Yüksəliş"də fərqlənənlər: bilik, təcrübə və mentor amili bir arada

Prezident İlham Əliyevin 2019-cu il 26 iyul tarixli Sərəncamı ilə təsis olunan "Yüksəliş" müsabiqəsi ölkədə yeni nəsil idarəçilərin aşkara çıxarılması, perspektivli idarəçilərin dəstəklənməsi və təşviqi baxımından çox faydalı, eyni zamanda, şəffaf mexanizmə əsaslanan sosial lift layihəsi hesab edilir. Müasir və dünyəvi idarəçilik modelini əhatə edən müsabiqə 21-51 yaş aralığında, azı 2 illik idarəçilik təcrübəsi olan, ali təhsilli ölkə vətəndaşları arasında keçirilib. Beş mərhələdən - qeydiyyat, onlayn seçim, əyani, yarımfinal və finaldan ibarət olan müsabiqədə ümumilikdə 11760 nəfər qeydiyyatdan keçib. Onlardan 9775 nəfəri müsabiqəyə qəbul edilib. Ancaq müsabiqənin onlayn mərhələsinin nəticəsində onların böyük qismi ələnib. Əyani mərhələnin birinci imtahanı olan "Qabiliyyət üzrə yoxlama imtahanı"nda iştirak edən 940 nəfər 728 namizəd uğur qazanıb və "İdarəetmə bacarıqları üzrə imtahan"da iştirak hüququ əldə edib. Son imtahanda ən yüksək nəticə göstərən 309 iştirakçı müsabiqənin növbəti mərhələsi olan yarımfinala keçib. Yarımfinal iyun ayında olub. Yarımfinal və final öncəsində ekspertlər xarici mütəxəssislərin iştirakı ilə üç günlük təlimlərə qatılıblar. Müsabiqə şərtlərinə görə, finala 100 nəfər çıxmalı idi. Amma yarımfinalda 21 nəfər eyni nəticəni göstərdiyi üçün Təşkilat Komitəsinin qərarı ilə finalçıların sayı 112 olub. Bu da müsabiqə qaliblərinin sayına təsir edib. Müsabiqənin final mərhələsi keçirilib və 9 nəfər finalçı eyni nəticəni əldə etdiyi üçün 20 deyil, 27 qalibin adı açıqlanıb. Adları kadr ehtiyatı bankına daxil edilməklə yanaşı, qaliblərin hər biri idarəçi rəhbərlər tərəfindən 1 illik fərdi inkişaf planı və 20 min AZN məbləğində özünüinkişaf qrantı əldə edib.

Müsabiqənin finalında iştirak edən 112 çox güclü namizəd arasında fərqlənən və qalib adını qazanan həmin 27 şəxsdən biri də "Yüksəliş" müsabiqəsində ikinci yerə layiq görülən Ziya Mürsəlzadədir. O, SOCAR-ın XTP çərçivəsində 2012-2013-cü illərdə Böyük Britaniyanın Leicester Universitetinin Maliyyə ixtisasını magistr pilləsi üzrə fərqlənmə dərəcəsi ilə bitirib. 2013-cü ildən SOCAR ailəsinin üzvüdür. Hazırda SOCAR-ın Əmək şəraiti normalarının işlənməsi İdarəsində rəis müavini vəzifəsində çalışır. Eyni zamanda, həm BANM-də Biznesin Təşkili və İdarə edilməsi (MBA) ixtisası üzrə və UNEC ISE-də müəllim kimi fəaliyyət göstərir.

Qeyd edək ki, müsabiqənin şərtlərinə əsasən, qalib bir il müddətində müsabiqənin idarəçi rəhbəri ilə mentorluq proqramı çərçivəsində əməkdaşlıq edərək təcrübə keçəcək. İqtisadiyyat naziri Mikayıl Cabbarov "Yüksəliş" müsabiqəsinin qalibi Ziya Mürsəlzadənin mentoru olacaq.

