Sabaha ümidimizi artıranlar

BU İL TƏLƏBƏ ADI İLƏ BİRLİKDƏ PREZİDENT TƏQAÜDÜ DƏ QAZANAN ABİTURİYENTLƏRİ TANIYAQ

Ali təhsil müəssisələrinə tələbə qəbulu müsabiqəsində ən yüksək nəticə əldə edənlər gəncliyimizin qızıl fondunu təşkil edirlər. Onların təcrübəsi həm cəmiyyətdə, həm də məktəblərdə güclü təsirə malik nümunə rolunu oynayır. Yüksək nəticələr əldə edən tələbələrə qayğı göstərmək, onların təhsil alması üçün daha əlverişli şərait yaradılmasını təmin etmək və təhsilə olan həvəslərini artırmaq dövlət tərəfindən daim diqqət mərkəzində saxlanılır.

Bu günlərdə Prezident İlham Əliyevin Sərəncamı ilə 2021-2022-ci tədris ilində Azərbaycanın ali məktəblərinə daxil olaraq yüksək bal toplayan 102 tələbəyə Prezident təqaüdü verilib. Azərbaycan gəncliyinin intellektual elitasına göstərilən bu diqqət maddi stimuldan çox güclü mənəvi dəstək, ruhlandırıcı amil rolunu oynayır, təhsildə sağlam yarış mühitinin yaranmasına təsir göstərir.

Bu il Prezident təqaüdünə layiq görülən şəxslər ölkənin 28 müxtəlif şəhər və rayonlarını təmsil edirlər. Təqaüdçülər arasında isə 59 nəfər regionlarda fəaliyyət göstərən məktəblərdən (o cümlədən, 16 nəfər kənd məktəbinin məzunlarıdır), 9 nəfər keçmiş işğal altında olan rayonlara aid məktəblərdən, 1 nəfər valideyni əlil olan ailədən, 3 nəfər bir valideyni olmayan ailədən, eləcə də müəllim, hərbçi, həkim, sürücü, mühəndis, satıcı, fəhlə, təqaüdçü övladı olan məzunlar var. Siyahıda olan 22 nəfərin valideynlərindən ən az biri müəllimlik fəaliyyəti ilə məşğul olur.

Təqaüdçülərdən 43 nəfər Bakıda yerləşən məktəblərin məzunlarıdır. Daha sonra Sumqayıtda yerləşən məktəblərin məzunlarından 15, Gəncədə yerləşən məktəblərin məzunlarından 5, Abşeron, Kəlbəcər, Naxçıvan və Şəmkirdə yerləşən məktəblərin məzunlarından 3 nəfəri bilik öncülləri siyahısında görmək olar.

Dövlət İmtahan Mərkəzindən verilən məlumata görə, Prezident təqaüdçülərindən 33 nəfər Bakı Ali Neft Məktəbinə, 25 nəfər Azərbaycan Tibb Universitetinə, 15 nəfər Bakı Dövlət Universitetinə, 12 nəfər ADA Universitetinə, 8 nəfər Azərbaycan Dövlət İqtisad Universitetinə, 4 nəfər Dövlət İdarəçilik Akademiyasına, 2 nəfər Birgə Azərbaycan-Fransız Universitetinə (UFAZ), 2 nəfər xüsusi təyinatlı ali təhsil müəssisəsinə, 1 nəfər isə Azərbaycan Dövlət Neft və Sənaye Universitetinə qəbul olunub.

Prezident təqaüdünə layiq görülən tələbələrdən biri də Tovuz rayonun Əlimərdanlı kəndindəki M.Musayev adına tam orta məktəbin məzunu Nuridə İsmayılovadır. Nuridə 664 bal toplayaraq Bakı Dövlət Universitetinin "Filologiya" fakültəsinin Azərbaycan dili və ədəbiyyatı müəllimliyi ixtisasına qəbul olub. 10 və 11-ci siniflərdə Azərbaycan dili və ədəbiyyat üzrə Respublika Fənn olimpiadalarında müvafiq olaraq III və II yerləri tutan Nuridə məktəbi də qızıl medalla bitirib: "Ali məktəbə qəbul olmaq üçün iki il mütəmadi olaraq bütün fənlərdən repetitorlarla hazırlaşdım. Onların əksəriyyəti öz məktəbimizin müəllimləri idi. Məktəbimizdə təhsil yüksək səviyyədədir. Uşaqlara təməl biliklər dərindən öyrədilir. Sadəcə, iki il tədris onlayn olduğu üçün rayonda internetə görə problemlər yaşanırdı. Buna baxmayaraq, müəllimlərimin sayəsində çətinliklərin öhdəsindən gələ bildim. Hədəfim yüksək bal toplayaraq Prezident təqaüdünə layiq görülmək idi. Doğrusu, bir az narahat idim. Çünki hər ixtisas üzrə ilk 25-liyə düşəcəyimə ümid etmirdim. Sevinirəm ki, hədəfimə nail oldum".

Nuridə İsmayılova yüksək bal toplamağına baxmayaraq, müəllimlik ixtisasını seçməsini bu fənni çox sevməsi ilə əlaqələndirib: "Azərbaycan dili və ədəbiyyat müəlliməm Elnarə Həsənovanı çox istəyirdim və onu özüm üçün ideal seçmişdim. Həm də dilimizin saflığını qorumaq istəyirəm. Bu fənnə böyük marağım səbəbi həm də budur. Təhsilimi bitirəndən sonra universitetdə qalıb elmi işçi olmaq istəyərəm. Əgər alınmazsa, o zaman Azərbaycanın istənilən güşəsində dilimizi şagirdlərə sevə-sevə tədris edərəm".

