Doğma yurda qayıdışın ədəbi müjdəsi

Qarabağ mövzusu, erməni işğalı nəticəsində meydana gələn yurd itkisi, qaçqınlıq, didərginlik kimi ağrılı mövzular tanınmış hərbi jurnalist və yazıçı Vahid Məhərrəmovun yaradıcılığında xüsusi yer tutur. "Müharibənin bir ili", "Səngərdə yazılmış sətirlər", "Erməni əsirliyindən dönənlər", "Müharibənin qanlı kölgəsi" və digər əsərləri onun bu kimi mövzulara necə həssaslıqla yanaşmasının bariz göstəricisidir. Bu əsərlərdə müəllif son otuz ildə üzləşdiyimiz işğal, qaçqınlıq, müharibə kimi dərdlərimizi həm faktların dili ilə, həm də bədii lövhələrlə qələmə alıb.

Bu günlərdə V.Məhərrəmovun yaradıcılığına yeni bir səhifə yazılıb, "Elimizə qayıdırıq..." adlı yeni kitabı çapdan çıxıb. Kitabda 44 günlük Vətən müharibəsində Müzəffər Ali Baş Komandanın rəhbərliyi altında qəhrəman Azərbaycan əsgərlərinin göstərdikləri şücaət, misilsiz qəhrəmanlıq və azad olunan doğma torpaqlarımıza qayıdışın sonsuz sevinci öz əksini tapıb. Tarixi zəfərin əldə olunmasında, söz yox ki, xalqa, yeni nəsillərə torpaqlarımızın itkisi ilə barışmamaq mövqeyini aşılayan yazarlarımızın da mühüm xidmətləri var. Qarabağ mövzusunda dövri mətbuatda tez-tez çıxış edən, vətənpərvərliyin təbliğinə töhfələr verən, gəncləri döyüşə ruhlandıran qələm sahibi kimi, təbii ki, V.Məhərrəmov da Qələbəmizə, torpaqlarımıza dönüş təntənəsinə biganə qala bilməzdi. Onun "Elimizə qayıdırıq..." kitabının əsas qayəsi məhz bu duyğulardan, vətənə sevgidən, düşmənə nifrətdən yoğrulub.

Tənqidçi Nərgiz Cabbarlının ön söz yazdığı kitab ümumən həyatın müxtəlif sahələrini əhatə edən, bir-birindən maraqlı yazılardan ibarətdir.

Kitabda povest, hekayə, esse və publisistik yazılar yer alıb. "Qismət" povestinin qəhrəmanı olan gəncin müsbət obrazını müəllif ustalıqla yaradıb. Qismətin atasını vaxtsız itirməsi, ali təhsil almaq üçün Bakıya gəlməsi və sonuncu imtahana gedərkən avtobus qəzası keçirməklə ağır xəsarət alması, onun həmin il instituta qəbul ola bilməməsi, keçmiş ittifaqın ucqar əyalətlərində hərbi xidmət keçməsi, yaxın dostu və qonşusunun onun bacısına elçi düşməsi, Qismətin faciəli, vaxtsız bitən ömür yolu ardıcıllıqla işıqlandırılıb. Povest oxucuda həzin duyğular və fərqli hisslər oyadır. Vahid Məhərrəmovun müxtəlif illərdə qələmə aldığı hekayə və esselər də maraqla oxunur. "Dolların kursu", "Köhnə televizor", "Arayış üçün arayış", "Dəlixanada şeir konfransı" və başqa hekayələrin mövzusu həyatdan götürüldüyündən xoş təsir bağışlayır.

Kitabdakı publisistik məqalələrdə ayrı-ayrı müəlliflərin dövri-mətbuatda çıxan Qarabağ müharibəsi mövzulu yazılarına diqqət yetirilir, irad və qeydlər ifadə olunur.

Nəşrin adından da göründüyü kimi, özü də qaçqınlıq həyatı yaşamış Vahid Məhərrəmov tarixi qələbəmizə ürəkdən sevinir və bir çox soydaşlarımızla bərabər, o da doğma yurda - Zəngilana, Babaylı kəndinə qayıtmağa hazırlaşır.

Bəxtiyar ƏLİYEV

525-ci qəzet.- 2021.- 30 noyabr.- S.9.