Ziya Mürsəlzadə deyir ki, Bakı Dövlət Universitetində Beynəlxalq münasibətlər və beynəlxalq hüquq fakültəsinin beynəlxalq iqtisadi münasibətlər ixtisası üzrə bakalavr təhsili alıb. Magistr pilləsi üzrə isə SOCAR-ın Xarici Təhsil Proqramı (XTP) çərçivəsində Böyük Britaniyanın Lester Universitetində təhsil alıb. Həmin universiteti 2013-cü ildə fərqlənmə dərəcəsi ilə bitirərək, eyni zamanda, universitet üzrə ilin magistr tələbəsi mükafatına layiq görülüb: "2013-cü ildən SOCAR-da əmək fəaliyyətimə başlamışam. Əvvəlcə Əmək Şəraiti Normalarının İşlənməsi İdarəsinin (ƏŞNİİ) İqtisadi göstəricilər və maliyyə modelləşdirilməsi şöbəsində iqtisadçı, daha sonra şöbə rəisinin müavini, şöbə rəisi vəzifələrində işləmişəm. 2019-cu ildən hal-hazıradək ƏŞNİİ-nin idarə rəisinin müavini vəzifəsində çalışıram. SOCAR-da indiyə qədər müxtəlif maraqlı layihələrdə yer almışam. Korporativ maliyyə modeli, SOCAR-ın 2035-ci ilə qədər strategiyası və sair layihələrində məsləhətçi şirkətlərlə birlikdə çalışmışam. Hazırda bizim komanda şirkət üzrə rüblük və illik analitik maliyyə hesabatlarının hazırlanması, neftin və qazın qiymətinin təhlili və proqnozlaşdırılması, investisiya qərarlarının iqtisadi səmərəliliyinin yoxlanılması və korporativ maliyyə modelinin illik yenilənməsi üzrə işlərlə məşğuldur. Bununla yanaşı, maliyyə üzrə beynəlxalq sertifikat olan CFA sertifikatı üzrə əvvəlcə iştirakçı, hazırda isə təlimçi olaraq fəaliyyət göstərirəm və CFA 2-ci səviyyə imtahanı üzrə namizədəm. Eyni zamanda, 2015-ci ildən pedaqoji fəaliyyətlə məşğulam. Əvvəlcə Xəzər Universitetində, hazırda isə həm BANM-in MBA ixtisasında, həm də UNEC-in Beynəlxalq iqtisadiyyat məktəbində tədrislə məşğulam".

Ziya Mürsəlzadənin sözlərinə görə, xaricdə təhsil almasında valideynlərinin rolu böyük olub: "Atamın uşaqlıq illərində kənd məktəbindən Bakıya təhsil almağa gəlməsi məni də ən azı bunu təkrarlamağa sövq edirdi. Xaricdə təhsil almaq həvəsi ilə hələ 9-cu sinifdə oxuyarkən FLEX proqramına müraciətlə etmişdim. Son mərhələyə qədər uğurla gəlsəm də, sonuncu mərhələdə uğursuz olmağım, əslində ali təhsil üzrə xaricdə təhsil almalı olduğumu prinsipial məsələyə çevirdi. Bir sözlə, uğursuzluq məni daha əzmkar etdi. Bununla yanaşı, bakalavr təhsili müddətində İngiltərədə "Yay Məktəbi"ndə iştirak etdim və artıq xaricdə və məhz Böyük Britaniyada təhsil almaq qərarı daha da dəqiqləşmişdi. Başa düşürdüm ki, bu, mənə həm təhsilimi təkmilləşdirməyə, həm də başqa bir cəmiyyətdə yaşayıb təcrübə qazanmağa kömək edəcək. Bu prosesdə Böyük Britaniyanın 11 universitetindən qəbul almışdım. Bir neçəsi təqaüd də təklif etmişdi. Araşdırmalar nəticəsində Lester Universitetinin həm keçirilən dərslər, həm də o vaxtkı potensialına görə həmin universitetin üzərində dayandım. Əsas məsələ kimi universitetin ödənişi və yaşayış xərclərinin necə qarşılanacağı qalırdı və SOCAR-ın Xaricdə Təhsil Proqramı haqqında araşdırmalarım nəticəsində həm birbaşa prosesdə iştirak edən əvvəlki məzunların tövsiyələri, həm də SOCAR-ın həmin istiqamət üzrə çalışan əməkdaşları ilə yazışmalar zamanı yaranan xoş münasibətlər məni bu proqramın uğurlu bir proqram olduğuna inandırdı. Sənədlərimi XTP-yə təqdim etdim və qısa müddət ərzində müsahibələr keçirildi və nəticədə proqrama qəbul olunduğum bildirildi. Bu uğur mənə və ailəmə həm sevinc hissi yaşatdı. Eyni zamanda, əldə edəcəyim bilikləri dövlətin ən böyük şirkətində tətbiq etmək şansını qazanmağımı anlamağım mənə həyəcan və böyük məsuliyyət verirdi. Çox xoş, bir o qədər də məsuliyyətli məqam idi".

