"TÜRKSOY Media Mükafatı" Vətən müharibəsini işıqlandıran jurnalistlərə verildi

ELÇİN QAFARLI: "BU FƏDAKAR, QƏHRƏMAN İNSANLARIN VASİTƏSİLƏ DÜNYA AZƏRBAYCAN HƏQİQƏTLƏRİNDƏN BİRBAŞA VƏ DƏQİQ XƏBƏR TUTA BİLDİ"

Beynəlxalq Türk Mədəniyyəti Təşkilatı (TÜRKSOY) tərəfindən 2009-cu ildən etibarən hər il türk dünyasında baş verən mədəniyyət və incəsənət hadisələrini, ümumtürk mədəniyyətini və təşkilatın fəaliyyətlərini geniş işıqlandıran, dünya mətbuatında təbliğ edən kütləvi informasiya vasitələrinin nümayəndələrinə və mətbuat qurumlarına "TÜRKSOY Media Mükafatı" təqdim olunur.

525.az xəbər verir ki, TÜRKSOY builki media mükafatını Qarabağ savaşına həsr edib. 2020-ci il üçün özəl olaraq "TÜRKSOY Media Mükafatı"nın 44 günlük Vətən müharibəsi dövründə Azərbaycanda yaşanan tarixi hadisələri, Qarabağ həqiqətlərini dünya ictimaiyyətinə obyektiv çatdıran və yayımlayan yerli və xarici media təmsilçilərinə verilməsi qərara alınıb.

Azərbaycanın TÜRKSOY təşkilatındakı nümayəndəsi Elçin Qafarlının sözlərinə görə, 2020-ci ildə başlanan pandemiyaya görə dünyanın hər yerində olduğu kimi, TÜRKSOY tərəfindən də keçirilən tədbirlər məhdudlaşdırılıb: "Lakin təşkilatımızın ən fəal üzv ölkələrindən biri olan doğma Azərbaycanda önəmli hadisələr baş verdi. 30 ilə yaxın işğal altında olan Qarabağın, torpaqlarımızın azadlığı uğrunda Vətən müharibəsi başlandı və qəhrəman ordumuz Ali Baş Komandan cənab İlham Əliyevin rəhbərliyi altında parlaq zəfər qazandı. Qələbə ilə başa çatan 44 günlük Vətən müharibəsi dövründə Azərbaycanın haqq səsini, Qarabağ həqiqətlərini, Gəncə, Bərdə, Tərtər və digər bölgələrimizdə baş verən hadisələri dünya ictimaiyyətinə çatdıran yerli və xarici media nümayəndələrinin böyük əməyini və fədakarlığını görməmək mümkün deyildi. Bu fədakar insanların, sözün əsl mənasında qəhrəman müxbirlərin, operatorların, fotoqrafların döyüş bölgələrindən verdiyi xəbərlər və çəkdiyi şəkillər vasitəsilə dünya Azərbaycan həqiqətlərindən, müharibə vaxtı baş verən hadisələrdən birbaşa və dəqiq xəbər tuta bildi".

E.Qafarlı bildirib ki, TÜRKSOY-un baş katibi Düsen Kaseinovun təklifi və təşəbbüsü ilə 2020-ci il üçün media mükafatlarını məhz bu fədakar media nümayəndələrinə təqdim edilməsi qərarlaşdırıldı və təqdimat mərasiminin Bakıda keçirilməsi və mükafat alan media nümayəndələrinin Şuşaya səfər etməsi təklif edildi. "TÜRKSOY Media Mükafatı"na layiq görülənlər arasında Türkiyə, Azərbaycan və başqa ölkələrdən olan jurnalistlər də var. Bu mükafat keçən illər ərzində əsasən üzv ölkələrimizdən olan media nümayəndələrinə təqdim edilmişdi. Bu dəfə isə Azərbaycan, Qazaxıstan, Qırğızıstan, Türkiyə, Özbəkistan nümayəndələrindən başqa, Xorvatiya və Fransa jurnalist və fotomüxbirləri də siyahıya daxil edildi və onlar Bakıya dəvət olunaraq mükafatlara layiq görüldülər".

Onun dediyinə görə, namizədlərin seçimi çox həssas məsələ olduğu üçün təşkilat media nümayəndələrinin müəyyənləşdirilməsi və siyahıların TÜRKSOY-a təqdim olunması məqsədi ilə Azərbaycan Respublikasının Mədəniyyət Nazirliyinə və xarici ölkələrdəki səfirliklərinə müraciət edilib: "Nazirlikdən və səfirliklərimizdən bizə daxil olan siyahılar əsasında mükafat alacaq jurnalistləri, fotomüxbirləri və media qurumlarını müəyyən etdik. Beləliklə, yekun rəyə əsasən, müxtəlif ölkələrdən olan otuz altı jurnalist 2020-ci il üçün Xarıbülbül "TÜRKSOY Media Mükafatı"na layiq görüldü" .

Bu il iyunun 4-də Kəlbəcər rayonu ərazisində mina partlaması nəticəsində şəhid olmuş azərbaycanlı jurnalistlər - AZƏRTAC-ın əməkdaşı Məhərrəm İbrahimov və AzTV-nin əməkdaşı Sirac Abışov da TÜRKSOY tərəfindən diqqət mərkəzində saxlanılıb. Şəhid jurnalistlərin də adı mükafatçılar sırasına daxil edilib.

