Qarabağ savaşı və böyük qələbəmizin tarixi Azərbaycan mətbuatında

(İkinci yazı)

Böyük qələbədə mətbuatın danılmaz rolunu dəyərləndirən professor Cahangir Məmmədli qeyd edir ki, "Mən həmin dövrdə qəzetlərin bu məsələyə necə yanaşmasını xüsusi diqqətlə nəzərdən keçirirdim. Mənim üçün doğma olan bir sıra qəzetlər var ki, bunlara rəsmi "Xalq qəzeti", müstəqil "525-ci qəzet", "Şərq" və s. nəşrlər daxildir. Bu qəzetlərin səhifələri 44 günlük savaş günlərində başdan-ayağa müharibə mövzusu ilə bağlı idi. Bu vətənpərvərliyə, peşəkarlığa və döyüşkənliyə görə mən jurnalistlərimizin fəaliyyətindən çox razıyam. Azərbaycan mediası Vətən müharibəsi zamanı yüksək peşəkarlıq və vətənpərvərlik sərgilədi".

Təbii ki, professorun "və s." deyərək qeyd etdiyi sıraya "Azərbaycan", "Respublika", "Yeni Müsavat" kimi onlarca nəşrlərin və gündəlik informasiya portallarının adlarını da əlavə etmək olar. Amma bu material bolluğunda həm də informasiya zənginliyi baxımından daha çox diqqəti cəlb etdiyi üçün "Xalq qəzeti"nin (Baş redaktor Əməkdar jurnalist Həsən Həsənov) üzərində dayanmağı məqsədəuyğun hesab etdik.

Prezident İlham Əliyevin xarici mətbuata müsahibələri düşmənüzərində üstünlüyü təmin etdi

Prezident xarici mətbuat orqanlarına, televiziya kanallarına verdiyi müsahibələrində, hətta jurnalistlərin çox aqressiv suallarını belə təmkinlə cavablandırmış, ikili mövqelərinə görə onları haqlı qınaq obyektinə belə çevirmişdir: "Biz Qərb mediasını yaxından müşahidə edirik və bu qırx gün ərzində mənim bəlkə də, otuz müsahibəm olub. Onların hamısı çox aqressiv idi, sanki bu, müsahibə deyildi, sanki bir ittiham idi. Ermənistan tərəfində isə sanki heç nə baş vermir. Heç kim Paşinyandan nəyə görə Gəncəyə ballistik raketlərlə zərbə endirdiyini soruşmur. Nəyə görə o, 92 nəfəri qətlə yetirib? Nəyə görə o, Tərtərdə dəfn mərasiminə hücum edib? Nəyə görə onlar 21 insanı qətlə yetirərək və 70 nəfəri yaralayaraq Bərdəyə hücum etmək üçün kassetli bombalarla "Smerç"dən istifadə ediblər? Heç kim ondan soruşmur. Yalnız bizə hücum edirlər. Beynəlxalq media yalnız Azərbaycanı ləkələyir".

Açıq mövqe, haqq işimizə böyük inam Azərbaycanın haqlı mövqeyi Prezidentin bütün müsahibələrində görünür. Əgər Türkiyənin "A Haber", NTV, CNN-Türk, "TRT Haber" televiziya kanallarının, Rusiyanın TASS informasiya agentliyinin, "Pervıy Kanal" televiziyasının, "Əl-Ərəbiyə" və "Əl-Cəzirə" televiziya kanallarının müxbirlərinin suallarında oxucu və ya dinləyici bir səmimiyyət, hadisələrin sülh yoluna xidmət meyllərini görürürsə, "BBC News"in, İspaniyanın EFE informasiya agentliyinin, Almaniyanın ARD, "Sky News" telekanalının, Rusiyanın "Rossiya-1" telekanalının "60 dəqiqə" proqramının müxbirlərinin suallarında jurnalist səmimiyyətinin yox, tərəfli və haqsız mövqe nümayişlərinə şahidlik etməkdəyik. Bu suallarda təkidlə Türkiyənin müdaxiləsi, hətta Qarabağa suriyalı muzdluların göndərilməsi belə elə soruşulur ki, sual verənlər jurnalistdən çox təhqiqatçı xarakterində görünürlər. Milli Məclisin Mədəniyyət Komitəsinin sədri Qənirə Paşayeva Almaniyanın ARD televiziya kanalının müxbirinin suallarını "Xalq qəzeti"ndə çox haqlı olaraq "Alman dövləti və alman xalqı, elə bilirik, rəsmən faşizmdən imtina edib - bu, yaxşıdır, təqdirə, alqışa layiqdir; lakin kim deyə bilər ki, ARD əməkdaşının ruhuna faşizm çökməyib? O suallar ki, ARD əməkdaşı tərəfindən verilmişdi, erməni faşizminə ortaq olmaqdır..." deyə dəyərləndirilir.