Ziya Mürsəlzadə bildirib ki, xaricdə aldığı təhsil və digər bacarıqlar SOCAR-dakı karyerasında böyük rol oynayıb: "SOCAR-dakı fəaliyyətimə əsasən xaricdə təhsil almış, müasir düşüncəli, yeniliklərə açıq olan komandada başladım. Əlbəttə ki, əldə etdiyim bilikləri tətbiq etməyə yaradılan şərait öz üzərimdə işləməyimə, nəzəriyyədə və standart praktiki tapşırıqlarda əldə etdiyim bilikləri qeyri-standart vəziyyətlərdə necə tətbiq edə biləcəyimi qavramağıma çox kömək oldu. Şablonlardan uzaq və dəyişikliyə hər zaman açıq bir komandada işləmək imkanı "Yüksəliş" müsabiqəsində də əsas götürülmüş kompetensiyaların formalaşmasına və inkişafına şərait yaratdı. Əlbəttə ki, müasir tələblərə cavab verən, çevik və dəyişikliklərə açıq yanaşma tərzi, keyfiyyətli komanda işi SOCAR-da iştirak etdiyimiz müxtəlif layihələrdə uğur qazanmağa imkan yaratdığı kimi, həmin layihələrdə iştirak etmək də müxtəlif bacarıqların təkmilləşdirilməsi üçün bir təcrübə rolunu oynadı. Keyfiyyətli təhsilin və müasir düşüncənin, neft sənayesinin bütün incəliklərinə hakim olan dəyərli mütəxəssislərin praktiki bilikləri ilə vəhdət şəkildə tətbiqi imkanları, SOCAR-ın həm daxili, həm də xarici təqaüd proqramlarının məzunlarının bir mütəxəssis kimi yetişməsində əsas qazancıdır".

Ziya Mürsəlzadənin dediyinə görə, insan uğurun əsas hissəsini ona inanmaqla əldə edir: "Daha təcrübəli insanlardan öyrəniləcək çox şeyi olan bir gənc kimi həmyaşıdlarıma onu tövsiyə edə bilərəm ki, həmişə uğura inansınlar. Düşünürəm ki, insan uğurun əsas hissəsini ona inanmaqla əldə edir. Özləri üçün sağlam, prinsipial dəyərlər formalaşdırıb həyat strategiyalarını həmin dəyərlərin təmin olunmasına istiqamətləndirsələr, həm maraqlı təcrübə yaşaya, həm də uğrunda zəhmət çəkdikləri işlərin məntiqi sonluğunu görə bilərlər. Müəyyənləşdirilmiş dəyərlər onları xaotik uğurların yox, sistemli uğurların əldə olunmasına təşviq edəcək. Gənclərin yüksək biliklə yanaşı, özünü dərketmə, özünü tənzimləmə, başqasının vəziyyətini anlamaq kimi bacarıqlarının inkişaf etdirilməsinin onların kompleks inkişafı üçün əsas olduğuna inanıram. Hər kəsin barmaq izi fərqli olduğu kimi, uğur hekayəsi və yolu da fərqli olur. Buna görə də düşünürəm ki, özlərini başqaları ilə deyil, öz keçmişlərində olduqları vəziyyətlə və inkişaf edərək hansı vəziyyətə gələcəkləri ilə müqayisə etsinlər və bu müddət ərzində hansı aktivləri əldə edəcəklərini təhlil etsinlər. Bu, həm onların özünü motivasiyası, həm də gələcəkdə özlərini harada görmək istədikləri barədə aydın bir fikir yaradacaq. Bütün gənclərimizə uğurlar arzulayıram".

S.QARAYEVA

525-ci qəzet.- 2021.- 13 noyabr.- S.8.