan bildik ki, tamaşaçılar həddindən çox darıxıblar teatr üçün. Onu qeyd edim ki, noyabr ayının sonuna kimi elan olunan bütün tamaşalarımıza biletlər satılıb, yer yoxdur. Bu da onu göstərir ki, necə biz onlar üçün darıxmışıq, onlar da bizimçün darıxıblar. Arzu edirik ki, bundan sonra qapanmalar olmasın və Musiqili Teatr da daxil olmaqla, bütün teatrlar öz gözəl səhnə əsərləriylə tamaşaçılarımızı sevindirməkdə davam etsin. Çünki tamaşaçısız mümkün deyil".

Ə.Lalayev köhnə tamaşalarla yanaşı, yeni səhnə əsərlərinin də müjdəsini verdi: "44 günlük müharibədən sonra böyük zəfərimizə həsr olunmuş tamaşa üzərində işləyirik. "Bir nəfəs qədər" adlanan həmin tamaşa yaxın günlərdə təhvil veriləcək. Biz bu səhnə əsərini şəhidlərimizin ruhuna həsr etmişik və düşünürəm ki, yaxın gələcəkdə bu mövzuda əsərlərimiz hələ çox olacaq".

Əliqismət müəllimlə söhbətdən sonra zala keçirik. Tamaşaya çox az zaman qalıb. Burda da mənzərə çox gözəldir. Oturacaqların yarısı bağlanmış olsa da, zal tamaşaçılarla doludur.

Bu gün Musiqili Teatrın səhnəsində "Qızıl toy" (O.Kazımi və R.Heydər) iki hissəli musiqili komediyası 50-ci dəfə (2014-cü ildən) oynanılır. Ondan öncə isə səhnəyə tanınmış telejurnalist, Əməkdar mədəniyyət işçisi Telli Pənahqızı çıxdı. Teatrların fəaliyyətinin bərpasıyla bağlı sevincini bölüşən Telli xanım, eyni zamanda qeyd elədi ki, bugünkü "Qızıl toy" tamaşası bir zamanlar bu tamaşada rol alan, bu il martın 21-də uzun sürən xəstəlikdən dünyasını dəyişmiş mərhum sənətkar, Xalq artisti Ramiz Məmmədovun 70 illik yubileyi münasibəti ilə təqdim olunur. Telli Pənahqızının çıxışından sonra bütün zalda işıqlar söndü. Bu, çoxdandır gözlənilən anın yaxınlaşdığının əsas göstəricidir. Bəli, teatrlarımız fəaliyyətinə davam edir. Budur, səhnədə aktyorlar görünməyə başlayır.

Qeyd edim ki, yazıçı-dramaturq Ramiz Heydərlə Oqtay Kazıminin müştərək yaradıcılıq nümunəsi olan "Qızıl toy" tamaşasının quruluşu rejissor Yusif Əkbərova məxsusdur. Maraqlı və rəngarəng süjet xətti olan bu tamaşada Əməkdar artistlər Əzizağa Əzizov, Nahidə Orucova, Əkbər Əlizadə, Svetlana Bulax, Səidə Şərifəliyeva, aktyorlar Rəsmiyyə Nurməmmədova, Gülnarə Əzizova, Gültac Əlili, Şaban Cəfərov, Yuliya Heydərova, Əliməmməd Novruzov, Eleanora Mustafayeva, Türkel Tariqpeyma, Ruslan Mürsəlov, Elməddin Dadaşov və başqaları çıxış edirlər.

Xalq artisti Ramiz Məmmədov vaxtı ilə bu səhnə əsərində Qədir obrazını yaradıb.

İki ilə yaxındır səhnədən uzaq düşən aktyorların da sevinci, özləmi ifalarına da təsirsiz ötüşməmişdi. Sanki onlar daha şövqlə, daha böyük sevinclə rollarını oynayırdılar. Ülvi məhəbbəti və vətən sevgisini mövzu alan musiqili komediya cəmiyyəti maraqlandıran bir sıra önəmli mətləblərə də toxunur. Əsərin əsas ünvanı Bakı olsa da, toxunduğu mətləblər bəşəridir. Əsərin əsas qəhrəmanlarından Azər Fransadan atasının doğulub boya-başa çatdığı torpaqlara - Azərbaycana gəlir. O, atasının qohumlarının, qan bağı olan nəslinin nümayəndələrinin sorağıyla vətənə ayaq basır və elə hava limanındaca kimliyini bilmədən bələdçi qıza aşiq olur. Ata-baba yurdu Azərbaycanın tarixi-mədəni abidələrini, açıq səma altındakı möhtəşəm Qobustan muzeyini gəzdikcə, aid olduğu torpağın zəngin tarixini vərəqlədikcə həm vətən sevgisi, həm də azərbaycanlı qızına duyduğu məhəbbət daha da artır. Lakin Azər ağlına belə gətirmir ki, ona məhəbbəti daddıran, torpağını daha da çox sevdirən o qız elə illərdir sorağında olduğu qohumlarının qızı imiş.

Komik situasiyalarla zəngin səhnə əsəri toxunduğu mətləblərlə yanaşı, uğurlu rejissor işi, peşəkar aktyor oyunu ilə uzun illərdir ki, tamaşaçıların sevimli əsərlərindəndir və inanırıq ki, belə də qalacaq.

Şahanə MÜŞFİQ

525-ci qəzet.- 2021.- 3 noyabr.- S.21.