Müharibə başlayanda əks-hücum əməliyyatlarına kölgə salmaq, cəmiyyətdə çaşqınlıq, xaos, şübhə yaratmaq məqsədilə yalan məlumatların qarşısının alınması üçün bəzi məhdudiyyətlər tətbiq edildi. Bu barədə "Xalq qəzet"i yazırdı: "Bunu cəmiyyətdə informasiya blokadası, məlumat tələbatının qarşısının alınması kimi qiymətləndirmək olmaz. Dövlətin strateji informasiya müharibəsində əsas məqsədi düşmənin dezinformasiyalarından müdafiə, təhlükəsizliyin təmin olunmasıdır". Bu barədə Yaponiyanın "Nikkei" qəzetinin suallarını cavablandıran Azərbaycan Respublikasının Prezidenti İlham Əliyev deyirdi: "Bunlar müvəqqəti məhdudiyyətlərdir. Biz xalqımıza elan etdik ki, bu, milli təhlükəsizlik məsələləridir, çünki biz belə bir vaxtda informasiya sistemimizi erməni təxribatından qorumalıyıq".

Ali Baş Komandanın savaş günlərində müharibənin başlanması və qazanılan zəfərlərlə bağlı xalqa müraciətlərində və xarici KİV-ə verdiyi müsahibələrdə səsləndirilən həqiqətlər Azərbaycanın düşmən üzərində diplomatik və informasiya üstünlüyünü təmin etdi. Prezidentin erməni yalanlarının ifşa edilməsində bir ordu qədər xidmət göstərdiyini vurğulayan Beynəlxalq Avrasiya Mətbuat Fondunun rəhbəri, Azərbaycan Mətbuat Şurasının sədr müavini Umud Rəhimoğlu "Xalq qəzeti"nə bildirirdi: "Ali Baş Komandanın dünyanın nüfuzlu media qurumlarına bir-birinin ardınca verdiyi müsahibələr dünya ictimaiyyətində Qarabağ müharibəsinin obyektiv və əhatəli mənzərəsini yaradır. Bunlar beynəlxalq ictimai rəyə önəmli təsir göstərir. Dünya bu müsahibələri izləməklə müharibə bölgəsindəki əsl reallıqla tanış olur".

Məhz bu dolğun və obyektiv informasiya mənbəyi az qala dünyanın hər yerində böyük bir təbliğat sisteminin başında duran ermənilərin informasiya müharibəsindəki məğlubiyyətini də qaçılmaz etdi. "Xalq qəzeti"nin yazdığı kimi, "Ali Baş Komandan İlham Əliyevin beynəlxalq mediaya verdiyi müsahibələr Qarabağ müharibəsinin mahiyyətinə, erməni yalan və saxtakarlıqlarına aydınlıq gətirilməsi baxımından dünya ictimai rəyinə hər şeydən artıq təsir göstərir".

Ali Baş Komandanın siyasəti xalqı yumruq kimi birləşdirdi

Dünya ictimaiyyətini həyasızcasına aldadan Ermənistan rəhbərliyi sözdə sülh tərəfdarı olduğunu, Dağlıq Qarabağ münaqişəsinin danışıqlar yolu ilə həllinin mümkünlüyünü bəyan edirdi. Amma əməli fəaliyyətində isə əksinə, Füzulidə, Cəbrayılda, Ağdamda, Ağdərədə istehkamlar quraraq işğal etdikləri torpaqları qaytarmamaq üçün məkrli planlar qururdular.

Bəs sonu nə oldu?! Möhtərəm Prezident və Ali Baş Komandanın dediyi kimi, "nə oldu Paşinyan?" Təxribat xarakterli bəyanatları faktiki olaraq danışıqlar prosesinə vurulan böyük zərbə adlandıran Xalq artisti, professor Tofiq Bakixanov "Xalq qəzeti"nə müsahibəsində deyirdi: "Dağlıq Qarabağ Respublikası"ilə danışıqları Azərbaycan Ordusu aparmalıdır. Buyurun, həmin danışıqlar gedir". Şah İsmayılın, Nadir şahın qurduğu imperiyaların süqutundan sonra torpaq itirə-itirə gələn Azərbaycan ilk dəfə idi ki, torpaqlarının mühüm bir hissəsini - Qarabağı yenidən özünə qaytarmaqla şanlı tarixinin yeni səhifəsini yazmış oldu.