Elçin Qafarlı deyib ki, jurnalistlər Məhərrəm İbrahimov və Sirac Abışov Qarabağ hadisələrini işıqlandırarkən həyatlarını riskə atmış və iki qəhrəman jurnalistimiz vəzifələrini icra edərkən minaya düşərək şəhidlik zirvəsinə ucalıblar: "Bu hadisə bizim diqqətimizdən kənarda qala bilməzdi. Ona görə şəhid jurnalistlərimiz Məhərrəm İbrahimovu və Sirac Abışovu "TÜRKSOY Media Mükafatı"na layiq görüləcək jurnalistlərin siyahısına daxil edərək bir daha bu erməni vəhşiliyinə və vandalizminə dünyanın diqqətini çəkməsini istədik".

Onun sözlərinə əsasən, mükafata layiq görülənlər sırasında Türkiyənin "Haber Global" televiziyasının əməkdaşı Osman Girgin, "A Haber"in əməkdaşı Abdulkərim Ulak, "CNN Türk"ün sabiq işçisi, hazırda Fox TV-də çalışan Fulya Öztürk, dünyaca məşhur fotoqraf Reza Deqati də var: "Sözsüz ki, bu fədakar jurnalistlər öz fotoları və canlı yayımları ilə 44 günlük Vətən müharibəsi dövründə Azərbaycan xalqının haqq səsini və baş verən hadisələri xronikal olaraq dünyaya çatdırırdı. Reza Deqati və Fulya Öztürk Azərbaycanda xüsusilə çox sevilir. Amma mükafat alan və siyahımıza düşməyən neçə-neçə jurnalistin də fədakar əməyini qeyd etmək istərdim. Belə müqəddəs işdə xəbərin kiçik və ya böyüklüyündən asılı olmayaraq hər bir jurnalistin əməyi böyükdür. Hər birinə ayrı-ayrılıqda təşəkkür edirəm. Bu, əsl qardaşlıq nümunəsidir".

"TÜRKSOY Media Mükafatı" ilə təltif olunan yerli və xarici media təmsilçilərinin Şuşa şəhərinə səfəri də təşkil olunub. Media nümayəndələri Azərbaycanın mədəniyyət beşiyi olan Şuşanın tarixi-mədəni irsi, 28 ildən artıq davam etmiş erməni işğalı dövründə dağıdılıb talan edilən tikililər, vandalizmə məruz qalan abidələr, məscidlər, eləcə də Şuşanın işğaldan azad edilməsindən sonra başlanan quruculuq işləri ilə tanış olublar. Yerli və xarici media təmsilçiləri şəhərin mərkəzi meydanı - "Bazarbaşı"nı, erməni vandalizminə məruz qalmış "Güllələnmiş heykəllər"i - Üzeyir Hacıbəylinin, Xurşidbanu Natəvanın, Bülbülün büstlərini, 2021-ci il iyunun 15-də Azərbaycan və Türkiyə Prezidentləri tərəfindən tarixi Şuşa Bəyannaməsinin imzalandığı məkanı, Natəvanın evini, "Xan qızı bulağı"nı, Şuşa qalasının girişi olan Gəncə qapısını, Aşağı Gövhər ağa və Yuxarı Gövhər ağa məscidlərini, Cıdır düzünü, bu ilin avqustunda bərpadan sonra açılışı keçirilən Molla Pənah Vaqifin məqbərəsini, Bülbülün ev-muzeyini və digər yerləri ziyarət ediblər.

Qarabağın incisi olan qədim Şuşanın tarixi, mədəniyyəti, dahi şəxsiyyətləri və bu gün ölkə rəhbərliyinin tapşırığı ilə burada aparılan genişmiqyaslı quruculuq işləri, şəhərin tarixi görkəminin, zəngin mədəni irsinin bərpası ilə bağlı həyata keçirilən layihələr barədə media nümayəndələrinə ətraflı məlumat verilib.

E.Qafarlı vurğulayıb ki, bu il TÜRKSOY təşkilatı türk dünyasının iki dahisi - Nizami Gəncəvi və Yunus İmrə ilini geniş qeyd edir. Üzv ölkələrdə və dünyanın digər ölkələrində müxtəlif tədbirlər, sərgilər, konsertlər və yayımlar həyata keçirilir. Hazırda Nizami Gəncəvinin əsərlərini öz rəsm əsərlərində vəsf edən türk dünyası rəssamlarının əsərləri bir kitabda toplanaraq nəşrə hazırlanıb: "Böyük türkoloq Aqafangel Krımskinin "Nizami və onun müasirləri" əsəri bizim təklifimizlə ADPU nəzdində fəaliyyət göstərən "TÜRKSOY Kafedrası" tərəfindən Azərbaycan dilinə çevrilib və bu il Mədəniyyət nazirliyimiz tərəfindən nəşr olunması nəzərdə tutulub. Bundan əlavə, Aşıq Ələsgərin anadan olmasının 200 illiyi münasibətilə ustadın seçilmiş şeirləri Türkiyə türkcəsinə tərcümə edilərək TÜRKSOY tərəfindən nəşrə verilib. Azərbaycan Respublikası Mədəniyyət Nazirliyinin təklifi diqqətə alınaraq Şuşa şəhərinin 2023-cü ildə Türk Dünyasının Mədəniyyət Paytaxtı elan olunması nəzərdə tutulub".

Sevinc QARAYEVA

525-ci qəzet.- 2021.- 2 oktyabr.- S.9.