Qəbul imtahanında ən yüksək bal toplayaraq, Azərbaycan birincisi olan, Prezident təqaüdcülərindən biri də Əbil Şəfiyevdir. Əslən Qubadlı rayonunun Xanlıq kəndindəndir. Məcburi köçkün kimi ailəsi Sumqayıt şəhərində mehmanxanalardan birində məskunlaşıb. 2019-cu ildən isə Sumqayıtda məcburi köçkünlər üçün salınmış qəsəbədə onlara mənzil verilib. Sumqayıt şəhərindəki 11 nömrəli tam orta məktəbin məzunu olan Əbil Şəfiyev siyahıda adının olacağına əmin olduğunu bildirib: "Baki Ali Neft Məktəbinin kimya mühəndisliyi fakültəsinin birinci kurs tələbəsiyəm. Mən 697,1 bal ilə respublika birincisi olmuşam. Bu bala əsaslansaq, təqaüd alacağım gözlənilən idi. Təqaüdü nəyə xərcləyəcəyimi indi bilmirəm, alandan sonra qərar verəcəyəm. Valideynlərim bu xəbərə çox sevindilər. Uğurumu onlara da borcluyam. Mənə hər zaman dəstək olublar".

Əbil Şəfiyev deyir ki, qəbul imtahanında yüksək bal təkcə son bir-iki ilin hazırlıq nəticələri deyil, aşağı siniflərdən dərsləri yaxşı mənimsəmək və öyrənmək lazımdır: "Hazırlıq müddətində isə, zəif bildiyi mövzuları müəyyənləşdirməli, onlara daha çox diqqət ayırmalı, yaxşı bildiklərini isə möhkəmlətməlidir. Öncə hədəf qoymalı, ona çatmaq üçün çalışmalı, özünə xas sistem qurmalı, özünə güvənməli, lakin özünü aldatmamalı və xüsusilə ailəsindən ona güvənməyi və çox sıxmamağı xahiş etməlidir ki, bu hissi və güvəni isə onlara abituriyent verməlidir. Qrup və ixtisas seçimində isə, məncə, ilk öncə öz istəklərini və sevdiyi sahəni seçməlidirlər. Valideynlərlə və digərlərilə məsləhətləşmək, seçəcəyi ixtisası dərindən araşdırmaq çox köməklik edəcək və onda fikir formalaşdıra biləcək. Lakin öncə nəyi sevdiyini bilməli və ona görə seçim etməlidir, çünki bu seçim onun həyatına istiqamət verəcək".

Əbilin atası mühasib, anası isə xəstəxanada tibb bacısı işləyir. Bacısı Azərbaycan Dillər Universitetinin ingilis dili üzrə 3-cü kurs tələbəsidir. Qardaşı isə 11-ci sinif şagirdidir.

Onun sözlərinə görə, o, Qubadlının Xanlıq kənd sakinidir: "Ailəm illərlə qaçqın statusu daşıyıb. Ermənilər kəndimizi işğal etdiyinə görə 30 il qaçqın həyatının çətinliyini görüblər. 44 günlük Vətən müharibəsinin Zəfəri isə bizim yaramıza məlhəm oldu. Mən buna görə görə Prezidentimizə və Ordumuza ürəkdən təşəkkür edirəm. Biz tələbələrə belə diqqət göstərdiyi üçün isə ayrıca minnətdarlıq edirəm".

Prezident təqaüdünə layiq görülən tələbələrdən biri də Ənsərli Cahan Akif qızıdır. Oğuz şəhər 3 saylı məktəb-liseyin məzunu olan Cahan 679 bal toplayaraq Bakı Dövlət Universitetinin "Hüquqşünaslıq" fakültəsinə daxil olub.

Cahan Ənsərlinin sözlərinə əsasən, qəbul imtahanında yüksək bal toplayacağından əmin olsa da, Prezident təqaüdçüsü olacağını güman etməyib: "Oğuz rayonunda 3 il kursda hazırlıq keçmişəm. 4 il Respublika fənn olimpiadasında Tarix fənni üzrə qalib olmuşam, 2 qızıl, 2 gümüş medal qazanmışam. 9-cu sinifdə buraxılış imtahanında respublika üzrə ən yüksək nəticə göstərmişəm, maksimum 300 bal toplamışam. Məktəbi isə qızıl medalla bitirmişəm. Ən böyük istəyim BDU-nun "Hüquqşünaslıq" fakültəsinə qəbul olmaq idi. Oğuz rayonunun orta məktəb məzunları arasında ən yüksək balı mən toplamışam: buraxılış imtahanında 291.2, qəbul imtahanında 387.9 bal. Prezident təqaüdünə layiq görülməyim mənim üçün sürpriz oldu. Hazırda ingilis dilində təhsil alıram və gələcəkdə magistraturanı xaricdə oxumağı düşünürəm. Oğuzda təhsil güclüdür. Ümumiyyətlə, oxumaq istəyən üçün şəhər və ya rayon məktəbinin fərqi yoxdur".

S.QARAYEVA

525-ci qəzet .- 2021.- 6 oktyabr.- S.12.