Barıt qoxusu çəkilməyən torpaqlara cənab Prezidentin xanımı, Birinci vitse-prezidentlə birlikdə səfər etməsi isə yeni bir fədakarlıq nümunəsidir. Bunu "Tarixi əhəmiyyətli səfər" adlandıran Milli Məclisin Hüquq siyasəti və dövlət quruculuğu komitəsinin üzvü, hüquq elmləri doktoru Nizami Səfərov "Xalq qəzeti"ndə yazırdı: "Cənab İlham Əliyevin və birinci xanım Mehriban Əliyevanın 10 noyabr Qələbəsindən cəmi 6 gün sonra işğaldan azad olunmuş yurd yerlərimizə - Füzuli və Cəbrayıl rayonlarına səfəri tarixi əhəmiyyət kəsb edir. Bu səfər... Ali Baş Komandanının rəhbərliyi altında həyata keçirilən zəfər yürüşünün məntiqi nəticəsidir".

Bundan sonra Ağdam səfəri reallaşdı, Ali Baş Komandan bir daha ortaya qoydu ki, Azərbaycan xalqı tarixi torpaqlarının sahibidir və bu gün onun sahibləri bu torpaqlarda rahat və qorxusuz gəzə bilər. Bu, həm də Azərbaycan dövlətinin gücünün, haqq savaşında qalibiyyətinin təntənəsi idi. Ali Baş Komandan erməni tapdağından təzəcə qurtarmış əzəli torpaqlara getməsi ilə buraya qayıtmaq istəyən xalqın inamını və arzusunu dəfələrlə artırmış oldu.

Prezident bu tarixi səfərlərində erməni vandalizminin sifətini də beynəlxalq ictimaiyyətə göstərdi. Vəhşiliklərindən çəkinməyən, Kəlbəcərdən, Laçından və digər azad olunmuş ərazilərdən çıxarkən də evləri, meşələri yandırıb viran qoyan erməni xislətlilərin əməllərini dünyaya göstərdi. Doğma yuvalarını tərk edəndə bir ovuc torpaq götürüb, qışın qar-çovğununda 10 saat ərzində ayaqyalın, başıaçıq canını qurtaran azərbaycanlıları onlarla müqayisə etmək tarixi haqsızlıq olardı. Bütün bunları bilə-bilə Azərbaycan dövləti yeni bir humanizmi ilə onlara daha 10 gün də vaxt verdi ki, murdar ayaqları müqəddəs torpaqlardan kəsilsin. Unitazlarını da, leşlərini də biryolluq aparsınlar...

Son söz yerinə

Azərbaycan xalqı 30 illik yurd nisgilindən sonra, nəhayət ki, Qarabağda qəhrəman bir savaşla işğal dövrünə son qoydu. "Xalq qəzeti"nin dərc etdiyi yüzlərcə qələbə soraqlı və müxtəlif janrlı materialları analiz etdikcə yekun qənaət kimi qələbəmizin obyektivliyini təmin edən bəzi detalların üzərində dayanmağı vacib bildik:

- Azərbaycan BMT-nin uzun illərdir kağız üzərində qalan 4 qətnaməsini özü yerinə yetirərək ərazilərini Ermənistanın işğalından azad etdi;

- Azərbaycan Prezidenti İlham Əliyev Vətən müharibəsi dövründə ciddi beynəlxalq təzyiq və təhdidləri məhz xalqın inam və iradəsinə, birliyinə söykənərək dəf etdi;

- Ali Baş Komandanın savaş günlərində müharibənin başlanması və qazanılan zəfərlərlə bağlı xalqa müraciətlərində və xarici KİV-ə verdiyi 30-dan çox müsahibədə səsləndirilən həqiqətlər Azərbaycanın düşmən üzərində diplomatik və təbliğati üstünlüyünü təmin etdi, öz yalanları ilə illərdən bəri geniş xarici auditoriyanı aldatmış işğalçı tərəfə informasiya sferasında ciddi zərbələr vurdu;

- Ermənistan hərbi-siyasi rəhbərliyi isə xilas olmağın yolunu müharibə cinayətləri törətməkdə - Azərbaycanın cəbhə bölgəsində və ondan uzaqlarda yaşayan dinc əhalisini raket-artilleriya atəşinə tutub ümumu vahimə və sarsıntı yaratmaqda gördü;

- Ermənilərin fitnəkar təxribatlarına, kütləvi vandalizminə baxmayaraq, Azərbaycanın Tərtər, Ağdam, Goranboy, Ağcabədi, Bərdə, Yevlax, Beyləqan rayonlarının, Gəncə və Mingəçevir şəhərlərinin sakinləri sonadək yüksək vətənpərvərlik, iradə, əzm nümayiş etdirdilər;

- Müharibə Azərbaycanın milli birliyini, həmrəyliyini bütün dünyaya nümayiş etdirdi. 44 günlük müharibə zamanı Azərbaycanda fərarilik faktı qeydə alınmadı;

- Nəhayət, Ali Baş Komandan İlham Əliyev milyonların qəlbində qurduğu əbədi mənəvi heykəli ilə yaddaşlara fateh kimi düşdü.

Namiq ƏHMƏDOV

Əməkdar jurnalist

525-ci qəzet.- 2021.- 4 noyabr.- S.13.